¹ Lyo Yesu na wasambilizi wakwe wapalamila ukufika mu Yerusalemu swinya wiza ku Betifegi, pa lupili lwa Olivi, apano Yesu atuma awa sambilizi wawili, ² atinji kwe woliwo, ''Yani mu kaya ka pankholelo, swinya pano mwinjilavye mulizana indokwe yipinyilwe palyanye, nu mwana wakwe. Muzisapule nu kwiza nazyo kwe nene. ³ Ndi wumwi wavwanga chimwi kwe mwemwe ivya ndokwe, mwandi muti, 'Imfumu yikuzilonda,' nga umunthunye weyo andi azitume na mwemwe.'' ⁴ Nomba choo chiza ukuti chilya chino chavwangwa ukupitila mwe kasema chingafiswa. Kasema atili, ⁵ ''Mumunene u mwana umwanachi wa Ziyoni, 'Lolani, Imfumu yinu yikwiza kwe mwemwe, Umwakuyichefya swinya akwe.ile indokwe -- pa mwana wa ndokwe, indokwe yino yakunyamula. ⁶ Ngapano awa sambilizi awaya nu kuwomba ndivino Yesu awanenile. ⁷ Awaleta indokwe nu mwana wakwe nga wawika ivizwalo vyawo penepo, nga Yesu ayikala pa vizwalo vyawo. ⁸ Awavule mwi wumba awalambalika ivizwalo vyawo mu musewo, swinya awanji awaputula insambaukufuma mu miti nu kulambalika mu musewo. ⁹ Ngapano amawumba yano yayile pa nkholelo ya Yesu na yano yalinji pansizi zya weliwe wapundanga, ''Hosana kwe mwana wa Davidi! Amulotwe wino akwiza mwi zina lya Mfumu! Hosana mu pela!'' ¹⁰ Pano Yesu wizile mu Yerusalemu, umusumba wonsi awuyingana swinya awati. ''Wuzye wewenu wee?'' ¹¹ Iwumba alitolelela, ''Wee we Yesu e kasema ukufuma ku Nazereti mu Galileya.'' ¹² Apano Yesu ayinjila mwi tempeli. Asamazya ukuya kunzi wonsi wano wakalanga nu kukazya mwi tempeli, nga asamphania ama tebulo ya wakapilula wa mphiya ni vipuna vya wawo wano wakazyanga inkhunda. ¹³ Atili kwe woliwo, ''Chawalikwa, 'Ing'anda yane yiliwayitwa ing'anda ya mapepo,' kweni mwayiwika yiwe ya wakapoka.'' ¹⁴ Ngapano inthonkho na walemale awiza kwe weliwe mwi tempeli, nga wawapozya. ¹⁵ Ukuwa pano e simapepo mukulu na wakawalika waweni ivizungusyo vino wachitanga, swinya pano wivwa awana wakupunda mwi tempeli swinya wakuti, ''Hosana kwe Mwana wa Davidi,'' Awafulwa nkhaninye. ¹⁶ Awati kwe weliwe, ''Wuzye ukwivwa cho wakuvwanga?'' Yesu atili kwe woliwo, ''Molimo! Lelo mutatela muwelenge, 'Ukufuma mu malomo ya wana awacheche swinya awana awakonswa uyisenganizizye ukutumvya'?'' ¹⁷ Ngapano Yesu awasya nga afuma mumusumba ukuya ku Betane nu kulala kulyanye. ¹⁸ Nomba akachelochelo lyo akunyochela mu musumba, wivwa inzala. ¹⁹ Pakulola umuti wa nthumbusya mumbali ya musewo, aya ku muti nga azana nanthi chimwi suka amatundu. Ati ku muti, ''Mutakize mutele muwe ichikomwa ukufuma mwakwe wewe nanthi lumwi swinya,'' nga paponapapo umuti wanthumbusya awufota. ²⁰ Pano awa sambilizi wachiweni, awazunguka nu kuti, ''Wuzye chawa wuli ukuti umuti wufote paponapapo?''' ²¹ Yesu atolelela nga ati kwe woliwo, ''Awenche nkhuwanena, ndi muli ni suwilo swinya mutakukayika, mutaliwomba chenga chino chawomvilwe ku muti wa nthumbusya, kweni mulilanda ku mwamba woo, 'Unyunkhulwe swinya usumbilwe mwe sumbi,' nga chiliwombwa wowonye. ²² Chilichonsi chino mwalenga mwi pepo, mwisuwilo, mulipochelela.'' ²³ Pano Yesu wiza mwi tempeli, e simapepo mukulu swinya awasongo wa wanthu awiza kwe weliwe pano wachilinji akusambilizya nga awati, ''Wuzye amakachi yano ukuwomvya ukuti uwombe ivinthu vyoo, swinya wewenu wino apile wewe amaka yaa?'' ²⁴ Yesu atolelela nu kuti kwe woliwo, ''Nanenye nandi imbakolowozye ni wuzyo lyonga. Ndi