¹ Ni Yesu ahowirelatja: ''wekweli kinawuhimeryani, akinaku ari vamotja ni nhu ni ari vava kanrwaa onlawiha nokwa ahinona o pewe wa nluku wawaka ni kuru''. ² Anavirale mahuku sita, Yesu ahonkusa Pedro, Tiago ni Joao, ni ahakusatja opuro nkina vatjulu mwako. Vano ahirukunisiya onari nayenatja. ³ Ekuwotjawe tjaharya, tjahothela, othela ventji ovikana ethu pithu yotheliha yowatuniyaniva. ^{6 4} Vano Elias ni Moises yahon'welatja yahomulumanatja Yesu. ⁵ Pedro ahakula ni ahomwirela Yesu: ''Rabi, woorera okala hinnhano va, niteke marapatha mararu: nimotja nawinhu, nimotja na Moises, nimotja na Elias'' (Yena kaatjuwela yowuluma mana yari owopopihatjiya). ⁷ Nihuthe nimotja nahowa wakunelatja. Vano ntjuu nimotja nikumaka nnihutheni niiraka: ''Oyo mwanaka nonfentaaka, Yoyo nmwiwe''. ⁸ Nananoru, yawehatjalyaya,kayamonatjale nthu nkinaku naayena, wahukala Yesu pahi. ⁹ Yakuruwa omwakoni, yena ahowirelatja wira ahin'himere nthu ethu yonalyaya, mpaka mwana athu wanrwawe ovuwelela eriyari wa thu okwa. ¹⁰ Vano yasunka yeyo nasinenyaya, masi yanthikinihiya manaya: ''Ovuwenla eriyari yathu okwa''. ¹¹ Ayena yahonkohatja: ''Kontha esiyani anamalepayo enirelaya Elias ohana opatjera owa ?'' ¹² Yesu ahakulelatja: ''Elias kweli ohana owa wira arerihe tjithu tjothene. Vano elepeliyeni wira wana nthu ohana ohawela tjithu tjintji ni atanhifyiyaka? ¹³ Masi mi kinamuhimerani wira Elias ohowa, ni ahompanka yanphelelaya, toko tjitjammo tjin'himya tjolepiya mwayena''. ¹⁴ Wahokolenlyaya opuro waryaya arumeyi akinayo, yahowonatja athu entji anarukurenrye, ni anamalepa yanhakulihananaka. ¹⁵ Ni athwale wa monalyaya , yahokala othelatjiya, ni yahonthawenlatja wira yankomatje. ¹⁶ Yena ahakoha arumeyawe: ''Nnanhakuliherana eseni ayena?''. ¹⁷ Nthu mmotja ari nathwale ahakula: ''Mwithutjihi, mi kohuwanea mwanaka; Yena ohana nnepa onon'hiha wulumatja. ¹⁸ Yoyo onanthukumelihatja, onankupha, ni yena onakumiha niphoru vamalakuni, onakura mennwawe. Mi kihalepela arumeyaa wira yomole, ayena kakwitinri''. ¹⁹ Ni yena ahowakulatja: ''mphwinko wohikupali, mpaka yakani Mi kinrwaka okala ninhuu? Mpaka yakani kinrwaka wovilelani? Nkiwanelatje minnhano''. ^{20 21 22} Ayena yahon'wanelatja nsilopwanoyo. Nnepole omonalyaya Yesu, nananoru wahonthethemeliha. Nsilopwanole ahovuluwela vathi arukureraka mmalakuni akuma niporu. Yesu ahakoha apapawe: ''Thanku yakani yena oryawe tjoo? '' Apapawe yahera: ''Okuma enamwanyawe. Ni okati mwintji onanvonhera vamoroni walaa mmatjini, ni onaphela onkwanhula.Wakala wira nnakwitiri opanka ethu, nnonele ekiriri, ni nnikavihere''. ²³ Yesu ahomwirela: '''We wakwitiri! 