¹ Gaswiro gogne (Tyenwa Aswiro pogirewanatachri wa Gindiawpotuko gowukpotni wa rapokikolu Getyopiya pixka, ga wa satpacha gepimole prowincia pokchi), ² Wale gogneka wa Porigirchi Gaswiro pogirewatyawaka tuplanata girukotkaluru Sosaya. ³ Mapa walapu pogirewatinritka, tsru niklewlu kamruta pejnuruneko solalone pogirene ga wa wayegrene-yma. Ga wa solalone Persya gajene ga wa kapokotu pokchi, ga wa tsru gitakalune kiglerune wale prowinsya pokchikakaya gwanatachine wale getanuya. ⁴ Wale gekakgitlu ponikowle ga wa ratajnu pogirewle ga wa rumuwle-yma wane pnute tseruwnaleya gixo gogneya, satpacha yokgipmole gogne. ⁵ Waneklu poyagkakinitka wale gogne, Pogirchi gigkakletlu tsru niklewlu ga wa payokgipre gogne potuko. Pejnuruneko yine Sosa pogirewatyachine gwachine pejnuruneko tsrune ga wa mturune mpogirene. Wa pogirchi putu kagwuru rutakyawakna wane ruknokakyaluna. ⁶ Kagwruru putu gigletkalurutkani wapgu rutakluna kortina yegi ga wa pakni, kamapitsatkaluru wale potu ga wa porpora yapjetkaluro, gixripatachro sato yoshmakamyojrechi wa sroschi ga wa kaknalu sotlu kamrutikaluru. wanenanru satu tuplapije kori ga wa sroschchi wa sotlumta gwachine wa mosaico wa profirio marmol wa perla ginro (nacar) ga wa atokine. ⁷ Kori stonoya gitspakikalurni wa girkaluru. Satkaka girapistono satkaka-pjero ga wa wanenro gixo winga kiglero ga wa pogircchi genekashlewata. ⁸ Winga runitkana wane tukyaluna shinikanchi poyagkakanrupna: "Gi wa ptowutlewatanu." Gi rixanu Pogirchi gitakatkalu pejnuruneko pogirchi-pji gwachine rayinerutene chanixkalune galukyawaka rixanna. ⁹ Wala koxa pguro Wasti chanixna tijxe suxone tsru niklewlu yegi wa pogirchi gwiyawaka wa pogirchi Gaswuro yegi. ¹⁰ Wale gogneni payokgipre, jeminitkalu pogirchi wa raji rumjikpotuta winga chinanu, wane chinru wa Mehuman, Bitza, Harbona, Wikta, Gawakta, Zetar ga wa Karka (Wanyi payokgipre solalone pogire pogirchi getanu gitspakanatachine. ¹¹ Ranikyegityaplona wa pguro Wasti tsagytate-yma kigler potu. Wale galuka gekakgiretna yine ga wa solalone pogire wa tuglenu chinanu, gi rixanu kiglen gixachroni. ¹² Seyni, wa pguro Wasti nutatlu wa pogirchi gitakanru tokanchi solalone pogirene pwapjixlo. Giyagni rumtuwnapotuta Pogirchi, ga wa jigekannu galgachri pixka rixya. ¹³ Giyagni wa pogirchi repomgana yine ginnanwa gimatkalune kgimataklerune rixinrina, gimatlewjenatachine-tka (gi rixanu tyenwa gomkaginatachri wa Pogirchi kamrutlu psoluko walenunanni galpokotachri wa yonatkaluruya ga wa giklukanuwnaluya). ¹⁴ Xani, wa pogirchi stsi gwanatachine wannani Karsena, Setar, Gatmata, Tarsi,, Mere, Marsena ga wa Memoca, wa nyinwa payokgipre gitsrukachine wa Persya ga wa kapokotu pogirchi gruko . Wannanwa pogirchi giynumsajenatachine ga wa kamrujenatlu pogirchi china towutletyawakna. ¹⁵ Wa poyagkakikolupa yokanatkaluru, ¿Gimka tixpokotanu wa pguro Wasti gi wa taluka jemletlu pogirchi Gaswuro gitakanru tokanchi, solalone pogirene ganikyegityalo? ¹⁶ Memuka wane china pogirchi getanu ga wa solalone gistrukatene: " Gi wa pogirchipje tyoptopirata wa pguro Wasti mugletu tkamruta, seyni koxa pejnuruneko gitsrukachi gitakalune ga wa pejnuruneko yine wa pogirchi prowinsyate wa pogirchi Gaswuro. ¹⁷ wa pguro kamrure patako xani tujxe suxone gimatlo. Tkamrutanru wala tutaklu wa ganurunepni wa saletkalunenapa. Wala wane chinanu: "Wa pogirchi Gaswuro gitaklu wa pguro twapikolupa wale yegi pogirchi, seyni wala gi galuka" ¹⁸ Seyni ma nukawniniwa wale gogne, wa suxone kiglerone wa Persya ga wa kapotu pogirchi gruko ginnakta jemanatachine pguro pirana, waneko pixka chinanunna wannapni pejnuruneko pogirchi gitakanune gitsrukachine. Waneplu gi wa ralukonna ga wa jgekanchi. ¹⁹ Gikta xani rugitanu wa pogirchi, nanjityi pyokanatyaplu tokanchi gitakaluru pixa chinanu, ga wa yonatkalurupni tye tokanchi poyagkakalurupa wa Persya ga wa Meda, gi wa kowjetko, wa Wasti gi wa tunanutka pixa-stsi. Wa pogirchi genekanro tkamrure sato suxo pguro wala pnute kiglero. ²⁰ Yonatkaluru pogirchi gitakanru gipgujetkalurupni psoluko pogirewatyawakaya, pejnuruneko ganunronna kagwakpiratanna ganurunna, tsrune gitakalune ga wa mturune mpogirene". ²¹ Wa pogirchi ga wa solalone pogirene gimuwatachine wa tye giykoluya, ga wa pogirchi kamrutlu Menuka kamrutanru. ²² Wale yokanatlu kiruka psoluko pokchi, wa satkaka prowinsya wannako tokanu-yma. Wale gitakna satkaka yineru gipjineko pixka rixna. Wa tye gitakaluru yonga reneekanna wannako tokanna satkaka pokchi pogirewle.