¹ ''Mulolechesye ukuti mutakuwomba imilimo ya wulungamane pa minso ya wanthu ukuti mulolwe, lyo mutalilipwa nu Tata wino ali mwiyulu. ² Achaleka pano mukupa iwa wila, mutakayilizizye ipenga ndivino awa wufi wakuwombela mu ma sinagogi na mu nzila, alyakuti awanthu wawatumvye. Nakawuzyenye nkhuwanena, wapochezile kali amalipilo. ³ Ukuwa pano mukupa ivya wila, mutakaleke ikasa lyinu ilya kamani limanye chino ilya ndilo likuwomba ⁴ alyakuti icha wila chinu chingapwa mu nkhama. Ngapano e Tata wino akalola mu nkhama aliwalipa. ⁵ ''Pano mukupepa, mutakawombe ngati awa wufi, amuno wakunda wakunda ukwimilila nu kupepa mu ma sinagogi na mu nzila indekana alyakuti awanthu wawalole. Nakawuzyenye nkhuwanena, wapochezile kali icha wila chawo. ⁶ Ukuwa mwemwe, pano mukupepa, muwayinjila mung'anda mukasi. Iyalani ichisakati nga mupepe kwe Tata, wino ali munkhama. Ngapano e Baba winu wino akalola munkhama alipa mwemwe icha wila chinu. ⁷ Pano mukupepa, mutakati mwanyosyanyosya ivya kunena ivya vye ndivino aMakandi wakuwombela, amuno wakwelengania ukuti wangivwika umulandu wa mazwi ayavule. ⁸ Achaleka, mutakawe ngati awoliwo, amuno e Tata wamanya ivinthu vino mukuvwamba lyo muchile ukumulenga. ⁹ Achaleka muwapepa ngati vyoo: 'Tata witu uwa mwiyulu, izina lyako lichindikwe ngati aliswepu. ¹⁰ Uwumfumu wakwo wize. Ukulonda kwako kchitike pansi yapansi ndivino chili mwiyulu. ¹¹ Utupe ilero ichaklya chitu icha manda yonsi. ¹² Ututetele, ndi vino naswenye tukutetela awanji. ¹³ Utakatulete mu vyelezyo, kweni utupususye ku muwipe.' ¹⁴ Amuno ndi mukutetela awanthu ivipunuzyo vyawo, e Tata winu wa mwiyulu namwenye awatetela. ¹⁵ Ukuwa ndi mutakutetela ivipunuzyo vyawo, e Tata winu nawenye atalitetela ivipunuzyo vyinu. ¹⁶ ''Pano mukusala ukulya, utakawifye paminso ngati muno awawufi wakuwombela, amuno wakuwifya pa minso yawo alyakuti waloleke ku wanthu ngati wakusala ukulya. Nakawuzyenye nkhuwanena, wapochezile kali ichawila chawo. ¹⁷ Ukuwa mwemwe, pano mukusala ukulya, pakalani amafuta kumutwe swinya musambe kuminso ¹⁸ alyakuti mutakaloleke ku wanji ukuti mukusala ukulya, kweni kwe Tata winu wino ali mu nkhama; swinya e Tata winu wino akulola mu nkhama aliwapa ichawila. ¹⁹ ''Mutakayisunjile mwenga insawo munsi ya pansi, muno u zenye nu muloswa vikakonona, swinya kuno awang'o wanginjila nu kwiwa. ²⁰ Mu malo mwakwe, muyisunjile insawo zyinu mwiyulu, muno u zenye nanthi amuloswa wungonona, swinya muno awang'o watanga winjile nu kwiwa. ²¹ Amuno kuno insawo zyinu zili, akuno ni myenzo yinunye yiliwa. ²² Ilinso awuswepe wa muwili. Achaleka, ndi ilinso lyako alizima, umuwili wonsi wukwizula nu wuswepe. ²³ Lelo ndi ilinso lyako aliwipe, umuwili winu wonsi wikwizula ni mfizi. Achaleka, ndi uwuswepe wuno wuli mwakwe mwemwe amfizi, yikule wuli imfizi! ²⁴ Pasi nanthi wumwi angawombela awa bwana wawili, amuno alitemwa wenga nu kumupata wunji, pamwi aliyipa kwe wenga nu kumukana wunji. Utanga utewetele Leza ni nsawo. ²⁵ Achaleka nkhuwanena, mutakati mu sakamane nu wulanzi winu, chino muliwalya pamwi chino muliwang'wa; pamwi umuwili winu, chino mulizwala. Amuno awumi wutazipa ukulusya ichakulya, swinya umuwili ukulusya ivizwalo? ²⁶ Lolani inyuni zya mupela. Zisikomela pamwi ukusinza pamwi ukunganika mu nthamba, kweni e Baba winu wa mwiyulu akuzilyesya. Wuzye mwemwe mutawa nu mutengo uwukulu ukulusya inyunyi? ²⁷ Wewenu mwakwe mwemwe wino ukusakamana kungonjelezya uwulanzi wakwe? ²⁸ Achani fwandi chino mukusakamana ni vizwalo? Yelenganiani amaluwa ya mu vyalo, muno yakukulila. Yasiwomba intchito, swinya ukusona ichakuzwala. ²⁹ Lelo nkhuwanena, ne Solomoni nye mu wuchindame wakwe atazwite ngati lyonga lyakwe yaa. ³⁰ Ndi Leza akuzwika isote mu vyalo, lino lilipo ilelo kweni mutondo likusumbilwa pa mulilo, angapotwa wuli ukuti azwike mwemwe, mwe wisuwilo ilitichi? ³¹ Achaleka mutakasakamane nu kuti, 'Tuliwalya chani?' pamwi 'Tuliwang'wa chani?' pamwi 'Tuliwa zwala chani?' ³² Amuno aMakandi yakuvwamba ivinthu vyoo, lelo e baba winu wa mwiyulu wamanya kuno mukuvilonda. ³³ Ukuwa pakutaichila vwambani uwufumu wakwe nu wulungamane wakwe, nga vyonsinye vyoo vilipwa kwe mwemwe. ³⁴ Achaleka, mutakati musakamane ivya mutondo, amuno ivya mutondo viliyisakamila. Uwanda wuli wonsi wuli ni viwipe ivikwane ivyakwe.