¹ Mtu aliyepokea makaripio mengi lakini anashupaza shingo yake atavunjika ndani ya muda mfupi na hatapona. ² Watenda mema wanapoongezeka, watu wanafurahi, bali wakati mtu mwovu anapotawala, watu huugua. ³ Mwenye kupenda hekima baba yake anafurahi, bali anayeshikamana na makahaba huuharibu utajiri wake. ⁴ Mfalme huimarisha nchi kwa haki, bali mwenye kudai rushwa huirarua. ⁵ Mtu anayejipendekeza kwa jirani yake anatandaza wavu kwenye miguu yake. ⁶ Mtu mbaya hunaswa kwenye mtego wa dhambi yake mwenyewe, bali yeye atendaye haki huimba na kufurahi. ⁷ Atendaye haki hutetea madai ya masikini; mtu mwovu hafahamu maarifa kama hayo. ⁸ Mwenye dhihaka huutia moto mji, bali wale wenye busara huigeuza ghadhabu. ⁹ Mtu mwenye busara anapojadiliana na mpumbavu, hughadhabika na kucheka, hakutakuwa na utulivu. ¹⁰ Mkatili humchukia mwenye ukamilifu na hutafuta maisha ya mwenye haki. ¹¹ Mpumabavu huonyesha hasira yake, bali mtu mwenye busara huishikilia na kujituliza mwenyewe. ¹² Kama mtawala atazinagatia uongo, maafisa wake wote watakuwa waovu. ¹³ Mtu masikini na mkandamizaji wanafanana, maana Yehova huyapa nuru macho yao wote. ¹⁴ Kama mfalme atamhukumu masikini kwa uaminifu, kiti chake cha enzi kitaimarishwa milele. ¹⁵ Fimbo na maonyo huleta hekima, bali mtoto huru mbali na makaripio humwaibisha mama yake. ¹⁶ Watu waovu wanapotawala, uovu huongezeka, bali wenye kutenda haki wataona anguko la watu waovu. ¹⁷ Mwadibishe mwanao naye atakupa pumziko; ataleta furaha katika maisha yako. ¹⁸ Pasipo na maono ya kinabii watu huenda bila utaratibu, bali mwenye kuitunza sheria amebarikiwa. ¹⁹ Mtumwa hawezi kurekebishwa kwa maneno, maana ingawa anaelewa, hakuna mwitikio. ²⁰ Je unamwona mtu mwenye haraka katika maneno yake? Kuna matumaini zaidi kwa mpumbavu kuliko kwake. ²¹ Mwenye kumdekeza mtumwa wake tangu ujana, mwisho wake itakuwa taabu. ²² Mtu mwenye hasira huchochea ugomvi na bwana mwenye hasira sana hutenda dhambi nyingi. ²³ Kiburi cha mtu humshusha chini, bali mwenye roho ya unyenyekevu atapewa heshima. ²⁴ Anayeshirikiana na mwizi huyachukia maisha yake mwenyewe; husikia laana na wala hasemi chochote. ²⁵ Kumwogopa binadamu ni mtego, bali mwenye kumtumaini Yehova atalindwa. ²⁶ Wengi huutafuta uso wa mtawala, bali kutoka kwa Yehova huja haki kwa ajili yake. ²⁷ Mtu dhalimu ni chukizo kwa wenye kutenda haki, bali mwenye njia ya haki ni chukizo kwa watu waovu.