¹ Yesu wawavwanzizye swinya mu milumbe, atinji, ² ''Uwufumu wa mwiyulu wuli ngati imfumu yimwi yino yapekinie uwinga wa mwanakwe umulumendo. ³ Ayituma awawomvi wakwe ukuti waye wite wawo wano wisilwe ku winga, kweni wakanile ukwiza. ⁴ Swinya imfumu ayituma awawomvi wanji, yatili, 'Muwanene wano twisile, ''Lolani, imphekinie ichakulya cha manguzi. Inkhambaku yane ni ng'ombe izyine zyakomwa, swinya ivinthu vyonsi avisenganie. Zanji ku winga.''' ⁵ Ukuwa nanthi kusumba kweneko amano swinya awapita, wonga ku chalo chakwe, wunji ku milimo yakwe. ⁶ Awanji awalema awawomvi, awawakwelengula, nga wawakoma. ⁷ Imfumu yafulizwe, nga ayituma awavita wakwe nga awakoma wawo wakakoma nu kucha umusumba wawo. ⁸ Ngapano atili ku wawomvi wakwe, 'Twasengania uwinga, ukuwa wawo wano twisile watenelile. ⁹ Achaleka yani ku nzila indekana nga mwite awanthu awavule ku winga wonsi wano mungawazana.' ¹⁰ Awawomvi awaya ku nzila indekana nu kuwunganika apaliponga awanthu wonsi wano wazanile, awawipe na wazima ponga. Achaleka ing'anda ya winga ayizula na walendo. ¹¹ Ukuwa pano imfumu yiza ukulola awalendo, yaweni umunthu mulyanye wino atazwite ivizwalo vwa pa winga. ¹² Imfumu yatili kwe weliwe, 'Chiwuza, wiza wuliwuli koo sita ivizwalo vya pa winga?' Ukuwa umunthunye weyo atalinji ni chakuvwanga. ¹³ Ngapano imfumu yatili ku wawomvi, 'Munyepani umunthu wee amakasa na matamba, nga mumusumbe kunzi kumfizi, kuno kuliwa ukulila nu kusya amino.' ¹⁴ Amuno awavule awanthu wakakwitwa, kweni awatichi wakasolwa.'' ¹⁵ Ngapano awa Farisi wayile nu kuyisengania muno wanga muteyela Yesu mu mivwanjile yakwe. ¹⁶ Ngapano awatuma kwe weliwe awa sambilizi wawo, ponga nawa Nakamba. Awati kwe Yesu, ''Musambilizya, twamanya kuno ukalanda ichisinkha, swinya ukasambilizya inzila yakwe Leza mu chisinkha. Usi navyo ni ntchito vino awanji wakulanda, swinya usisenda imbali pakasi pa wanthu. ¹⁷ Nomba tunene sweswe, wuzye ukwelengania chani? Alisundo ukusonkha insonkho kwe Kayisala pamwi awe?'' ¹⁸ Ukuwa Yesu wivwichisizye uwuwipe wawo nga atili, ''Achani fwandi chino munelezya nene, mwe wawufi? ¹⁹ Ndanjizyani ulu ndalama luno mukakomela insonkho,'' Ngapano waleta e denari kwe weliwe. ²⁰ Yesu atili kwe woliwo, ''Ali picha ni zina lyawenu lyoo?'' ²¹ Awati kwe weliwe, ''Vya Kayisara.'' Ngapano Yesu atili kwe woliwo, ''Apo mupe kwe Kayisara ivinthu vino avya Kayisara, swinya mupe kwe Leza ivinthu vino avya kwe Leza.'' ²² Pano wivwa choo, awazunguka. Ngapano wamusya nu kufuma penepo. ²³ Pawandanye wowo awa Saduki wamwi, wano wakalanda ukuti kutawa ukuzyulupuka, wizile kwe weliwe. Awa kolowozya weliwe, ²⁴ awati, ''Musambilizya, Mose atili, 'Ndi umonsi afwa, nanthi kusya awana, u munyina wakwe afwile apyane umuchi ukuti nga akwate awana wa munyina wakwe wino afwile.' ²⁵ Kwalinji awanyina munenulambali (7). Uwakutalichila atwala nga pano wafwa. Nanthi kuleka awana, asyile umuchi ku munyina wakwe. ²⁶ Ngapano umunyina wa chitiwili awomba wuliwonga, ngapano uwa chititatu, chawa wowonye ukufika pakwe munyina wakwe uwa munenulambali. ²⁷ Lyo wonsi wafwa, nawenye umwanachi afwa. ²⁸ Nomba pakuzyulupuka, umwanachi aliwa wakwe wenu mu wanyina munenulambali? Amono wonsinye wamutwazile umwanachi.'' ²⁹ Ukuwa Yesu atolelela nga ati kwe woliwo, ''Mukupuvya umulandu mutamanya amawaliko pamwi amaka yakwe Leza. ³⁰ Amuno mu kuzyulupuka mutawa ukutwala pamwi ukutwalwa. mu malo mwakwe, wali ngati awa ngelo mwiyulu. ³¹ Ukuwa ukuyana nu kuzyulupuka kwa wafwe, wuzye mutawelenga chino chavwangwa kwe mwemwe nu Leza, ukuti, ³² 'Nenji ne Leza wakwe Abrahamu, Leza wakwe Iyizeki, swinya Leza Leza wakwe Yakobi' Leza asa we Leza wa wafwe, kweni uwa walanzi.'' ³³ Pano amawumba yivwa choo, awazunguka pa chisambilizyo chakwe. ³⁴ Ukuwa pano awa Farisi wivwa kuno Yesu wamyalalika awa Saduki, awa yiwungania apaliponga. ³⁵ Wonga mwe woliwo, e kamanya mwi sundo, akolowozizye weliwe ni wuzyo, ukwelezya weliwe -- ³⁶ ''Musambilizya, alisundochi ikulu mu masundo?'' ³⁷ Yesu atili kwe weliwe, '''Uwaunda Imfumu e Leza wako nu mwenzo wako wonsi, nu moyo wako wonsi, na melenganio yako yonsi.' ³⁸ Lyoo alikulu swinya isundo lyakutalichila. ³⁹ Swinya ilya chitiwili nalyonye achilichonga -- 'Uwakunda umuwuyo ndivino wayikunda wemwenecho.' ⁴⁰ Pa masundo yaa yawili apo lyeyamila isundo lyonsi na .'' ⁴¹ Nomba pano awa Farisi wachilinji wawungine apaliponga, Yesu awakolowozizye ni wuzyo. ⁴² Atili, ''Wuzye mukwelengania chani pavya Kristu? A mwana wakwe wenu?'' Awati kwe weliwe, ''A mwana wakwe Davidi.'' ⁴³ Yesu atili kwe woliwo, ''Nga wuliwuli e Davidi mu Muzimu akumwita Mfumu, atinji, ⁴⁴ 'Imfumu yatili ku Mfumu yane, ''Yikala kwi kasa lyane ilya ndilo, suka awalwani wako wawe pansi pa matamba yako'''? ⁴⁵ Ndi Davidi akwita Kristu 'Mfumu,' angawa wuli mwana wakwe Davidi?'' ⁴⁶ Nanthi wonga uwakukwanisya ukutolelela weliwe nizwi, swinya nanthi wumwi umunthu uwakwelezya ukukolowozya weliwe na mawuzyo ukufuma uwandanye wowo ukutwalilila.