¹ Vano, nahiyaka yinthutjalehu wupatjeroni mwaha wo Nulumo na Muluku, nihaana nikelelaka wuttokothani. Nihirihelaka, ewora ekinaku, eyinserero yo wituthuuwa tjo miteko tjookhwa ni wamini mwa Muluku, ² nusomhiya mwaha wompatisso, nu wesereriya matata, ohihimuwa waathu okhwa ni olamulia woohimala. ³ Ni hivano ninaapanka n'nha tjithun'nha, Muluku athunihaka. ⁴ Phimaana, kun'hala wonania wa Yaale yapatjale omwaleeliya, alawihale evaheriyo tjowiirimu, ni yakhala wiira ahokhalela mphantti wo N'nepa Nttakattifu, ⁵ aholawiha wa nulumo noorere na Muluku, ni tjokuru wo mahuku an'hala owa, ⁶ ni amorale; wanarikarika wavusavusera wo wituthuwa. Kontha ahonkhomela wa yenatja, owakathi nkina, Mwaana a Mulukuuyo, ipankaka Yena ekaruma yohaaya wowoonania. ⁷ Kontha ethaya enakhenla epula em'mora ni enruweriha etjoolia wa yaale anvara nteko, anawaakhenla mareeriho a Muluku. ⁸ Massi yaruweriaka mwiiwa ni etakhua, kinvarelia ethu ni eri wakhiviru wo phela onanarihiya. Emaleloaaya opahiya. ⁹ Massi hivano nihokhala okupali wa tjithu tjorera mwaha wa nhuuva, assun'naka, tjithu tjowaatana nu wopoliya, hata nuulumaka manan'na yaala. ¹⁰ Kontha Muluku khanakhala ohinasariya wo eiira aliyale miteko tjinhu ni nfento nhuva nthonheralen'nhu mwa Ntjinanawe, mwa nen'no n'havarela nteko attakattifu ni n'hokhalatho mwaapankaka. ¹¹ Ni tjimpheleehu tjinene wiira wakuta nthu athoonhere manan'na yaayo orera mpaka wumaleloni, nukupali woomalela wo wehenra. ¹² N'hikhaletho athu ololova, massi otakiha, mwaha wo waami nu vilela, n'halane tjokhuluvelihiya. ¹³ Kontha owakathi Muluku opankaliaawe nkhuluvelihoaawe wa Abraao, mwaha wo hikhalana nthu mulupale wovirikana ni Yena wonlaphela, holapha mwaneneaawe. ¹⁴ Yena irale: "Wekhweeli Mi kinawureriha ni kinawintjenra ventji tjinene". ¹⁵ Manan'na yaala, Abraao ahophwanha yeele yakhuluvelihiyaawe nanrihalene nuvilela. ¹⁶ Kontha athuaayo anaalapha mwaha wa nthumulupale ovirika na yena ni wa tjen'nhe tjinwananaawe, ni malapheloaaya ankhala othuniya. ¹⁷ Owakathi Muluku waphelaliaawe othonhihera, wowonania, wa anamahalana tjokhuluvelihiya ni mareeriho tjihimpittikuwa wa emphelaawe, Yena hakhuluveliha nu lapha. ¹⁸ Yena pankale mwaha wa tjithu piilitjohipittikuwa, wa tjen'nho khunonania wiira Muluku nawootha; wo wiira hivano, nikhumaleehu nirweelaka tjothiawela, niphelaka okhaalana olipa nulipiheriya woophela onivara tjinene nu wehenra evahenriyeehu. ¹⁹ Nihaana ntko evarenlelo yolipa ni olipa onrohoniwihu ni enkhala ntoko eveu, ²⁰ nipuro Yesu, ntoko nthu nohoolela, kelale wa nipuroniwihu, akhalaka Nhoolelo anamukutho mahuku oteene, wo nayeeli nlamulo na Melquisedeque.