¹ Achaleka usi nanthi kulewuchizya, we munthunye wewe, wewe wino akapanzya, amuno vino ukupanzizya mu wanji wewe ukuyisusya mwakwe wemwenecho wenga. Amuno wewenye wino ukupanzya ukuwomba ivilivyonga. ² Ukuwa twamanya kuno ukupanzya kwakwe Leza ku mu chisinkha pano kwapona kwe wawo wano wakachita ivinthu umusango woo. ³ Kweni welenganizye choo, we munthu wewe, wewe wino ukupanzya wawo wano wakuwamba ivinthu vya musango woo napano namwenye mukuwomba ivinthu vilivyonga. Wuzye mulisamala ukufuma kwi panzyo lwakwe Leza? ⁴ Pamwi ukwelengania uwutichi nkhaninye uwukankhale wa wuzima wakwe, ukuzimba kwa kusunda kwakwe, nu kutepwa kwakwe? Wuzye utamanya kuno uwuzima wakwe wuksula ukutungulula ku kutontholokwa? ⁵ Ukuwa chili ku vino ukuwoma kwako nu mwenzo wasita kutontholokwa wuno wewe ukuyisunjila wenga uwukali pa wanda wa wukali, akulikuti, uwanda wa kuwumbulika kwi pingulo ililungamane lyakwe Leza. ⁶ Alinyosezya ku munthu aliwensi ukuyana ni milimo yakwe: ⁷ kwe wawo wano ukuyana nu kunanthi kuleka, imilimo iyizima awavwamba ukutumvya, umuchinzi swinya uwusita kuwola, weni alipa uwumi wa muyayaya. ⁸ Ukuwa kwe wawo wano wakuyitemwa, wano wasikwivwila ichisinkha kweni wakwivwila uwusita kulungamana, uwukali nu kufulwa ukukulu kuliyiza. ⁹ Leza alileta ukuyimba na malanda pa munthu aliwensi wino akuwomba iviwipe, ukutalichila awa Yuda, na ku wa Griki nye. ¹⁰ Ukuwa ukutumvya, umuchinzi, nu mutende wuliyikwe kwe aliwensi wino akuwomba ivizima, ku wa Yuda pakutalichila, na ku wa Griki nye. ¹¹ Amuno kutawa ukutemwela nu Leza. ¹² Amuno ndivino awavule wawembuka kunzi kwi sundo nawonye walifwa kunzi kwi sundo, swinya ndivino awavule wawembuka nu muchinzi kwi sundo walipingulwa ni sundo. ¹³ Amuno asa wakwivwa isundo wano awalungamane paminso yakwe Leza, kweni awa kachita wi sundo wano walilungamikwa. ¹⁴ Amuno pano amakandi, wano wasi nanthi a lisundo, wakuwomba mu miwele ivinthu vyi sundo, wakuwa li sundo ku wenecho, napano watali ni sundo. ¹⁵ Pakwe choo wakulanjizya ukuti imilimo yakulondeka mwi sundo yawalikwa mu myenzo yawo. Ni nthwitwi zyawonye zikuwa wukamboni kwe woliwo, swinya na melenganio yawo awenecho yakususya pamwi yakuchinjilila woliwo kwe woliwo, ¹⁶ swinya na kwe Leza nye. Chocho chiliwombwa pa wanda pano Leza alipingula inkhama zya wanthu wonsi, ukuyana ni landwe zima lyane, ukupitila mwakwe Yesu Kristu. ¹⁷ Kweni ukwiyita wenga mu Yuda nu kwikala pi sundo nu kuyikuzya mwakwe Leza, ¹⁸ swinya wamanya ukulonda kwakwe nga mukuzumilizya chino achizima ukulusya umulandu mwemwe mwasambilizwa ukufuma kwi sundo; ¹⁹ swinya ndi mwasimichila kuno wano wali mu mfizi, ²⁰ e kayolosya wa vipiwa, u musambilizya wa wana awatichi, swinya kuno wewe uli mwi sundo imilolechele ya kumanya ni ya chisinkha, ngapano fwandi wuzye wuliwuli choo chikupalamansya muno ukakwikalila uwumi wako? ²¹ Wewe wino ukasambizya awanji, wuzye utakuyisambizya wenga? Wewe wino ukulumbilila ukususya ukwiwa, wuzye ukakwiwa? ²² Wewe wino ukuti nanthi wenga achite uwuzelele, wuzye wewe ukuchita uwuzelele? Wewe wino wapata amakolania, wuzye ukapoka ama tempile? ²³ Wewe wino ukuyikuzya mwi sundo, wuzye ukusamula Leza pakumongolania isundo? ²⁴ Amuno ''Izina lyakwe Leza lyasamulwa pakasi pa makandi umulandu wakwe mwemwe,'' ndivino chawalisilwe. ²⁵ Amuno ukulembwa uwusilamu (ukuputulwa) mwelimonye kukazipila wewe ndi ukutonthela isundo, kweni ndi ukumongolania isundo, ukuputulwa kwako kukawa wu nthaputulwa. ²⁶ Nomba, ndi, umunthu wino ataputulwa akusunga ivya kulondeka mwi sundo, wuzwe uwu nthaputulwa wakwe wutanga wuwe ngati a kuputulwa? ²⁷ Swinya wuzye wenga wino ataputulwa mu miwele atanga akususye wewe ndi akusunga isundo. Choo chili muno wewe uwalisile isundo nu kuputulwa, kweni ukumongola isundo! ²⁸ Amuno asa mu Yuda wino alivye mu Yuda mumilolechele; nanthi a kuputulwanye koko kuno kulivye mu milolechele ku muwili. ²⁹ Kweni amu Yuda wino aliwonye mukasi, swinya ukuputulwa akuli ukwa mu mwenzo, mu Muzimu, asa mu chiwaliko. Ukutumvya kwa munthu wa musango woo kusifuma ku wanthu kweni ukufuma kwe Leza.