¹ Nomba kwalinji umu Farisi wino izina walinji we Nikodemasi, e kalongolela wawa Yuda. ² Wee umunthu wizile kwe Yesu uwusiku nu kuti kwe weliwe, ''Rabi, tumanyile kuno we musambilizya wino wafuma kwe Leza, amuno pasi nanthi wenga wino angawomba ivilolwa vino ukuchita penga pano Leza ali nawe.'' ³ Yesu atolelela ati kwe weliwe, ''Awenche, awenche, penga pano wumwi wakwatwa swinya, wine atanga lole uwufumu wakwe Leza.'' ⁴ Nikodemasi ati kwe weliwe, ''Chinga wuli ukuti umunthu akwatwe pano we songo? Weni atanga ayinjile aka chitiwili mu wula wakwe nyina nu kukwatwa, vwile?'' ⁵ Yesu atolelela, ''Awenche, awenche, penga pano wumwi wakwatwa ku minzi nu Muzimu, wine atanga yinjile mu wufumu wakwe Leza. ⁶ Chilya chino chakwatwa ku muwili amuwili, swinya chilya chino chakwatwa ku Muzimu amuzimu. ⁷ Utaka zunguke kuno nati kwe wewe, 'Úfwile wakwatwa swinya.' ⁸ Inkhungu yikaputa konsi kuno yikulonda; ukakwivwa ichongo, kweni utangandi umanye kuno yikufuma pamwi kuno yikuya. Avyo chili kwe wensi wino wakwatwa ku Muzimu.'' ⁹ Nikodemasi atolelela nu kuti kwe weliwe, ''Vingawa wuli ivinthunye vyoo?'' ¹⁰ Yesu atolelela ati kwe weliwe, ''Wuzye we musambilizya wa Izirayeli, kweni utakwivwichisya ivinthu vyoo? ¹¹ Awenche, awenche, nene nkhunena kwe wewe, tukulanda chino twachimanya, swinya tukusimichila ivya chino twachilola. Kweni utakuzumila ukusimichila kwitu. ¹² Ndi nakunenile ivya nsi ya pansi kweni utakusuwila, wuzye uli suwila wuli ivinthu vya mwiyulu? ¹³ Nanthi wenga atela akwela mwiyulu kweni wino wika ukufuma kwiyulu -- u Mwana wa Munthu. ¹⁴ Ndi vino Musa ayinusya inzoka mu lupalang'ang'a, acho afwile u Mwana wa munthu ayinuswe papela, ¹⁵ ilyakuti wonsi wano wasuwila mwe weliwe wangawa nu wumi wa muyayaya. ¹⁶ Ndi vino Leza wakundisya insi, ilyakuti wapa u Mwana wakwe wenga, ukuti wensi wino akusuwila mwe weliwe atalifwa kweni aliwa nu wumi wamuyayaya. ¹⁷ Ndi vino Leza ata tuma u Mwana munsi ukuti ayisusye insi, kweni ilyakuti apususye insi ukupitila mwakwe weliwe. ¹⁸ Weni wino wasuwila mwe weliwe watangamususya, kweni weni wino atakusuwila wamususya kali umulandu weni atasuwizile mwi zina lya wenganye u Mwana wakwe Leza. ¹⁹ Choo achili chifukwa cha kupingula: Uwuwepe wiza munsi, kweni awanthu wakunzile ifisi ukuchila uwuswepe umulandu imilimo yawo ayiwipe. ²⁰ Ndi vino wensi wino akawomba iviwipe wapata uwuswepe, swinya atanga yize ku wuswepe, ilyakuti imilimo yakwe yitalilolechela. ²¹ Kweni, weni wino akachita ichisinkha akiza kuwuswepe ilyakuti chinga loleka pa lwenze kuno imilimo yakwe yawombwa mwe Leza.'' ²² Pansizi pe choo, Yesu na wasambilizi wakwe wayile kunsi yaku Yudeya. Kulyanye wasumba imphindi yimwi nu kubatizya. ²³ Nomba Yohani nawenye wabatizyanga mu Ayenoni papipi ku Salimu umulandu kwalinji aminzi ayavule kulyanye. Awanthu wizanga kwe weliwe swinya wabatizwanga, ²⁴ amuno Yohani wachilinji ukumutayila mu vingololo. ²⁵ Ngapano pawa ukupokota pakasi pa wamwi awasambilizi wakwe Yohani na wa Yuda ivya kupwila. ²⁶ Awaya kwe Yohani nu kuti kwe weliwe, ''Rabi, wenga wino walinji na wewe ku mbali yinji iya luzi lwe Yorodani, ivya weliwe wenji ukusimichila, lola, weni akubatizya, swinya wonsi wakuya kwe weliwe.'' ²⁷ Yohani atolelela, ''Umunthu atanga pochelele chimwi kanonzi chipelwe kwe weliwe ukufuma mwiyulu. ²⁸ Mwemwe mwenga mungasimichila kuno natili, 'Nene asa ne Kristu,' kweni ukuwa, 'Nene natumwa ukukolela weliwe.' ²⁹ U nawinga umwenecho we siwinga. Nomba umuwuye wakwe siwinga, wino akimilila nu kwivwa weliwe, akusechela nkhaninye umulandu wa lizwi lyakwe siwinga. Choo, nomba, achimwemwe chane ichikwane. ³⁰ Weni afwile akule nene mfwile ntchepe. ³¹ Weni wino akufuma kupela ali papela pe wonsi. Weni wino ukufuma pansi yapansi akufuma pansi swinya akulanda ivya nsi ya pansi. Weni wino akufuma mwiyulu ali pamwanya pa wonsi. ³² Weni akusimichila ivya chino waweni nu kwivwa, kweni nanthi wumwi akuzumilizya ukusimichila kwakwe. ³³ Weni wino wapochelela uku simichila kwakwe wuvwichisya kuno Leza achisinkha. ³⁴ Amuno wenga wino Leza watuma akuvwanga amazwi yakwe Leza. Amuno weni atanga ape u Muzimu pa chipimo. ³⁵ E Tata wakunda u Mwana swinya amupile ivinthu vyonsi mwikasa lyakwe. ³⁶ Weni wino wasuwila mwe Mwana ali nu wumi wamuyayaya, kweni wino asikwivwila u Mwana atalilola uwumi, kweni uwukali wakwe Leza wuliyikala pakwe weliwe.''