¹ Minyaano, tjitjan'mo, n'toko peretju wa Apwiya, kinohimeryani nhenhuvatja wera mweteke ni makhalelo orera wowihaniya mwakhenlen'nhyu, ² wera n'khaleke nowiyeviha, ni omala, ni ovilela, n'thunanaka n'kina nikwawe munfentoni. ³ N'pakeke yulupalesa wanhenhuvatja wera n'khaliheke nuwatana wo n'nepa n'hina munreteleni. ⁴ Eri eruthu emotja ni n'nepa n'motja, tjo n'toko tjitjan'mo nhenhuvatja n'rinhu owihaniya nowehen'ra n'motja n'khuluvelaka wihaniyawinhuwo. ⁵ Ni ri Pwiya n'motja, wamini n'motja, n'pattiso n'motja; ⁶ Ni N'luku n'motja ni papa athu otene. Yooyo ri athu otene eriyari yathu otene ni mwathu otene. ⁷ Mokhula n'thu ahin'yano hovahiya yovahatjeriya emotja aphimeliyaka tjovahiya ni Kristo. ⁸ N'toko tjihimiyaaya tjolepiya: "Owakathi yenani wenlyawe wirimu, hakusa athu othukiya, ni athwayo ahavaha tjovahiya". ⁹ Ehimya esiyani "Yenani howela", wohikhala wera yenani tjitjan'mo ahokhuruwela elapo yo vathi? ¹⁰ N'thu khuruwale thiyoole tjitjan'mo welale orattatjene otjulu wootene wo wirimu, wera amalihere tjithu tjottene. ¹¹ Kristu havaha akinaku wera akhaleke arumeyi, maprofeta, anamalaliya, ni akinakutho n'toko ahakheli, ni amwithutjihi. ¹² Yenani havaha mitekonha wera awarihe athwawe orerihiya wera alikanihere n'tekwaweyo, woteka eruthu ya Kristu. ¹³ Yenani n'lelo nera atekaka erutwaweyo n'paka nihin'yano ottene nikhalane watana wo wamini ni on'tjuwela mwana tja N'luku ni n'paka nin'halehu okhala athu okhomala n'toko yale amalihen're tjovariya tja Kristu. ¹⁴ Wo wera nihikhaletho tjinene n'toko anamwane an'khala attikheliyaka ottuli ni wera ohoolo wo mawinpi, okusiya wophiyo yootene yo winthutjiha, wolavilavi waathu, ni tjinarwanela athu ephiro tjomoroni. ¹⁵ Ohiya vaa, ulumaka ekweeli wonfento, hinyaano nin'khala nun'nnuwaka n'phironi moteene nirwaaka wa yenani, ori muru, Kristu. ¹⁶ Kristu naateka eruthu yootene, yeele eri n'khayi nuwatana wokhaviheriya phamotja ni owakathi, khula n'phan'tti on'varaaya n'teko wamotja, eyo enapan'ka erutwiyo wunuwaq nuwiteka mwanenyaaya mufentoni. ¹⁷ Tjitjan'mo minyaano kinahimiya yeeyo, na Apwiya wera hikhaleketho n'khalaka n'toko mapakawu an'khala, ni manan'na omupuwelwaaya. ¹⁸ Ayenatja ari mwepiphini ni mupuweleloniwawe yooyo, ni omwalana nokumi ya N'luku mwaha wokhotta orinaya, wo mwaha wolipihawaya mirimatjaya. ¹⁹ Ayenatja khanonatja ehaya, yivahen'raka moraruwoni, ni ayenatja an'khala n'lelo avaraka ethu tjottene tjo tampi. ²⁰ Masi kahitjitjan'mo mwinthutjalenhu ohisimwa wa Kristu. ²¹ Kinono wera n'hin'wa wa yenani, ni n'hokhala n'somihiyaka ni yenani, n'toko ekhweli eri mwa Yesu. ²² Nyu n'hithutja wirula eele en'panka n'phatti wo makhalelo okhalayi, on'rula n'thu okalayi, oola n'thu okhalayi ri ohiloka n'lattu tjotjivela tjoothepya. ²³ Nyu n'hokhala owinthutjihiya okhalihiya onanino munnepani womupuweleloniwawe, ²⁴ Ni n'warihiyaka wonthuonanino ori owunpiya ni elatarato ya N'luku,nasariya ekweli ni n'ttakattifu. ²⁵ Phimana n'hiyeke wootha ni n'himiyeke ekweli wa mwattamananinyu, kontha hyi niri miphan'thi n'motja nasikwawe. ²⁶ N'vonheke masi n'hitheke. N'hihiyenre wera nikele n'tjuwa mwaha woviruwawinhun'wo. ²⁷ N'hivahe okathi sotwani. ²⁸ Yoole yin'ya hin'yetho, haavo avaraka n'teko, apakeke tjithu tjorera ni matatawe, wo wera akhale owakharipwela wa yaale ottene othwen'ya. ²⁹ N'hin'hiyenre wera n'nakhala nulumo nottakhala nikhumaka mwanowinyu, mulumeke mulumo pahi an'khala orera wa wera mwateke akhwinyu, wo manan'na tjinphelaya. ³⁰ Ni n'hikasuwari N'nepa N'ttakattifu ya N'luku, wo yeele ekhalen'nyuokhuneliya yanvihiyaka nihuku nowopoliya. ³¹ N'hana n'napuwaka tjowawa tjottene, ekolera, otjatja, opwapwa ni oruwana, opitaniha wo tjithu tjootene tjottakhala. ³² Ni n'khaleke oreratja n'thu nin'kwawe, on'nema n'levelaneek n'thu ninkwawe, tjitjan'mo n'toko N'luku mwa Kristu olevenlalyaweni.