¹ Ne nexarahɨawe, anemekɨ, iwamarixi, Kakaɨyari aixɨ tiuka iyarikɨ, xekeneyuyatuaka yu waiyari ayeyurime hapaɨ, aixɨ xe anenetɨ, Kakaɨyari mitaneke'erienikɨ. Ikɨ yeiyari kananyɨneni. ² Pɨ xekwate yu iyamatɨaka kwiepa ti mieme, paɨta xekeneyuhekwariyani xeyunuiwitɨatɨ tsixekateyu'iyaritɨatɨ yu mu'utetsie. Ikɨ pɨxeketeneyurieka tita aixɨ ti ane, tiyunake'erietɨ, aixɨ ti anetɨ Kakaɨyari hepaɨsta. ³ Netsɨ pɨnexetahɨawe, imikierikɨ ne tiumikieka, xeme xeyunaitɨ xeyukanieritɨa yu hetsie xekwayu'iyaritɨaka waɨkawamekɨ yu hetsiekɨ iyaritɨarikakɨ. Xekeneyukuxexeiyani, xeme aixɨ anemekɨ xetenemaiwaweni, Kakaɨyari kexeti yatuiriekɨ xeme xeyuxexuime, ketipaɨmeme inɨarietɨ yuri xete'eriekakɨ. ⁴ Tametsɨ tewarexeiyani yuwaɨkawame temaya'utsie xeime tewiyari tehɨkɨ, tsepata teyunɨ'ɨ xei tewi tekwayɨwe tetekumayɨani yaxeikɨa tiuyɨneme. ⁵ Ya xeikɨata anemekɨ taame, keteyupaɨmetɨ teyuwaɨkawa, tehɨkɨ Cristo waiyari, tehɨkɨtexi teyuxexuitɨ teyunɨ'ɨ hipatɨ hipame wamatɨa. ⁶ Tame tepexeiyatɨka yukɨti'aneneme tete'uyamatetɨ tita imikieri teteyatuiriyarie. Xɨka xewitɨ tiuyamaika kentiyɨni mautihane, paɨketiuyurieni heyemekɨ ketimariwemekɨ yuri ti'eri. ⁷ Xɨka xewitɨ tiparewieka, xehayawani ketiparewieka. Xɨka xewitɨta ti'ɨkitɨaka, xepitɨaka keti'ɨkitɨaka. ⁸ Xɨka xewitɨ heixeiyani wayatɨrɨkareni niukikɨ, xepitɨaka paɨmaineni. Xɨka xewitɨ tiuyukanenimayaka tiwaritɨ, xehayawani ketiwarini katiwawawirienetɨ. Xɨka xewitɨta warahanani, pɨketiyurieneni yu ɨwiyatɨ. Xɨka xewitɨ hexeiyani tiyunɨwatɨ, pɨketikamieni yu temawietɨ.

.

⁹ Xeuyupitɨa yexeteheuyu'eriyatɨ kataku tsiranyɨnemekɨ. Tsiranyɨne waxeteheukahɨatɨ; xeuhurani titatsie aixɨ ti ane. ¹⁰ Xeyu'iyaritɨaka paɨta yexeteheuyu'eriyanikɨ iwamarixi, palekumekɨ hipame wamatɨa tsepa ke ane. Xekayutawe'erietɨ palekumekɨ xeyuxeiyatɨ tsepa ke ane matɨa. ¹¹ Xeyuɨwiyatɨ kataku tsixe'u itɨarieni, xekwayu ɨraraxieka; xeyuɨwiyatɨ espiritutsie, xeyukwerietɨ. Xeyuɨwiyatɨ ta Ukiyaritsie, xetene uximayatsieka. ¹² Xeyutemamawieka xetetakwewietɨ xehauti'ikwewatɨ yuhetsiekɨ tukari mautihane. Xeyu'eirieka titatsie tsiranyɨne. Xetineikani xeyunenewietɨ. ¹³ Xeteparewietɨ tita reuyewetse ke hate yuri mete'erie wahetsie. Xeutiwawa heyemekɨ kehapaɨtɨtɨ aku yeikame memankukutsuni. ¹⁴ Xewanenimaya aku ke ane mexe uweiya, aixɨ xewayurieka nita xikwawawawirieneni. ¹⁵ Xeyutemamawieka ke ane aku iyamexi meyutemamawie wamatɨa; ke hate ta memutitsuana xeutitsuanani wahamatɨa. ¹⁶ Ya xeikɨa xeteneku'eriwani xeyuxexuitɨ xeimekɨ. Ni xekateyukuhɨawetɨ kename xetehexeiya, paɨta xewanake'erieka teɨterixi tixaɨ mekwatehexeiya. Kwinie tewa xekwayuka uitɨaka kename xetemaiwawe. ¹⁷ Hipame watsie xekwatehanunuitɨwani tsiranyɨneme. Aixɨ xeketenekahuni teɨterixi wahɨxie yunaime. ¹⁸ Aku xɨka reuyɨweni, xeme xeyuxeɨmakani, kaiwatɨ xeumakani yunaime watsie teɨteri. ¹⁹ Xeme ni xekwate uyukɨhɨwiriwani, xeuyunake'erietɨ, xɨka paɨxe aneni Kakaɨyari xetikwinitɨani. Xete akumate pɨreuku'uxa: "NE NARAKUHɨWIRIENI, NERAYA ATɨANI" ta ukuyari paine. ²⁰ "XɨKA METSI'AKAHEKA HAUHAKAMɨKɨNI, KE TEUMIKWA. YATA REUHARIMɨKɨ, NEUHARITɨA. IKɨ PAɨ PEXIKATIKAMIENI, EKɨ A MU'UTSIE TɨXARI TAITSIE MIEME PENEIKAYATSAKAMɨKɨ". ²¹ Kataku pe'a iwarieni tsitsi'anekɨ, paɨta kena'iwa tsiti'ane aixɨ ti'anekɨ.