¹ Ita sasa; je kuna yeyote ambaye atakujibu? Utamrudia yupi katika watakatifu hao? ² Kwa kuwa hasira huua mtu mpumbavu; wivu huua mjinga. ³ Nimemuona mtu mpumbavu akishika mzizi, lakini ghafla niliyalaani makazi yake. ⁴ Watoto wake wako mbali na uzima; wameangamia langoni mwa mji. Hakuna yeyote atakaye waponya. ⁵ Mwenye njaa hula mavuno yao; hata huyachukua katikati ya miiba. Wenye kiu huzihemea mali zao. ⁶ Kwa kuwa magumu hayatoki udongoni; wala taabu haichipuki katika nchi. ⁷ Badala yake, wanadamu huzaliwa kwaajili ya taabu, kama tu cheche za moto zirukavyo juu. ⁸ Lakini kwa mimi, ningemrudia Mungu mwenyewe; kwake ningeaminisha kusudi langu - ⁹ yeye afanyae makuu na mambo yasiyochunguzika, mambo ya ajabu yasiyo na hesabu. ¹⁰ Hutoa mvua juu ya nchi, na huyapeleka maji mashambani. ¹¹ Hufanya haya kwaajili ya kuwainua juu hao walio chini; huwapandisha sehemu salama hao waombolezao. ¹² Yeye huharibu mipango ya watu wenye hila, ili mikono yao isipate mafanikio. ¹³ Yeye huwanasa watu wenye hekima katika matendo ya hila zao wenyewe; mipango ya watu waliogeuzwa huharibika haraka. ¹⁴ Wao hupatwa na giza wakati wa mchana, na hupapasa mchana kama vile ni usiku. ¹⁵ Lakini yeye huokoa maskini kwa upanga wa vinywa vyao na mhitaji kwa mkono wa mtu mwenye nguvu. ¹⁶ Hivyo mtu maskini ana matumaini, na udhalimu hufumba kinywa chake mwenyewe. ¹⁷ Tazama, amebarikiwa mtu ambaye hutiwa adabu na Mungu; kwa sababu hiyo, usidharau uongozi wa Mwenyezi. ¹⁸ Kwa kuwa yeye hujeruhi na kisha huuguza; yeye hutia jeraha na kisha mikono yake huponya. ¹⁹ Yeye atakuokoa na mateso sita; kweli, katika mateso saba, hakuna uovu utakao kugusa. ²⁰ Wakati wa njaa atakukomboa na kifo, na kwa uwezo wa upanga wakati wa vita. ²¹ Wewe utafichwa na mateso ya ulimi; na usitishike na uharibifu utakapokuja. ²² Wewe utaufurahia uharibifu na njaa, na hutatishika na wanyama wakali wa nchi. ²³ Kwa kuwa wewe utakuwa na mapatano na mawe ya shambani mwako, na wanyama wa mwituni watakuwa na amani na wewe. ²⁴ Wewe utajua kwamba hema lako lina usalama; utatembelea zizi la kondoo wako na hutakosa kitu chochote. ²⁵ Pia utafahamu kwamba uzao wako utakuwa mwingi, na vizazi vyako vitakuwa kama nyasi ardhini. ²⁶ Wewe utafika kaburini kwako mwenye umri kamili, kama vile rundo la masuke ya nafaka liendavyo juu wakati wake. ²⁷ Tazama, tumelipeleleza jambo hili; ndivyo lilivyo; lisikie, na ulifahamu kwa ajili yako mwenyewe."