¹ Lyo Yesu akwasilwe mu Betelehemu ya mu Yudeya mu manda yakwe Herodi imfumu, awanthu awasambilile ukufuma ku wufumilo wi lanzi awafika mu Yerusalemu awati, ² ''Wuzye ali kwi weni wino akwasilwe imfumu ya wa Yuda? Tuweni inthanda ku wufumilo wi lanzi nga twiza ukuti tufukamile weliwe. ³ ''Pano Herodi imfumu wivya chonye choo, weni atamika, nu Yerusalemu wensi na weliwe. ⁴ Herodi aleta apaliponga wonsi a wasimapepo wakulu na wakawalika wa wanthu, nga awuzichizya woliwo, ''Wuzye akwinye kuno Kristu andi akwasilwe?'' ⁵ Awati kwe weliwe, ''Mu Betelehemu ya mu Yudeya, amuno choo achino chawalikwa nu mutumwa, ⁶ 'Ukuwa wewe, Betelehemu, munsi ya Yudeya, usi we mutichi mu wa nankholelo wa Yudeya, amuno ukuma mwakwe wewe muliyiza e katungulula wino ali dima awanthu wane Izirayeli.''' ⁷ Apano Herodi munkhama awita awanthu awasambilile ukuti awuzichisye woliwo imphindi iyenecho inthanda yololesile. ⁸ Weni atuma woliwo ku Betelehemu, ati, ''Pitani nu kuvwamba ichetechete umwana umutichi. Ndi mwamuzana, letani izwi kwe nene alyakuti naninye ningiza nu kufukamila weliwe.'' ⁹ Lyo wivwa imfumu, awapiilila nu wulendo wawo, nga ulutanda luno wayiweni ku wufumilo wi lanzi lyaya pankholelo yawo mpaka lwafika nu kwimilila myaa papela pano umwana umutichi walinji. ¹⁰ Pano waweni ulutanda, awasechela ni chimwemwe ichikulu nkhaninye. ¹¹ Awinjila mu ng'anda nga waweni umwana umutichi nu Mariya e nyina. Awapona pansi nu kufukamila weliwe. Awiyula insawo zawo nu kulenga wamupe ivyawila vya golidi, ivinuntchile, ni nthwilo. ¹² Leza achenjezya woliwo mu chilota watakanyochele kwe Herodi, achaleka wakatusya ukuya kunsi yawo ni yawo ukupitila inzila yinji. ¹³ Lyo wakatuka ukuya, umungelo wakwe Mfumu alolesile kwe Yosefe mu chilota nu kuti, ''Katuka, senda umwana umutichi nu nyina, nga musamalile ku Ijiputi. Mwikale kulyanye mpaka nenji nkhakunene, amuno Herodi alivwamba umwana umutichi ukuti amonone.'' ¹⁴ Uwusiku wulyanye Yosefe akatuka nu kusenda u mwana umutichi nu nyina nga wakatusya ukuya mu Ijiputi. ¹⁵ Wisile kulyanye mpaka imfwa ya Herodi. Choo chafisizye chino i Mfumu yavwanzile ukupitila mu mutumwa, ''Ukufuma ku Ijiputi nenji napunzile u mwana wane umonsi.'' ¹⁶ Ngapano Herodi, pano waweni kuno wakopekwa na wanthu awasambilile, wafuzilwe nkhaninye. Weni atuma nu kukoma wonsi awana awonsi wano walinji mu Betelehemu swinya mu chiputulwa chonsi wano walinji nimyaka yiwili ukwika, ukuyana ni mphindi iyenecho yino weni wakolowozizye ukufuma ku wanthu awasambilile. ¹⁷ Ngapano chafisilwe chino chavwanzilwe nu Yeremiya umutumwa, ¹⁸ ''Izwi livwisile mu Rama, ukulila nu kulosya ukukulu, Rakelo akulilila awana wakwe, swinya weni akukana ukusuwalizwa, umulandu wamazile.'' ¹⁹ Pano Herodi wafwa, lolani, u mungelo wa Mfumu alolesile mu chilota kwe Yosefe mu Ijiputi nga atili, ²⁰ ''Katuka nu kusenda umwana nu nyina nga uye kunsi ya Izirayeli, amuno wawo wano wavwambanga uwumi wa mwana wafwile,'' ²¹ Yosefe akatusile, asenda umwana nu nyina, nga wiza munsi ya Izirayeli. ²² Ukuwa Pano wivwile kuno Akelasi walamulilanga Yudeya mu malo ya yisi Herodi, weni alinji ni nthete ukuti aye kulyanye. Lyo Leza wasochezizwe weliwe mu chilota, weni afuma kweneko ukuya mu chiputulwa cha Galileya ²³ nu kuya yikala mu musumba wuno witwanga Nazareti. Choo chafisizye chino chavwangwa ukupitila mu watumwa, kuno weni aliwakwitwa amu Nazareti.