¹ Waataana woopayjera waari woothonkomanihiya wo swaii ninipuronaya novatthi. ² Vano yaahothonkomanihiya ekeretja, n´hinawaya, mwinsaatthiya epirikha, maatji nimkatthe tjooreerihiya, niihaniya nipuro nooreera. ³ Ni, othuliwaya ekuwo yonapiili, yaahaavo esaala ekwaawe, niihaniya nipuro thakathiifu nomathakathiifu. ⁴ Yaarina altaari owooru wa tjithu tjoopahiya ni yootekiya yowaataaniha, yooteene yooheliya ewooru. N´hinawaya yaahaavo etjaaro emotja yowooru yooheliya manaa, nkopo wa Arao yaaphuwale niitthaapwa tjowaataana. ⁵ Watjuwaya enupa, yaahaavo malaikha owaarya yaathiyenlale weemwaneene. Tjithu tjen´nha, khanimpwanela, vano, ohimyakatjera. ⁶ Waathomkomanihiyaaya tjen´nha tjithun´nha, anmkutho yaahokela mkeretja yokhalayi, wowiira ahoolele. ⁷ Vano esaala yonayeeli nkela mkhulupale aanamkutho paasi, emaara emotja wakhula mwaakha, ni khaakela woohiphome, waavahenraawe wa yenani ni yaale athu yaatheka woohitjuwelela. ⁸ N´nepa nthakathiifu khuthunale otthoonhihera wira nthala wo nipuro nooreera ohikhale wootthoonhiheriya, waakhalaaya wokeretja yoopatjera. ⁹ Yeela yaari etthoonhero emotja wookatthi oriihu. Tjoovahiya nimikutho tjiniira tjivahiyaka nen´nava, khatjinkhala tjoopwanela nimuupuwelelweehu mooswlini. ¹⁰ Wotjithu tjen´nha tjiri tjooruma n´namani, tjinkhala paasi tjomuulyani, moovuryani ni tjithu tjintjivihatjera mwa tjoowariya, mpaka oruma wonaanaano okhaleke ohooliyaka wanipuroni. ¹¹ Masi kristu waale toko, mkhulupale aanamkutho wa tjooreera tjooholo, hiivahenra niikeretja yoohikosa, ohipankiye nimatata apinaatamu, eyo phiiyo, oohiyariya etuniya yeela. ¹² Woohivaheenra niiphome yopuri ni yomope, masi wophome ya kristu, ekenle wooreera waathu, ooreera, wonan´na emotja wooteene, enkhalanaaya oleveliyawihu woohimala. ¹³ Konttha, wakhala wira ephome yopuri ni yomope ni ovavaryaatja wothuura yomope wo yaale ari nimahirihiri oomwalaniha wamkuku, tjikhalaka eruthutjaya tjoohimahirihiri. ¹⁴ Ventji tjinene ephome ya kristu, yon´nepa woohimala hiivahenra emwaneenyaawe woohitafaawuti wamluku naarapiha eyuupuwelelweehu womiteko tjookwa wowiira ninvareleke nteko mluku mkumi. ¹⁵ Wosariya yeela, yenani ekhanlyaawe mwaakiha wowaataana wonaanaano, weeriyaryaawe wuukwani, wira afutje tjootheka waale yaathekale waataana woopatjera, owiihaniya akhale yaakhenlaka yaakhuluvelihiyaaya wa nikhoto noohimala. ¹⁶ Phimaana, nipuro niri waataana, onoonanyaa wira oholawihiya okwa wanthu owaataaniha. ¹⁷ Konttha waataana ori paasi woopwanela eriyari wookwa, okhalaka woohipwanela nari nkumi naataaniha. ¹⁸ Phimaana hata waataana woopatjera waari woohiphome. ¹⁹ Tjitjon´mo Mosi waavahalyaawe mlamulo waathu ooteene, yenani aakusale ephome yomaana, nimaatji niilaa yooseerya ni aahotatthela eliivuru waathu ooteene. ²⁰ Yiiraka: "yeela phiiphome yowaataana yeeyo mluku erumalyaawe". ²¹ Weenan´na emotja, yena aahothikithela ekeretja nitjithu tjaaswalaniya. ²² Ekethelo tjeethiheraaya, woophiyera tjithu tjooteene tjinreeriha niiphome, ni woohimwaryaa ephome khuuvo olevenliya. ²³ Waanaapwanela, phimaana, tjthu tjowiirimu tjinkhala tjooreerihiya ni tjooveleelihiya weenan´na tjen´nha, ohiya vaa, tjithu tjowiirimu, womwaneenyaaya, tjikhaleke wooreerihiya, nimkutho womantjira. ²⁴ Konttha kristu khakenle nkeretja yootekiya nimatata, wowiira ekhale elathanihero yokweeli, masi, wiirimu, nen´nava mpwanhanyaa wamluku wo hii. ²⁵ Yenani khkenle wiirimu wiira iivahenre emaara tjintji, toko tjinpamkaawe nkhulupale anaamkutho, nokela nipuro thakathiifu nomathakathiifu, wokhula mwaakha niiphome. ²⁶ Waari tjon´mo waakookhala wira yenani ahuveke emaara tjintji nen´ne epathuseriyo etuniya. Masi nen´navaa, emaara emotja paasi, homalihera mahuku ooteene, ekhanle wira yenani aahooniheriya wira atamihe etampi eriyari yohiivahenra. ²⁷ Tjitjon´mo toko athu ooteene wamkwaaya weemaara emotja paasi, ni ohoolowaya eweeke ehukhumu. ²⁸ Tjitjon´mo kristu, khnle oovahenriya emaara emotja paasi wira akumihe tjootheka tjaathu, naahala owaattho ekwaha yonayeeli, wira awoopole yenani yaale anaawehenraawe.