¹ Wanangu, sikilizeni, fundisho la baba, na zingatieni ili mjue maana ya ufahamu. ² Mimi ninawapa mafundisho mazuri; msiyaache mafundisho yangu. ³ Mimi nilikuwa mwana kwa baba yangu, mpole na mtoto pekee kwa mama yangu, ⁴ baba alinifundisha akiniambia, "Moyo wako uzingatie sana maneno yangu; shika amri zangu nawe uishi. ⁵ Jipatie hekima na ufahamu; usisahau na kuyakataa maneno ya kinywa changu; ⁶ usiiache hekima nayo itakulinda; ipende nayo itakuhifadhi salama. ⁷ Hekima ni kitu cha muhimu sana, hivyo jipatie hekima na tumia namna zote kuweza kupata ufahamu. ⁸ Tunza hekima nayo itakutukuza; ikumbatie nayo itakuheshimu. ⁹ Hekima itaweka kilemba cha heshima juu ya kichwa chako; itakupa taji zuri. ¹⁰ Mwanangu, sikiliza, na kuzingatia maneno yangu, nawe utapata miaka mingi ya maisha yako. ¹¹ Ninakuelekeza katika njia ya hekima, nimekuongoza katika mapito yaliyonyooka. ¹² Unapotembea, hakuna atakayesimama katika njia yako na kama ukikimbia hutajikwaa. ¹³ Shika mwongozo wala usiuache, utakuongoza, maana ni uzima wako. ¹⁴ Usifuate njia ya waovu wala usiende katika njia ya watendao uovu. ¹⁵ Jiepushe nayo, usipite katika njia hiyo; geuka na upite njia nyingine. ¹⁶ Maana hawawezi kulala mpaka wafanye ubaya na hupotewa na usingizi hadi wasababishe mtu kujikwaa. ¹⁷ Maana wao hula mkate wa uovu na hunywa divai ya vurugu. ¹⁸ Bali njia ya mwenye kutenda haki ni kama mwanga ung'aao, huangaza zaidi na zaidi hadi mchana inapowasili kwa ukamilifu. ¹⁹ Njia ya waovu ni kama giza hawajui ni kitu gani huwa wanajikwaa juu yake. ²⁰ Mwanangu, zingatia maneno yangu; sikiliza kauli zangu. ²¹ Usiziache zikaondoka machoni pako; uzitunze katika moyo wako. ²² Maana maneno yangu ni uzima kwa wenye kuyapata na afya katika mwili wao. ²³ Ulinde salama moyo wako na uukinge kwa bidii zote; kwa kuwa katika moyo hububujika chemichemi za uzima. ²⁴ Jiepushe na kauli za udanganyifu na ujiepushe na mazungumzo ya ufisadi. ²⁵ Macho yako yatazame mbele kwa unyoofu na kwa uthabiti tazama mbele sawasawa. ²⁶ Usawazishe pito la mguu wako; na njia zako zote zitakuwa salama. ²⁷ Usigeuke upande wa kulia au kushoto; ondoa mguu wako mbali na uovu.