'tjithu tjothene tjinawiranyaa wa yole onkupali''. ²⁴ Wowakuvyatjene athumwane mwanole yakuwela yiraka: ''Mi kinakupali! Nkikavihe ohikupaliwaka!'' ²⁵ Yesu wawonalyawe athwale athawenlaka waritjaya, ahomola nnepa wothakalole, nerelaka: ''Nnepa wohieiha ni wohulumatjiha, mi kinawirela: Onkume yena, ni ohinkele totho". ²⁶ Ni ahokuwe ni ahonthukumelihatja nsilopwanoyo vano hankumawe yena. Yena akala nthoko nookwa, mpaka athu entji yeera: ''Yena hokwa''. ²⁷ Masi Yesu ahonkusa nintata ni ahinvusa, ninnsilopwanole ahemela. ²⁸ Yesu wakenlyawa mpni, arumeyawe yahonkohatja mphantheru: ''Kontha esiyani nhoomolaka nnepole?''. ²⁹ Yena aherelatja: ''Ela enannela kinomoliya wohikala nuuswali". ³⁰ Akumaka nwe, yaviratja o Galileya, ni Yesu kaaphela wira akale nthu arwaa otjuwela opuro waritjaya, ³¹ Mana yena anasomiha arumeyawe ni erelaka: ''Mwana anthu onrwaa ovahenriya nmatatani wathu, ni ayena anahala omwivatja. Vano yena enviyaka anavirale mahuku mararu onarwaa ovuwenla''. ³² Masi ayena kayatjuwelelatjale nna nulumonna ni yanamova onkohatja. ³³ Yahirwatja mpaka o Cafarnaum. Vano yena waryawe wathokoni ahakoha arumeyawyayo: ''Munnhakuliherana esiyani niiphirweyo?. ³⁴ Masi ayena yahokalatja omalatja, mana yolumatja yayooru niiphiro wira antjuwelatje tipani arii mulupale. ³⁵ Yena phonkomawe, hawihanawe ookumi neeli ni hawirelatjawe: ''Nthu aphela okala opatjera, ohana okala omalela ni nantheko athu othene''. ³⁶ Yena ahonkusa mwana mwankani, ahomwesa eriyaryayatja, ni ankusaka nmyononi wawe, herelatjawe: ³⁷ ''Yoole onrwaa omwakenla mwana nmotja ntoko ola mwa ntjinanaka, yoyo onkakela minnhano tjitjanmo, ni akala wira onakakela, yoyo konkakela minnhano, masi omwaakela yole okivahenrale''. ³⁸ Joao ahomwirela: ''Mwithutjihi, hi nihomona nthu omolaka amokwasa mwa ntjinaninhu ni nihon'hiha, mana yena kannithara''. ³⁹ Masi Yesu ahera: ''N'hakothihe. Kontha kuvo onpanka mitikiniho mwa ntjinanaka ni uholo orwa okuluma phusya. ⁴⁰ Nthu ohiri mwinanihu, ori ni hinnhano ⁴¹ .Nthu phinthu onrwaa wovahani matji owuriya mwaha wokalatja a Cristo, wekweli kinamuhimeryani wira kanrwaa ohalela ethuvwawe. ⁴² Nthu pinthu onrwaa onrimeliha nmotja nmotja wo yala anamwane ankikupalyalava, aphwanela othukenliya nluku nuulupale nsikoniwawe ni oriheliya npahari. ⁴³ Nakala wira ntatanaa ninamupankiha etampi, othupulele ota. yorera okela we mwiikumini ni ntata nimotja noothipuwa ovirikana okalana matata oomeli ni orwaa omotroni, omoroni ohinthiphyaa. ⁴⁴ ( Opuro asinthuthu ohinkwaya, hata moro ohinthiphyaya). ⁴⁵ Nnhanaa nopankiha etampi, othilele ota. Yorera okela mwikumini wathunpelaka, ovirikana okalana manhaa omeli, ni orwaa ovonheri omoroni. ⁴⁶ Opuro asinthuthu ohinkwaya, hata moro ohinthiphyaya. ⁴⁷ Nithonaa noothekiha, okumihe. Yorera irii okela upewe wa Nluku ni nintho nimotja, ovirikana, okalana mentho oomeli, ni oriheliya mmoroni, ⁴⁸ opuro asinthuthu ahinkwaya, hata moro ohinthiphyaya. ⁴⁹ Kontha wo kula nthu onrwaa olukiya ni moro. ⁵⁰ Makayo to rera, masi makayo yahikalane otjivawaya, vano munrwaa oluka tjani totho? Nkalane maka mwasinenennhu, ni nkalane nrethele nyhu ni nkwawe''.