¹ Mu manda yalyanye Yohani Kabatizya wizile akulumbilila mu lupalang'ang'a lwa mu Yudeya atinji, ² ''Tontholokani, amuno uwufumu wa mwiyulu wuli mupipi.'' ³ Amuno wee a weni wino wavwangwa nu Yeseya umutumwa, atinji, ''Izwi lya wenga akupunda mu lupalang'ang'a, 'Yaniani inzila ya Mfumu, muziyololosye inzila zyakwe.'''' ⁴ Nomba Yohani azwite ivizwalo vya meya ya ngamila nu mupango wa mukowa ukuliwilizya mu mutembeleko wakwe. Ichakulya chakwe chalinji a makantha swinya uwuchi wa mulonde. ⁵ Ngapano Yerusalemu, Judeya wensi, swinya ni viputulwa vyonsi ukuliwilizya uluzi lwa Yorodani wayile kwe weliwe. ⁶ Awabatizwa ne weliwe mu luzi lwa Yorodani, ukuzumilizya amawembuko yawo. ⁷ Ukuwa kweni weni waweni awavule awa wa Farisi na wa Saduki wakwiza kwe weliwe ku kubatizwa, weni atili kwe woliwo, ''Mwemwe mwe wana wa nzoka, nga weweni awachenjezizye mwemwe ukuti musamale ukufuma ku wukali wuno wukwiza? ⁸ Komani ivikomwa ivya kuyana nu kutontholoka. ⁹ Mutakelenganie umuvwango wa pakasi pinu, 'Tuli nu Abrahamu ngati we tata witu.' Amuno nkhuwanena kuno Leza anga katusya awana wakwe Abrahamu ukufuma na mu mawe yaa. ¹⁰ Nakanonzinye i mpasa yazunzulwa pansi pa muti. Acho umuti wuliwonsi wuno wusikoma ivikomwa ivizima wukuputulwa nu kusumbwa mu mulilo. ¹¹ Nenji nkhubatizya mwemwe na minzi ku kutontholokwa, Ukuwa weni wino akwiza pansizi pakwe nene ali namaka ukulusya nenji, swinya nenji nthazipila nanthi akunyamula indyatu zyakwenye. Weni aliwabatizya nu Muzimu Mutele swinya nu mulilo. ¹² U lwelelo luli mu makasa yakwe ukuti ayele ichete ukufumya pa masyo ayakuyelela nu kuwunganika u tiligu wakwe ukuwika mu ng'anda ya kusunjila mwenemo, Kweni weni aliyocho iviswaswa nu mulilo wuno wutalitela wuzime,'' ¹³ Ngapano Yesu wiza ukufuma ku Galileya ukuya ku luzi lwa Yorodani ukuti aye abatizwe nu Yohani. ¹⁴ Kweni Yohani wapitilizizye ukwelezya ukukania weliwe, atinji, ''Nenji nkhulondeka ukuti imbatizwe na wewe nga wuzye ukwiza kwe nene?'' ¹⁵ Yesu atolelela swinya atili kwe weliwe, ''Chizumilizye ukwa nomba, amuno chilichete ukuti sweswe tufisye uwulungamane wonsi.'' Ngapano Yohani wazumilizizye weliwe. ¹⁶ Ala weni wabatizwa, Yesu wizile paponapapo ukufuma mu minzi, nga lolni, mwiyulu mwiyulizile kwe weliwe. Weni waweni u Muzimu wakwe Leza wukwika ngati ankhunda nu kupuza pakwe weliwe. ¹⁷ Lolani, izwi lyafuma mwiyulu likuti, ''Wee a mwana wane umukundwe. Nenji nkhusechela nkhaninye mwakwe weliwe.''