¹ Anga aripaduze wo mabhiko dzo mukati dzisina nbiriso, yai dhaindzwa pasika. ² Uye akuro womaphirisita, uye no anhori aitswaga gwandze rukuti amuraye, naizvona awona aithiya mbumba. ³ Uye sathani akapinda muDjuda waidhaindzwa Iscarioti, wanga ari umwe wo adzidzi wo gumi noairi. ⁴ Uye akaenda, uye akareketa noakuru womaphirisita uye no atongi, ngopamusoro waizodha kumupereka kudhini kaari. ⁵ Uye anya akadhara nazvo, uye akatenderana kuti amupase mare. ⁶ Uye waakapira, uye wakatsaka mazano okuti amupereke pasina mbumba. ⁷ Uye raguma zuwa romukati dzisina nbiriso, rokuti raidhikanuwa kuyizwa tchibhairo tcho pasika. ⁸ Uye Djesu wakatuma Peduru, uye na Juau, otchiabvundza: Endai, ti gadizirirei pasika, kuti tirirhe. ⁹ Uye iwona akamubvundzisa: Kupi kamudha kuti tiende kodzirira? ¹⁰ Uye iyena wakaabvundza: Naizvo muka pinda muguta, umwe mwanarume no hari yonbvura, mutchasongana naye, mutchamutera kugumira nhumba yapinda iyena. ¹¹ Uye munobvundza muridzi wonhumba: Mufundisi ariku bvundzisa: Irikupi nbuto yandi tcharhira Pasika no adzidzi angu?. ¹² Nokudharo iyena otchamupangidza mbuto guru yakarongwa kare; apona gadzirirai. ¹³ Uye awona paakaenda, akamuwona nozvia zvaanga abvundzwa; akagadzirira pasika. ¹⁴ Uye payaka guma ngwa, akagara phe kurhira, uye negumi ne airi womapositori. ¹⁵ Uye wakabvundza:Tchakawanda ndadha kurhiya naimwiwi pasika iri, inini ndisati ndatambudzika. ¹⁶ Nokti inini ndino mubvunda, kuti kariri amotchazorhi, kuguma izvi zvazodzadzisikwa mu umanbo waMwari. ¹⁷ Uye akatora copo, uye akatenda Mwari, akati: Imwai uye, mugurirane, kamuri. ¹⁸ Nokti ndino mubvundza kuti, tchibhereko tchese tchomu zanbiringa inini anditchazomwi, pakazoguma umanba waMwari waunya. ¹⁹ Uye aka tora mukate, uye akatenda Mwari, akagura, uye wakaapase awona, otchiti: Uyu imwiri wangu, unodhururihwe kamuiri, itai izvi mutchi ndirangarira. ²⁰ Kuitira no miezaniso wo copo, paakapedza, akati: copo iyi itchitenderano tchitswa muropa rangu, rino dhururihwa kamuri. ²¹ Naizvona nyara younya utchanditengesa uripano nainini patchirhiro. ²² Uye zvirokwazvo mwana wo mwanarume atcheanda nomuchobha wozvanhorhwa, asi pane uya mwanarume waizomutengesa! ²³ Uye akatanga kubvundzisana kaari, ndiupi kaari waidha kuzviita ngei waizviti izvi. ²⁴ Uye pakawoneka kuphikisana kaari awona, ngopamusoro pawo uya wai onekwa mukuro. ²⁵ Uye Djesu akati: Madzimanbo wo wahedeni anomutoga, uye aya anoita utongi pamusoro pawo anodhaindzwa wanatsi. ²⁶ Asi musaitirane kudharo kamuri, zvisati kuti mukuru kamuri ngaite hinga mudhoko, uye anotungamirira, hinga mupasiri. ²⁷ Nokuti ndiani mukuru? Unogara pakurhira, kanakuti mupasiri? naizvona andiepi anogara pakurhira? nokudharo inini ndiri kamuri hinga nauya ano pasira. ²⁸ Uye imwimwi ndimwi munosoranba makaima mukuedzwa kwangu. ²⁹ Uye inini ndinomupangidza umanbo, nomuchobho umwewo bhabha angu inini akandi pangidzawo. ³⁰ Kuitira mu umanbo wangu, irhai, nukumwa patchirhiro tchangu ; uye imwimwi garai pamusoro potchigaro, motchitonga gumi no airi rodzindza reIsiraeri. ³¹ Akabuyazve Ishe: Simioni, Simioni, sathani wakamukunbira, kuti amupepete hinga tirigu; ³² Asi inini ndhaka ranba ngoya yako, nokuti kutenda kako akuperi, uye iwewe uka tendewuka, bhambisa hamadzako. ³³ Uye iyena wakati: Ishe, ndakagadzirira kuti ndiende naimwimwi dzamara mudjeri, uye noku tamika. ³⁴ Asi iyena wakabuya : Peduru inini ndzinobvundza kuti nhamasi djongwe risati rarira utchandiranba katatu kese. ³⁵ Uye akabuya kaari: pandaka mutuma musina tchikwama, uye musina saku, uye musina hwachu, naizvona panotchiro tchaka muchotera? Uye akadhaira: Haiwa. ³⁶ Nokubharo iyena wakabvundza: Asi zvino, ndiani ono tchikwama ngabhate, zvimwezvo nosaku; uye uya usina tarasadha, ngatengese matchira ake, atenge rimwe. ³⁷ Nokuti inini ndinomubvundza, kuti zvinodkikanwa kudzadziswa kwandiri zviya zvakatarhwa: Uye waka bvundzwa no anhakuchata. Nokuti zviya zviri pamusoro pangu zvinodhikana zvedzadziswe. ³⁸ Uye awona akabuya: Ishe dziripano tarasadha nbiri. Uye iyena wakabvundza: dzinokwana. ³⁹ Uye otchibhudha, akaenda se mudjairo, kudhunhu remu Oliveira; uye adzidzi ake akamutera. ⁴⁰ Uye paakaguma pa nbuto iya, wakaabvundza: Namatai kuti musazopinde mukuyedzwa. ⁴¹ Uye wakatarauka kaari, wakaenda panberi patchisiano tcho bhuwe, uye akagodhama, akanamata, ⁴² Otchiti: Bhabha zvotchiita ngaipindi copo iyi kwandiri, uye ngakusaite kudha kangu, asi kudha kwenhu. ⁴³ Uye pakauya ngirosi yokudhenga, yai musinbisa. ⁴⁴ Uye wanga akasuwa, akanamatazve no simba. Uye ziya rake rakaiti hinga dhono ro ngazi, rai erara pasi. ⁴⁵ Iyena wakamuka pakuna namata, akauya kuna adzidzi ake, uye wakagumira akawata ngonhaya yokusuwa. ⁴⁶ Uye akabvundzisa: Ngei murikuwata; mukai, uye namatai, kuti musapinde mukuedzwa. ⁴⁷ Uye iyena paireketa, pakaguma nbumba; uye umwe wo gumi no airi, uya waidhaindza Juda, waienda panberi pawo, uye akakwedhere panaDjesu, kuti amutsodhe. ⁴⁸ Uye Djesu wakamubvundza, Djuda utchatengesa mwana wo mawanarume no tswodho norimwe ? ⁴⁹ Uye aya anaye, paaka owona zvaidha kuitika, akamubvundza Ishe, tiakuwadze no tarasadha? ⁵⁰ Uye umwe wao akakuwadza umwe musendze womukuru womaphirisita, uye akamugura ndzee yokudhi romoko kwao. ⁵¹ Uye akadhaira Djesu, akati: usaiti kudharo! uye akatswasa zee,akamurapa. ⁵² Uye akati Djesu kuno akaru womaphirisita, uye noatongi womuthenberi, uye no anhori, ai uyakaari: kuita hinga ndiri nbava, mauya nomatarasadha, uye no muti?. ⁵³ Ndanga dinemwi ngudzese muthenberi, ndiphindukira amuzi kundi sunga; asi ino ndiyo ngua yenhu, uye iripamusoro poutongi wotchidhima. ⁵⁴ Uye akamusunga, akamundza uye akamukanda munba, momukuru womaphirisita. uye Peduru waimutera ngokure. ⁵⁵ Uye akabhatidza moto pakati poruwandze, uye akagara ese, uye Peduru akagara pakati pawo. ⁵⁶ Uye umwe muchandi womwanakadzi, akamuwona akagara pamwepo pamoto, akana nangisa kaari akabuya kuti: Uyu wanga anaye. ⁵⁷ Iyena wakamuranba, otchibuya: Mwanakadzi inini andimuzii. ⁵⁸ Uye ngua yakapinda, umweni wakamuwona: iwewewo uri umwe wawo. ⁵⁹ Uye pakupinda ko nguwa inokwana imwe, amweni aitendera, otchibuya: Zvirokwazvo uyu wanga anaye, nokuti dimu Garireu. ⁶⁰ Uye Peduru akadhaira: mwanarume andizvizii zvauriku ereketa. Uye iyena paindobuya, djongwe rakarira ⁶¹ Uye Ishe wakatendeukira, akanangi kuna Peduru waka rangarira masoko a Ishe, nopamusoro pazvaka bvundzwa: Djongwe risati rarira utchandiranba katatu. ⁶² Uye Peduru akabhudha otchitchema. ⁶³ Uye anarume akasunga Djesu aimuchoropodza otchimukuadza, ⁶⁴ Uye otchimufukidza, aimubvundzisa otchiti: dziwonese, ndiani waku kuadza? ⁶⁵ Uye aireketa zvirozvakaanda kumubhindukira, otchimutuka. ⁶⁶ Uye kwanga kaedza, akabhatana atchendjebvu wo anhu, uye noakuro womaphirisita, uye no anyori, akamundza paupangiri pawo, ⁶⁷ Iwewe uri Kirisitu? Tibvundze. Uye eyena waakabvundza: Inini ndikamubvundza, amuzomutendi, ⁶⁸ Uyezve ndikamubvundzisai, amuzo ndidhairi,uyezve amuzo ndirekeri. ⁶⁹ Kubvira zvino mwana wo mwanarume utchagara komoko kawo kosimba raMwari. ⁷⁰ Uye ese akamubvundzisa: Nokudharo iwewe uri mwana waMwari?Uye iyena wakadhaira: Imwimwi murikubuya kuti ndini. ⁷¹ Uye awona akamubvundza : Kuti tizodhe zvapupu zvakawanda? Nokudharo isusu tazwa nomuromo wako.