¹ Chuna Chu Puchina tachiwinalh Moisés chu wanilh: ² Nakj xapulana kilhtamaku wa ama xapulana papa' nak xasasti kata wixin nakaxwaliyatit ama aktsu chiki niku najtatamakgxtumiyaw. ³ Wix nawaliya xpumakin talajkaxtlan anta, chu nalimatsekga litalakgatlapa xpumakin talajkaxtlan. ⁴ Nalitana akgtum puwalin chu anta nakakaxwaliya tuku anta ankgoy. Chuna cho wix nalitana niku walikan cera chu nakaxlaway pumakgskgo. ⁵ wix nawaliya pumajinin nak xlakatin xpumákin talajkaxlan, chi wix nawaliya talakgatlapat anta niku laktanukan chiki niku tatamakxtumikan Puchina. ⁶ niku lhkuyikan lilakgataynan nawaliya nak xlakatin niku laktanukan ama chiki niku tatastojkan Puchina. ⁷ nakaxwiliya akgtum pumakgachakan nak xlakgstipan chiki niku tatastojkgan Puchina chu pulakgatayan. ⁸ Na nakaxwilhiya akgtum xtankilhtin xlhistilhilhi, chu nanamaukaya lilakgatlapat anta niku laktanukan. ⁹ Natiyaya aceite nikuma lisikulhnantlawnankan chu nakmawkaya chiki niku tatalakxtumikan chu putum tuku anta wi. Wix namapapitsiya chu putum tuku anta wi kila nawan; santoj nawan. ¹⁰ Wix na nakmawkaya ama niku lhkuyukan lilakgatayan chu putum xlimakaskuju. Wix namapapitsiya ama pulhkuyun kinpalakata chu lu xasanto nawam kinpalakata. ¹¹ Na nakmawkaya pumakgachakgan xa bronce chu nachuna niku kaxwi, chu namapapitsiya kinpalakata. ¹² Wix nakalitana Aarón chu xlajkgawasan anta niku laktanukan chiki niku kit jkatatastokgan chu nakalipaxiya chuchut. ¹³ Wix nalimalhakganiya Aarón wa ama tlakgat nikuma mapapitsikanit kinpalakata. Kakgmoka aceite chu kakimapapitsini chu kiskujnilh la kimpalakachiwina. ¹⁴ Wix nakinkalitaniya xlajkgawasan chu nakamakwaliya tamakgnu. ¹⁵ Wix nakakmawkaya aceite la akgmawka xtlat xpalakata nachuna xlakat kinpalakachiwinanin nawankgoy. Uma liakmawkan aceite nakakilitaxtuni akgtum xa xlipan palakachiwinanin. ¹⁶ Wa uma tuku tlawalh Moisés, xla putum tlawalh nikuntla Puchina limapaksilh. Xla putum makgantaxtilh. ¹⁷ Chuna cho wa ama chiki niku tatastojkan Puchina kaxtawi nak xapulana xkilhtamaku nak xapulana papa' anta nak xliakgtiy kata lata xlakan taxtukgocha nak Egipto. ¹⁸ Moises kaxtlawalh ama chiki niku tatastojkgan Puchina, walilh xmatsukit anta niku x´an, kawalilh xakglhna, kalakgmanulh xlikan, chu kawilinilh xchayat. ¹⁹ Xla kaliakgtlapalh tlakgat chu kaliakgtlapapa amaktum tlakgat, la Puchina limapakgsilh. ²⁰ Xla tiyalh ama xa pakgtum chiwix niku xtatsokgnit limapakgsin chu katamaknulh niku makikan talajkaxlan. Xla na walinilh xchayat pumakin talajkaxlan, chu akstiwalinilh xlikgalhtlapa ama niku xwalikan xkgalhni lilakgatayan. ²¹ Xla limilh xpumakin talajkaxlan nak xpulakni chiki niku tatastojkan Puchina. Chu xla walilh lilakgatlapan xpalakata namatsekga xpumakin talajkaxlan. La Puchina xlimapakgsinit. ²² Xla tamaknulh puwey nak xpulakni chiki niku xtatastojkan Puchina, walilh nak xpekgxtun, nak xkilhtin talakgatlapan. ²³ Xla kaxwililh kaxtilanchu nak puwey, xla Puchina xlimapakgsinit. ²⁴ Xla natamaknulh xputawilh cera nak xpulakni chiki niku xtatastojkan Puchina, xkalhpatu putawilh, nak xpakgalhu chiki niku xtatastojkan Puchina. ²⁵ Kamapasilh pumakgskgo xlakatin Puchina, chuna la Puchina xlimapakgsinit. ²⁶ Xla tamaknulh pumaxinin nak xpulakni ama chiki niku tatastojkan Puchina nak xlakatin lilakgatlapan. ²⁷ Lhkuyulh muksun limajinin, chuna la Puchina xlimapakgsinit. ²⁸ Xla mawkalh litalakgatlapan anta niku laktanukan chiki niku tatastojkan Puchina. ²⁹ Xla walilh pulakgatakilhputan anta niku laktanikan chiki niku tatastojkan Puchina. Lhkuyulh anta lilakgachixkuin chu taltsi nikuma lilakgataynankan, la Puchina xlimapakgsinit. ³⁰ xla nakaxwililh pumakgachakgan nak xlakgstipan chiki niku tatastojkgan Puchina chu pulakgatakilhputan, chu xla mujulh chuchut anta nukuma limakgachakgankgan. ³¹ Moisés, Aarón chu lajkgawasan xmakgachakgankgoy chu xtatuchakgankgoy anta. ³² watiya lata xlakan xamakgolh tanukgoy nak chiki niku xtatastojkan Puchina chu lata xlakan xankgoy nak pulatakgilhputa. Xlakan xlakgchakgankgoy, la Puchina xlimapakgsinit Moisés. ³³ Moisés kaxwililh tankilhtin nak xlakgstipan chiki niku tatastojkan Puchina chu pulatakgilhputa. Xla walilh litalakgatlapan anta niku laktanukanacha tankilhtin. Wa la uma, Moisés limasputulh xtaskujut. ³⁴ Chuna cho pukglhni litatsamalh ama chiki niku xtatastojkgan Puchina, chu Puchina limasiyalh pi anta xwi niku xtatastojkgan. ³⁵ Moisés nilay xtanuy anta nak chiki niku xtastojkgan xpalakata pukglhni xlitatsamanit, chu xpalakata linka xlitasiyanit Puchina pi anta xwi. ³⁶ Lata pukglhni xtapanuy nak chiki niku xwi Puchina, xkachikin Israel xtlawanparakgoy. ³⁷ Chu parwa pukglhni nixtapanuy, chuna cho kachikin nixtlatlhawan. Xlakan anta xtamakxtajkgoy watiya ama kilhtamaku lata xla xtapanu. ³⁸ wa xpalakata xpukglhni Puchina xtolay xakgstin chiki niku xtatastojkgan ka kakuni, chu klhkuyat anta xtolay katsisni, nak xlakatin putum xkachikin Israel lata xlakan xtlawankgoy.