¹ Ala pano Yesu walola, iwumba, aya kumwamba. Pano wikala pansi, awasambilizyi wakwe awiza kwe weliwe. ² Ayiyula pamulomo wakwe awasambilizya, ati, ³ ''Awalotwe awasaluke mumuzimu , amuno uwufumu wamwiyulu awawo. ⁴ Awalote wano wakulosya amuno walisansamuka. ⁵ Awalotwe awamyalale, amuno walipyana insi yapansi. ⁶ Awalotwe awawo wano wali ni nzala nu lusala lwa wulungamane, amuno waliyizuzwa. ⁷ Awalotwe awa wila, amuno walipochela uwila. ⁸ Awalotwe awaswepe mu mwenzo, amuno walimulola Leza. ⁹ Awalotwe wakaleta mutende, amuno waliyitwa awana wakwe Leza. ¹⁰ Awalotwe wawo wano wakuyima umulandu wa wulungamane, amuno uwawo awufumu wa mwiyulu. ¹¹ ''Awalotwe amwemwe pano awanthu wakuwatuka swinya ukuwayimvya nu kuwawipila uwufi pa vinthu ivivule umulandu wakwe nene. ¹² Sechelani swinya musansamuke nkhani, amuno ichawila chinu achikulu mwiyulu. Amuno mu nzila yonye yoo awanthu wayimvyanga wakasema wano walinji kweneko kunsizi mwemwe. ¹³ ''Mwe muchele munsi ya pansi. Kweni ndi umuchele waleka ukulyompha, wungawa wuli a muchele swinya? Wutanga wuwe swinya ku chilichonsi kweni ukuwusumba kunzi nu kulyatanjilwa namatamba ya wanthu. ¹⁴ Mwe wuswepe wansi. Umusumba wuno wazengwa pa lupili wutanga wavwame. ¹⁵ Awanthu watanga wakozye ulukozyo nu kuluwika pansi pa chizanga, ukuwa wakawika pi beje, nga ayiwala kwe aliwensi mu ng'anda. ¹⁶ Lekani uwuswepe winu wuwalile awanthu umwakuti wangalola imilimo yinu iyizima nga watumvye e Tata winu wino ali mwiyulu. ¹⁷ ''Mutakelenganie ukuti niza ukonona isundo na wakasema. Nenji niza ukuti nthakonone woliwo, ukuwa ukuti imfisye woliwo. ¹⁸ Amuno nakauzyenye nkhuwanena suka mwiyulu ninsi ya pansi vipite, nanthi lyonga iwaliko pamwi umutwe vitalipita mu nzila ukufuma mwi sundo, suka ivinthi vyonsi vyachitika. ¹⁹ Achaleka aliwensi wino wamonthola ilitichi lyonga ilya masundo swinya akusambilizya awanji wowonye aliyitwa umutichi mu wufumu wa mwiyulu. Kweni aliwensi wino akuyasunga nu kuyasambilizya aliyitwa mukulu mu wufumu wa mwiyulu. ²⁰ Amuno nkhuvwanga kwe mwemwe suka uwulungamane winu wukulusya uwulungamane wa wakawalika na wa Farisi, mutaliyinjila mu wufumu wa mwiyulu munzila yiliyonsi. ²¹ ''Mwivwa kuno chavwanzilwe kwe woliwo mu manda ya kali, 'Utakakome,' swinya, 'Aliwensi akukoma ukutinia kwi sundo kuli muzana.' ²² Ukuwa nkhuvwanga kwe mwemwe ukuti aliwensi wino wafulizwa umunyina ukutinia kwi sundo kuli muzana; swinya aliwensi wino akuvwanga kwe munyina, 'We wavye! ukutinia kwi panzyo kuliwa pakwe weliwe; swinya aliwensi wino akuti, ''Wechipuwa! aliwa mu kutinia kwa mulilo ni gahena. ²³ Achaleka ndi mukupa inzuwi nga mwizuka ukuti umunyina ali namwe nu mulandu, ²⁴ yisyani inzuwi palyanye pankholelo, nga ufume penepo. Ichakutalichila mutetelane nu munyina, nga wize nu kupa inzuwi yako. ²⁵ Muzumilizyane na wino ali nu mulandu na wewe pano