¹ Asaŋa go dɔ́ŋɛnɔ Yónasɛ, ohaŋa ba Amatayɛ́ɛ, go mo oyana a amɔ́: ² Fadɛ́gɛ́na go ɛ́da náa gɛkɔ́nɔ́nɔ́ɔ gá́ tɛ́sɔnɔ Ninífe o yɛ gɔɔmɛna, goakɛ́ bobɛ́ bá yɛ́ bó á áyɛ́kánɛ́náa, bó báá ncó mbolɛna. ³ Yónasɛ go fúmbe go ságɛna ɛ ɛ́da naá Telesíse halaháláa na Asaŋa. Gɔ́ɔ a gɔsɔmɔ́ naá Yafóo, gɛ́hɛ́ go ɛ́na sitíme yɛ ɛ́dana naá Telesíse. Yónasɛ go soa muinyí má pɛ́, go yala naá sitíme olɔŋɔ na biiníndí go go ɛ́da naá Telesíse halaháláa na Asaŋa. ⁴ Gɔ́ɔ Kanɛ-Mesúge a dómamɔ́ gifufege gá ufufu naá máŋɛ́, gɛantá gá puuŋe go fadɛgɛna naá máŋɛ́. Sitíme ɛ ná lɛ́ ya go yíme naá miimpo. ⁵ Bogógí sitíme go bɛa bofoá, go ɛ́da go bósógolonyo onyɔ moánɛ asaŋa bɛhɛ́, bá nɔɔnɔnɔ naá máŋɛ́ bɛnóɛ́ bɛ́ɛbɛ bɛ́ mbaá lɔmɔ́ naá sitíme go go yɛ gundie fágɔfágɔ. Yónasɛ go gɔsɔ naá sitíme cí, a báá bɛ́dɛ́mɛ́ná, go bépéle go dɔnɔ́ɔ dá pípolí. ⁶ Ugógí go mo báyɛkɛna a amɔ́ gɛ́hɛ́ áa: Go ɛ́dana dɔnɔ́ɔ goakɛ́? Fadɛ́gɛ́na, o bósógolonyo Asaŋa bahɔ! Amóádaga a gaá lɛ́gá go có bééniŋinye, dɛ dɛ fúé. ⁷ Gáábɔ́ go bágálɛdɛna bá amɔ́: Úlé nɔnɔ dɛ nɔɔ adɔ go go íyime ánɛ́ɛ a có úlenemú na gɛɛmba gɛ́ɛgɛ. Gáábɔ́ go nɔɔ adɔ, adɔ go obɛnɛna Yónasɛ. ⁸ Gɔ́ɔ bá mo oyanamɔ́ bá amɔ́: Có oyánáamɔ́ ánɛ́ɛ a có úlenemú na gɛɛmba gɛ́ɛgɛ? Bɛsɛnɛ báhɔ bɛ́ lɔ́mɔ́ nɛɛ́nɛ, go ɛ́damɔ́ go úlene áhanɛ́ɛ, o lɔ́mɔ́ ba boɛ́nɔ bóhanɛ́ɛ? ⁹ Gɛ́hɛ́ go bó gundie a amɔ́: Ndɛ́ ba Behébelée, kunde tííne Kanɛ-Mesúge, Asaŋa ba mmoɛná, mɔ́ɔnyɔ a mbaá bulíe máŋɛ́ na cí. ¹⁰ Batɔ bɔ́ɔbɔ go bɛa gɛantá gá bofoá, go mo oyana bá amɔ́: Goakɛ́ o báá ná ŋaáa nɔ́ɔnɔ? Goŋaá batɔ bɔ́ɔbɔ bá mba lɛncá bá amɔ́ a mba lɛ́ a ságɛnana go go ɛ́da halaháláa na Kanɛ-Mesúge, goakɛ́ a mba lɛ́ bó oyánáalú. ¹¹ Gáábɔ́ go mo úhune bá amɔ́: Dɛ ŋamɔ́ nɛɛ́nɛ nahɔ goŋaá máŋɛ́ má fuuge nɛcɔ́ o? Goakɛ́ máŋɛ́ má mba lɛ́ má fuluŋuncene go puluŋuncene. ¹² Yónasɛ go bó gundie a amɔ́: Kɔ́lɔ́ɔmɔ́ nɔnɔ no nnɔɔ naá máŋɛ́, gɔ́ɔ máŋɛ́ má gaá ná fuugé nɛnyɔ́, goŋaá ŋgíyimene caá yɔmɔ́ɔ mɔ́ɔ nnyó úlenemú na gɛantá gá puŋe gɛ́ɛgɛ. ¹³ Batɔ bɔ́ɔbɔ go fúmbe goŋaá bá bola naá cɔ́lɔ, kanɛ́ bó báá bó mánɛ́gɛ́ná goakɛ́ máŋɛ́ má mba lɛ́ mɛ́ ɛ́dana naá busío má bɛlɛmɛncana nabɔ́. ¹⁴ Gɔ́ɔ bá bósógolonyomú Kanɛ-Mesúge bá amɔ́: Ée Daadáa ,o do có fúúgíe go gɛɔyɔ gá mɔtɔ mɔ́ɔnyɔ, gó gunde o do có áfɛ́gɛ́nɛ́ná manɔ́ŋɔ́ má ediíyi ba mɔtɔ! Goakɛ́ maamɔ́ɔ Asaŋa o ŋanana bɔ́ɔbɔ o lɛ́galɛgamɔ́. ¹⁵ Gɔ́ɔ bá gɔ́lɔmɔ́ Yónasɛ, go mo nɔɔ naá máŋɛ́. Gofuluŋuncene gá máŋɛ́ go fuuge. ¹⁶ Batɔ bɔ́ɔbɔ go bɛa gɛantá gá gohálamana Asaŋa, bá báá mo fáá gɛbáágá na bisúnígéné. ¹⁷ Kanɛ-Mesúge go dóma nnɔncɔ go go mɛna Yónasɛ, Yónasɛ go ŋa miisí mádadɔ́ na medúgú mádadɔ́ naá gadɛ́ɛ gá hɛɔbɔ́ .