¹ Paulo, nanteko a Yesu Kristo, owihaniya eira akhale nrumei, wira alaliee Ehapari ya Muluku, ² Yooyo ahonkhuluveliha eriyari Yomaprofetaawe mo Wantikhiya Tjettakattiifu, ³ mwaha Yomwanawe, waale nikhoto na Davi, ⁴ mwaha wohihimuwa mokhwani, Yena ahohimiya nakuru Mwaana a Muluku mwa N'nepa wowittakattifiha, Yesu Kristo, Pwiyeehu. ⁵ Mwaha wa Yena, hin nihakhela mahala ni nrumei wo winwelela wo waamini mweelapo tjoteene, mwaha wo Ntjinanawe. ⁶ Mweelapotjen'nha, ninhu n'hihaniya wira nkhale mwa Yesu Kristo. ⁷ Oteenewinhu, ofentiya ni Muluku nri oRoma, ni nkhanle owihaniya wira nkhale attakattifu: mahala ni nrettele, mphantti wa Muluku, apaapehu, ni Pwiyeehu Yesu Kristo. ⁸ Wopatjera, kinansukhuru Mulukuaaka, eriyari wa Yesu Kristo, oteenewinhu, kontha waminiwinhu ehohimiya etuniya yoteene. ⁹ Kontha Muluku, Yoole nonvarelaka nteko mwin'nepaniwaka tjoHapari yo Mwanawe, enamoonaaka ntoko tjimpankaaka wohimumula kiwuupulekani. ¹⁰ Mvavekeloniwaka, kilepelaka wira, womanan'na, wonayeeli othuna wa Muluku, mi kikhale kiwotolakani. ¹¹ Kontha kinaapheela owonani, wira kikhele mphantti ninhuu evaheriyo yomwin'nepani, wira nkhale olipiheriya, ¹² eyo piiyo, wira nkhale olipiherana yaayoru, mwaha wowaamini wakuta nthu, wawinhu ni wawaka. ¹³ Ni akimphela, assun'naka, wira nkhotte ekwaha tjintji tjimphelaka owootolani (massi mpaka n'nava kihokhottihiya), kiphelaka ophwanha eriyariwinhu n'hokorokho, ntoko amalaponi. ¹⁴ Mi kinkhala nthu olokiha okhuma ma grego ntoko elapo tjookhopela, okhuma atjuwelatji mpaka ohithuna. ¹⁵ Pimana, wari mi, kirir thayari wira kilaliee ehapari hata nhu nri oRoma. ¹⁶ Kontha mi akinonela ehaaya Ehapari, kontha eyo eri ekuru ya Muluku yo woomopola wa yoole nothuna, wopatjera para maJudeu phuwaaka magrego. ¹⁷ Kontha waYena essariya ya Muluku enamuithoonha, wowamini ni wamini; ntoko tjantikhiyaaya: "Nassariya nkookhala nuwaamini". ¹⁸ Kontha otjatja wa Muluku ehothonheriya wiirimu aakhottela yaale ankhottiha ekhweeli eriyari yoohissariya, ¹⁹ massi eri yotjuweliya mwaha wa Muluku eri yowoonia wa yenani, kontha Muluku n'naathonhihera. ²⁰ Kontha Makhaleloaawe ohonia, ventjiventji Ekuruaawe yohimalatho ni makhaleloaawe owiirimu, ehokhala ethoonheriyaka okhuma wapattussiyaaya etuniya, nlatto wa tjithu tjipankiye. Pimaana, ayena ari ohileveleliiya. ²¹ Kontha, yeriyaka yanathuwela tja Muluku, Khayaahala onttittimiha ntoko Muluku, wala Khanvahale mahala. Ehiyeeyo, ahokhala matirikhi m'mupuweleloniwaya, ni mirimatjaya tjihokhala tjoripelihiya. ²² Yitjonaka okhala atjuweli, ahokhala atirikhi. ²³ Ayena ahakakhaniha waria wa Muluku yohirimeela ni natarato yolikanatja ni nthu yorimeela, walani ntoko enuni, enama yometto mitjesse ni tjowiipurula. ²⁴ Pimaana, Muluku ahava tjithu tjowatjivela wanrimaniwaya wira atepeke oraruwa, wira ahirattavenle eruthu yaayoru. ²⁵ Pimana ahakakhaniha ekhweli ya Muluku nuwootha, ekokhorelaka ni evarelaka nteko ekhiyumpi wa nipuroni wa Muluku, wa yoole orerihiya mahuku oteene. Amem. ²⁶ Pimaana, Muluku havahatjera tjithu tjowonihatja ehaaya, kontha, athiyanaaya ahakakhaniha tjithutjaya tjon'hina wa tjithu tjikina tjovirikaniha etuniya, ²⁷ hata alopwanaayo ahohiya watana nathiyana ni ahiiparihela wophela oraruwa yaayoru, nlopwana ni nlopwana, apankaka eri yohiloka, yakenlaka vekhatjaya nttarusso mwaha wa tjonhalatjaya. ²⁸ Ni nlatto wotanhifu otjuwelatja wa Muluku, mwaneene Muluku haavaha mupuwelelo ohiloka, wira avareke tjithu tjihiri tjawaya. ²⁹ Ari otjaria ni parakha tjohissariya, orimeela, tjoonhala, otjaria nttima, onan'nhatha, ohinwananatja, othepianatja ni tjithu tjohiloka; ³⁰ ari athu owaapa, otanhifu, awanani a Muluku, anamatuphela, ohiloka, owikukhuliha, ohimia tjithu tjohiloka. ohiwinwelela an'napaapaaya, ³¹ ohupuwela, ohikettelo, ohinwatjera nkhwaaya ni khaanakiriri. ³² Ayena antjuwela nttarusso na Muluku, ni wayaale ampanka tjithu ntoko n'nha athu owaphwanela okhua; massi kahi pahi yaale ampanka, hata yaale anlawiha tjithu tjipakaaya.