¹ Daudi akamuimbia Yahwe maneno ya wimbo huu siku ile Yahwe alipomuokoa katika mkono wa adui zake wote na katika mkono wa Sauli. ² Akaomba hivi, "Yahwe ni mwamba wangu, ngome yangu, aliyeniokoa. ³ Mungu ni mwamba wangu. Yeye ni kimbilio langu. Ngao yangu, pembe ya wokovu wangu, ngome yangu na kimbilio langu, aniokoaye na mabaya yote. ⁴ Nitamuita Yahwe, astahiliye kutukuzwa, nami nitaokolewa kutoka kwa adui zangu. ⁵ Maana mawimbi ya mauti yalinizunguka, mafuriko ya maji ya uharibifu yakanishinda. ⁶ Vifungo vya kuzimu vilinizunguka; kamba za mauti zikaninasa. ⁷ Katika shida yangu nalimuita Yahwe; nilimuita Mungu wangu; akaisikia sauti yangu katika hekalu lake, na kilio changu cha msaada kikafika masikioni mwake. ⁸ Ndipo nchi ikatikisika na kutetemeka. Misingi ya mbingu ikatetemeka na kutikiswa, kwa kuwa Mungu alikasirika. ⁹ Moshi ukatoka katika pua yake, na miale ya moto ikatoka katika kinywa chake. Makaa yakawashwa nayo. ¹⁰ Alizifungua mbingu akashuka, na giza totoro lilikuwa chini ya miguu yake. ¹¹ Alipanda juu ya kerubi na kuruka. Alionekana katika mawingu ya upepo. ¹² Naye akalifanya giza kuwa hema kumzunguka, akakusanya mawingu makubwa ya mvua angani. ¹³ Makaa ya moto yalidondoka mbele zake kutoka katika radi. ¹⁴ Yahwe alishuka kutoka katika mbingu. Aliyejuu alipiga kelele. ¹⁵ Alipiga mishale na kuwatawanya adui zake--miale ya radi na kuwatupa katika kuchanganyikiwa. ¹⁶ Kisha njia za bahari zikaonekana; misingi ya dunia ikawa wazi katika kukanywa na Yahweh, katika sauti za pumzi ya pua zake. ¹⁷ Kutoka juu alifika chini; akanishikilia! Aliniondoa katika vilindi vya maji. ¹⁸ Aliniokoa kutoka kwa adui zangu wenye nguvu, kwao walionichukia, kwa maana walikuwa na nguvu sana kwangu. ¹⁹ Walikuja kinyume changu siku ya shida yangu, lakini Yahwe alikuwa msaada wangu. ²⁰ Pia aliniweka mahali panapo nafasi. Aliniokoa kwa kuwa alipendezwa nami. ²¹ Yahwe amenituza kwa kipimo cha haki yangu; amenirejesha kwa kiwango cha usafi wa mikono yangu. ²² Kwa maana nimezishika njia za Yahwe na sijafanya uovu kwa kugeuka kutoka kwa Mungu. ²³ Kwa kuwa maagizo yake yote ya haki yamekuwa mbele yangu; kwa kuwa sheria zake, sikujiepusha nazo. ²⁴ Nimekuwa bila hatia mbele zake pia, na nimejiepusha na dhambi. ²⁵ Kwa hiyo Yahwe amenirejesha kwa kiasi cha uadilifu wangu, kwa kipimo cha usafi wangu mbele zake. ²⁶ Kwa mwaminifu, unajionyesha kuwa mwaminifu; kwake asiye na hatia; unajionyesha kuwa hauna hatia. ²⁷ Kwa usafi unajionyesha kuwa msafi, lakini kwa wakaidi unajionyesha kuwa mkaidi. ²⁸ Unaokoa walioteswa, lakini macho yako ni kinyume cha wenye kiburi, na unawashusha chini. ²⁹ Kwa maana wewe ni taa yangu, Yahwe. Yahwe huangaza katika giza langu. ³⁰ Kwa ajili yako ninaweza kukimbia juu ya jeshi; kwa msaada wa Mungu wangu naweza kuruka juu ya ukuta. ³¹ Maana njia za Mungu ni kamilifu. Neno la Yahwe ni safi. Yeye ni ngao yao wanaomkimbilia. ³² Maana ni nani aliye Mungu isipokuwa Yahwe? Na ni nani aliyemwamba isipokuwa Mungu? ³³ Mungu ni kimbilio langu, na umuongoza katika njia yake mtu asiye na hatia. ³⁴ Huifanya myepesi miguu yangu kama kurungu na kuniweka katika vilima virefu. ³⁵ Huifundisha mikono yangu kwa vita, na viganja vyangu kupinda upinde wa shaba. ³⁶ Umenipa ngao ya wokovu wako, na upendeleo wako umenifanya mkuu. ³⁷ Umeitengenezea miguu yangu nafasi chini yangu, hivyo miguu yangu haijateleza. ³⁸ Niliwafuatia adui zangu na kuwaangamiza. Sikurudi nyuma hadi walipoangamizwa. ³⁹ Niliwararua na kuwapiga; hawawezi kuinuka. Wameanguka chini ya miguu yangu. ⁴⁰ Ulinifunga mshipi wa nguvu kwa vita; unawaweka chini yangu wanaoinuka kinyume changu. ⁴¹ Ulinipa migongo ya shingo za adui zangu; niliwaangamiza kabisa wale wanaonichukia. ⁴² Walilia kwa msaada, lakini hakuna aliyewaokoa; walimlilia Yahwe, lakini hakuwajibu. ⁴³ Niliwaponda katika vipande kama mavumbi juu ya ardhi, niliwakanyaga kama matope mitaani. ⁴⁴ Umeniokoa pia kutoka katika mashutumu ya watu wangu. Umeniweka kama kichwa cha mataifa. Watu nisiowajua wananitumikia. ⁴⁵ Wageni walishurutishwa kuniinamia. Mara waliposikia kuhusu mimi, walinitii. ⁴⁶ Wageni walikuja wakitetemeka kutoka katika ngome zao. ⁴⁷ Yahwe anaishi! Mwamba wangu atukuzwe. Mungu na ainuliwe, mwamba wa wokovu wangu. ⁴⁸ Huyu ndiye Mungu anilipiaye kisasi, awawekaye watu chini yangu. ⁴⁹ Uniweka huru mbali na adui zangu. Hakika, uliniinua juu yao walioinuka kinyume changu. Uliniokoa kutoka kwa watu wenye ghasia. ⁵⁰ Kwa hiyo nitakushukuru, Yahwe, kati ya mataifa; nitaliimbia sifa jina lako. ⁵¹ Mungu hutoa ushindi mkuu kwa mfalme wake, na huonyesha uaminifu wake wa kiagano kwa mtiwa mafuta wake, kwa Daudi na uzao wake daima."