muchilinji ponga mukuya kwi pembo, ndi pole uwa mulandu na wewe angakulemeka kwe wavita, swinya angasumbila wewe mu ng'anda ya vingololo. ²⁶ Nakawuzyenye nkhuwanena, mutalifuma mwenemo suka mwanyosya inkhongole yonsi. ²⁷ ''Mwivwa ukuti kwavwanzwa, 'Mutakawombe uwuzelele.' ²⁸ Ukuwa nenji nkhuti kwe mwemwe kuno wensi wino akulolechesya umwanachi na melenganio ya wuzelele lyo wachita kali uwuzelele mu mwenzo wakwe. ²⁹ Ndi ilinso lyako likukupunuzya, lifolonkhole nu kulisumba ukutali na wewe. Amuno achizima kwe wewe ukuti chonga cha muwili wako chononeke ukulusya umuwili wako wonsi wuye ku gahena. ³⁰ Ndi ikasa lyako lya ndilo likulenga upunule, liputule nu kulisumba ukutali na wewe. Amuno achizima ukuti chonga mu muwili wako chononeka ukulusya umuwili wonsi wuye ku gahena. ³¹ Swinya chavwangwa, 'Wensi wino asamazya umuchi, lekani amupe e kalata wakumusya.' ³² Ukuwa nkhti kwe mwemwe ukuti aliwensi wino akusya umuchi, ukufumyako pa mulandu wa wuzelele, lyo wapa umuchi uwuzelele. Aliwensi wino angatwala umwanachi nye weyo, lyo nawenye wawomba uwuzelele. ³³ ''Swinya, mwivwa ukuti chavwangwa mu manda ya kali nye yayo, 'Mutakati muchite ichilapo chaufi, kweni muye ni vilapo ku Mfumu.' ³⁴ Ukuwa nkhuti kwe mwemwe, mutakaele mulape, nanthi akupitila mwiyulu, amuno awikalo wakwe Leza; ³⁵ nanthi a munsi ya pansi, amuno apano a pawulyatilo wakwe Leza; nanthi amu Yerusalemu, amuno amusumba wa Mfumu iyikulu. ³⁶ Nanthi akulapa pa mutwe wako, amuno utanga welewule ulunyele longa luwe luswepu pamwi lufite. ³⁷ Kweni lekani umuvwango winu wuwe 'Molimo, molimo,' pamwi 'Awe, awe.' chilichonsi chino chilulusya paa lyo chikufuma ku muwipe. ³⁸ '''Mwivwa ukuti kwavwangwa, 'Ilinso ku linso, swinya ilino ku lino.' ³⁹ Ukuwa nkhuti kwe mwemwe, mutakati muwalwa nu muwipe. Mumalo mwakwe, aliwensi angakuma ku lusaya lwa ndilo, mupe ni lya kamani nye. ⁴⁰ Ndi wumwi akulondesya aye kwi panzo na wewe nga akupoka ni chizwalo chako, muleke umunthunye weyo asende nu mwinjilonye. ⁴¹ Ndi wumwi akulonda umusuchilile katichi, wewe uyonjelezye katichi. ⁴² Mupe aliwensi wino akulenga, swinya utakati umunyosye wino akuvwamba inkhongole ukufuma kwe wewe. ⁴³ ''Mwivwa ukuti chavwangwa, 'Muwakunda awa palamani winu nu kupata awalwani winu.' ⁴⁴ Ukuwa nkhuvwanga namwe, mukunde awalwani nu kupepela wano wakuyimvya mwemwe, ⁴⁵ alyakuti mungize muwe mwe wana wakwe Tata winu wino ali mwiyulu. Amuno akakatusizya ilanzi ku wawipe na ku wazimanye, swinya akatuma imvula walungamane na ku wa nthalungama. ⁴⁶ Amuno ndi mwakunda wano wakunda mwemwe, achawilachi chino mungapochelela? Wuzye awa kasonkhesya nsonkho wasiwomba vyovyonye? ⁴⁷ Ndi mukulamuka awanyina winu mphela, mukuwomba chani ukulusya awanji? Wuzye asa vyo na Makandinye wakawomba? ⁴⁸ Achaleka mufwile muwe wawololoke, ndivino e Tata winu wino ali mwiyulu amuwololoke.