¹ Pauli, umuwomvi wakwe Yesu Kristu, nitwa ukuwa ne mu positole swinya nawikwa pambali muno ilandwe zima lyakwe Leza, ² lino Leza alayizizye kali na wa kasema wakwe mu mazwi amatele, ³ ukuyana nu Mwana wakwe wino alinji a nkhulo yakwe Davidi ku muwili. ⁴ Ukupitila mu Muzimu wa wimichile Yesu alolesizwe na maka ukuwa a Mwana wakwe Leza mu kuzyulupukwa ukufuma ku wafwe, Yesu Kristu Imfumu yitu. ⁵ Ukupitila mwakwe weliwe tupochezile uwila nu wutumwa ku kutonthela kwi suwilo mu maluko yonsi, muno izina lyakwe. ⁶ Mu maluko yaa, namwenye mwitwa ukuti muwe wakwe Yesu Kristu. ⁷ Ku wonsinye mu Roma wano awakundwe nu Leza swinya wisilwe ukuwa a wanthu wakwe awatele: Uwila kwe mwemwe nu mutende ukufuma kwe Leza e Tata witu ni Mfumu Yesu kristu. ⁸ Ichakutalichila, nenji nkhusalifya e Leza wane ukupitila mwakwe Yesu Kristu muno mwemwe mwensi, umulandu isuwilo lyinu liwizizwe munsi yonsi iya pansi. ⁹ Amuno Leza a kamboni wane, wino nenji nkhutewetela mu muzimu mwi landwe zima ilyakwe Mwana wakwe, muno nkhavwanga ivya kwe mwemwe penye. ¹⁰ Nenji nkhalenga penye mu mapepo yane ukuti mu nzila yiliyonsi ukuti pawumalilo ningachimvya nomba mu kulonda kwakwe Leza pakwiza kwakwe mwemwe. ¹¹ Amuno nkhulondesya ukuti imbalole mwemwe, alyakuti ningawapa mwemwe vimwi ivyawila vya muzimu, umwakuti imbawomye. ¹² Akulikuti, nanenye nkhulondesya ukuti imbe ne muwome ngati a mwemwe, ukupitila mwi suwilo lya aliwensi, ilyinu ni lyane. ¹³ Nomba nthakulonda ukuti mwemwe mutakamanye, wanawitu, ukuti nkhalonda ukwiza kwe mwemwe penye (ukuwa nthazumilizwa ukufika nomba) , umwakuti nzane wamwi mwakwe mwemwe, ndivino vichitisile pakasi pa Makandi wonsi. ¹⁴ Nene indi ni nkhongole ku wa Griki na ku walendo, ku wa mano na ku vipuwa. ¹⁵ Achaleka, kwe nene nenga, njipekinie ukuti indumbilile ilandwe zima na kwe mwemwenye wano muli mu Roma. ¹⁶ Amuno nene insi nanthi ansoni ni landwe zima, Amuno a maka yakwe Leza ku kutulwa kwa aliwensi wino akusuwila, awa Yuda pakutalichila ngapano awa Griki. ¹⁷ Amuno mwi landwenye lyolyo uwulungamane wakwe Leza wukuwumbulwa ukufuma kwi suwilo ukuya kwi suwilo, ndivino chawalisilwe, ''Awalungamane waliyikala nu wulanzi ukupitila mwi suwilo.'' ¹⁸ Amuno uwukali wakwe Leza wawumbulikwa ukufuma mwiyulu ukususya wonsi uwunthalinuleza nu nuwunthalungamana wa wanthu wano ukupitila mu wunthalungamana wakunyosya ichisinkha. ¹⁹ Choo a mulandu ukuti chocho chino chamanyikwa ivyakwe Leza vikuloleka kwe woliwo. Amuno Leza awalolisizye woliwo. ²⁰ Amuno imiwele yakwe iyifisame, iyakwitwa amaka ya muyayaya swinya uwuleza, vyaloleka ichete sana, ukufuma pano ukulewukwa kwansi ya pansi, mu vinthu vino vyapangwa. achaleka wasi nanthi akuvwama. ²¹ Choo chiliwowonye umulandu, napano wamanyile ivya kwe Leza, watatumvizye weliwe ngati we Leza, pamwi watamusalifizye. Mumalo mwakwe, wiza wawa avipuwa mu melenganio yawo, swinya imyenzo yawo iyisitamano yawa yifite. ²² Wakuyiwika ukuwa awa mano, kweni wiza wawa avipuwa. ²³ Awa chenjania uwuchindamane wakwe Leza umusitakufwa ni milolechele ya chikolania cha munthu wino akafwa, wa vinyunyi, wa vinyama vya manama yani, ni vinthu vino vikasela. ²⁴ Achaleka Leza awalemeka ku wuzelele wa myenzo yawo ku wunyale, ukuti imiwili yawo yiwe yisamuke pakasi pakwe woliwo awenecho. ²⁵ Awoliwo wano wachenjania ichisinkha chakwe Leza ku wufi, wano walambilanga swinya watewetelanga ichilewulwa mumalo mwa e kalewula, wino tukumutumvya muyayaya. Ameni. ²⁶ Umulandu wakwe choo, Leza awalemeka woliwo ku vya kukumbwa ivisamuke, amuno awanachi wachenjania imiwombele yansi ukuwa yoyo yino amwiko. ²⁷ Achilichonga, na wonsinye wasya imiwombele yawo ku wanachi nga awakumbwa awonsi awawuyo amwiko. Waa a wonsi wano wachitile ivya musamu na wanthu ngapano wapochezile mwakwe wenecho ichilipwa chino chalingine muno kuluvyania kwawo. ²⁸ Umulandu watuzumilizizye ukuti wali nu Leza mu melenganio yawo, Leza awalemesile ku myelenganizizye iyinyongane, ukuti woliwo wawombe vyovyo ivinthu vino asa vizima. ²⁹ Wizuzwa na vyonsi vino ivi nthalungamana, iviwipe, ivikumbwa, nu wulwe. Wizula nu wuzuwa, ukukoma, ivyongo, uwufi, nu ivilondwa iviwipe. Awa luyewo, ³⁰ wakawipila, wakapata Leza, awavikanza, awakuyivuna, awakuyikwezya, ukupanga inzila zya kuwombela iviwipe; wasikwivwila ku wakwasi wawo. ³¹ Wasi nanthi a mano, nanthi a suwilo, nanthi a mwenzo, swinya nanthi ankhumbu. ³² Wakakwivwichisya amasundo yakwe Leza, ukuti wawo wano wakaomba ivinthu ngati avyoo imfwa yiwayanine.Ukuwa wasiwomba ivinthu vyoo vyenga, wakazumilizya na wanjinye wano wakaviwomba.