¹ Ala pano papita amanda yatatu, kwalinji uwinga ku Kana waku Galileya, nu nyina wakwe Yesu walinji kulyanye. ² Yesu na wasambilizi wakwe wizile witwa ku winga. ³ Pano umutawa wasila, e mama kwe Yesu atili kwe weliwe, ''Watali nu mutawa.'' ⁴ Yesu atili kwe weliwe, ''Mwanachi, achani chino ukwiza kwe nene? Imphindi yane yitani yifike.'' ⁵ E nyina atili kuwawomvi, ''Chilichonsi weni andi anene kwe mwemwe, muchichite.'' ⁶ Nomba palyanye palinji insembo izya mawe mutanda izya kusembela iminzi zino wawomvyanga pa mansundo yawa Yuda yakukomelezya ukusamba, zyalinji ankhulu ivipimo viwili ukuya ku vitatu. ⁷ Yesu atili kwe woliwo, ''Izuzyani insembo na minzi.'' Achaleka wizuzizye ukufika munsingo. ⁸ Apano wawanenile awawomvi, ''Sendani zimwi muye nazyo kwe songo wa vyakulya.'' Achaleka wawomvile wowonye. ⁹ E songo wavyakulya wizile wawonja aminzi yano yizile yawa amutawa, kweni atamanyile kuno yafumile (kweni awawomvi wano wasembanga aminzi wamanyile). Ngapano apunda u mweni winga umonsi ¹⁰ nu kuti kwe weliwe, ''Wensi umunthu akaleta umutawa uwuzima pakutalika nga pano wakolwa apo akaleta wuno wusi chete. Kweni wenji wasyile umutawa uwuzima ukufika nomba.'' ¹¹ Choo chalinji achilolesyo chakutalichila Yesu wawomvile mu Kana waku Galileya, swinya wizile wawumbula uwuchindame wakwe, nga awasambilizi wakwe wasuwizile mwakwe weliwe. ¹² Lyo papita choo Yesu, e nyina, awanyina wakwe, na wasmbilizi wakwe wayile ku Kapenamu nga waya wikala kweneko amanda matichi. ¹³ Nomba ukupitililwa kwa wa Yuda kwalinji mupipi, nga pano Yesu waya mu Yerusalemu. ¹⁴ Weni wazanile awa kukazya inkhambaku ni ng'onzi ni nkhunda mwi tempeli, wa kapilula wa mphiya wikazile mulyanye. ¹⁵ Achaleka wapanzile umusanzu watukusa nu kusamazya wonsi ukufuma mwi tempeli, apali ponga ni ng'onzi swinya ing'ombe. Weni wasasizye imphiya zya wakapilula nu kupenyulania vino wawisile penepo. ¹⁶ Kwe wano wakazyanga inkhunda atili, ''Sendani ivinthu vyoo ukuma moo. Muleke ukuwomvya ing'anda ye Baba wane ngati amasyo yakukazizya. ¹⁷ Awa sambilizi wakwe awizuka kuno kwawalikwa, ''Ukupitisya kwa pa ng'anda yako kukundya.'' ¹⁸ Apano awakazumilizya wawa Yuda awatolelela nukuti kwe weliwe, ''Wuzye ichilolwachi chino ulitulanjizya, muno ukuwombela ivithu vyoo?'' ¹⁹ Yesu atolelela, ''Mongolania i tempeli lyoo, swinya mu manda yatatu ndiyikatusya.'' ²⁰ Ngapano wakapanzya wachi Yuda awati, ''I tempeli lyoo lyazenzilwe mu myaka amakumi yani nu mutanda, ngapano ungayikatusya mu manda yatatu?'' ²¹ Lelo, wavwanzile ivya tempeli ya muwili wakwe. ²² Watili wazyulupuka ku wafwe, awasambilizi wakwe wizile wizuka kuno wavwanzile choo, achaleka wasuwizile mwizwi nu muvwango wino Yesu wavwanzile. ²³ Nomba pano walinji mu Yerusalemu pakusunkhana kwe chakupitililwa, awavule wasuwizile mwi zina lyakwe pano waweni ivilolwa vino wawomvile. ²⁴ Kweni Yesu atasuwizile mwe woliwo umulandu wawamanyile wonsinye, ²⁵ amuno atalondanga nanthi wumwi ukumusimichila ivya munthu, amuno weni wamanya chino chawa mu munthu.