mwanena nene, nandi imbanene amakachi yano nkhuwombela ivinthu vyoo. ²⁵ U batizyo wakwe Yohani -- akwinye kuno wafuma? Ukufuma mwiyulu pamwi ku wanthu?'' Awavwanzania pakasi pawo, awati, ''Ndi twati, 'Ukufuma ku wanthu,' wandi ati kwe sweswe, 'Achani fwandi nomba mutasuwizile weliwe?' ²⁶ Ukuwa ndi twati, 'Ukufuma ku wanthu,' iwumba lyandi litutinie, amuno lyachindika e Yohani ndivino e kasema.'' ²⁷ Ngapano awatolelela Yesu nu kuti, ''Tutamanyile.'' Nawenye atili kwe woliwo, ''Nanenye nthandi imbanene ukuti amakachi yano nkhuwomvya ukuwomba ivinthunye vyoo. ²⁸ Lelo mukwelengania chani? Umunthu walinji na wana wawili awalumendo. Ayile kuwa kutalichila nu kuti, 'Mulumendo, yanga uye uwombe mu chalo cha vikomwa.' ²⁹ ''Umulumendo atolelela nga ati, 'Nakana,' ukuwa lyo papita imphindi iyitichi wiza wayilonga nga aya. ³⁰ ''Ngapano umunthunye weyo ayile kuwa chitiwili nu kulanda chilichonga. Umulumendo atolelela nga ati, 'Nandi inje, mukwayi,' ukuwa atayile. ³¹ Wuzye pa walumendo wawili weweni wino awomvile ukulonda kwakwe yisi?'' Awati, ''Uwakutalichila.'' Yesu atili kwe woliwo, ''Nakawuzyenye nkhuwanena, awa kasonkhesya wa nsonkho na wa malaya waliyinjila mu wufumu wakwe Leza lyo mwemwe mutani mwinjile. ³² Amuno Yohani iyizile kwe mwemwe mu nzila ya wulungamane, kweni mutamusuwizile. Ukuwa awa kasonkhesya wa nsonkho na wa malaya wamusuwizile. Kweni mwemwe, napano mwaweni choo, mutatontholosile pa nkholelo nukusuwila weliwe. ³³ ''Teyelezyani ku mulumbe wunji. Kwalinji umunthu, u mweni chalo. Akomezile ivikomwa mu chalo, achiliwilizya ni miti, nukwimba ichisuyilo chi pala mwenemo, azenga ing'anda ya wakalindilila, nga ayazimya chenecho ku wakalima wa vikomwa. Ngapano aya kunsi iyinji. ³⁴ Pano imphindi ya kuvuna yapalamila, atuma wamwi mu wawomvi wakwe ukuti waye ku wakalima ukuti waye wasende ivikomwa vyakwe. ³⁵ Ukuwa wa kalima wa vikomwa awasenda awawimvi, wuma wonga, wakoma wunji, swinya waponkhola na mawe wunji. ³⁶ Na swinya, umweni chalo atuma awawomvi wanji, awavule ukulusya pakutalichila, ukuwa wakalima wa vikomwa awawachita ndi vino wawachitile awa kutalichila. ³⁷ Lyo papita vyoo, umweni chalo atuma umwana wakwe umulumendo umwenecho kwe woliwo, ati, 'Walichindika umulumendo wane.' ³⁸ ''Ukuwa pano wakalima waweni umulumendo, awavwanzania pakasi pawo, 'Wee a mpyani. Zanji, lekani tumukome nga tupokwe ivyakupyana vyakwe.' ³⁹ Achaleka awamusenda, nu kusumbila weliwe kunzi kwa chalo nga awamukoma. ⁴⁰ Nomba pano umweni chalo akwiza, wuzye alichita chani ku wakalimanye wawo?'' ⁴¹ Awati kwe weliwe, ''Aliyonona awanthunye awatumphe wawo umwa wukali nkhaninye, nga aliyazimya ichalo ku wa kalima wanji, awanthu wano walimupa ivya muchalo vino avyakwe pa mphindi ya kuvuna. ⁴² Yesu atili kwe woliwo, ''Wuzye mutatela muwelenge mu mawaliko, 'Iwe lino wakazenga walikanile alyo lyawa lyakulondeka. Choo chafuma ku Mfumu, swinya achizima mu minso yitu'? ⁴³ Achaleka nkhuti kwe mwemwe, uwufumu wakwe Leza wulipokwa kwe mwemwe nga wulipewa kunsi yino yikakoma ivikomwa vyakwe. ⁴⁴ Aliwensi wino waponela piwe lyoo alifwanthika mwalwe. Ukuwa aliwensi wino iwe lyamuponela alitinzwa.'' ⁴⁵ Pano awa simapepo awakulu na wa Farisi wivwa imulumbe yakwe, awivwichisya kuno wavwanganga ivya woliwo. ⁴⁶ Pakuvwamba ukuti wamuleme, watinanga iwumba, umulandu awanthu wamulolanga ngati we kasema.