¹ Ngapano Pilato wasenda Yesu nu kumuvwapula. ² Awa vita awaluka imphumphu ya myunga. Awazwika kumutwe wakwe Yesu, nu kumuzwika umwinjilo umuwenzu. ³ Wizile kwe weliwe nu kuti, ''Eta, Imfumu yawa Yuda!'' Nga awamuvwapula. ⁴ Ngapano Pilato aya kunzi swinya nu kuti kwe woliwo, ''Lolani, nkhumuleta panzi kwe mwemwe ilyakuti mumanye ukuti nthamuzanile numulandu.'' ⁵ Achaleka Yesu wafumile panzi, azwite imphumphu ya myunga nu mwinjilo umuwenzu. Pilato atili kwe woliwo, ''Lolani, wee awili munthu!'' ⁶ Achaleka pano wa simapepo wasongo nawa kalindilila walola Yesu, wizile awapunda nu kuti, ''Musayikani, musayikani!'' Pilato ati kwe woliwo, ''Musendani mwewenecho swinya mukamusayike, muno nthazanile umulandu nanthi wumwi mwe weliwe.'' ⁷ Awa Yuda awamutolelela, ''Tuli ni sundo, swinya ukulingana ni sundo afwile afwe umulandu wayitumvyanga ukuwa Umwana wakwe Leza.'' ⁸ Pano Pilato wivwa imvwango yoo, wizile watina nkhaninye, ⁹ nu kwinjila swinya mu ng'anda nkhulu nu kuti kwe Yesu, '''Wuzye ukafuma kwi?'' Kweni Yesu atamipile nanthi akutololela. ¹⁰ Ngapano Pilato atili kwe weliwe, ''Utakulanda kwe nene? Utamanyile kuno ndi na maka iya kukusapulila wewe, swinya amaka iya kukusayichila wewe? ¹¹ Yesu amutolelela, ''Usinamaka nanthi yamwi pakwe nene kano yano yapilwe kwe wewe ukufuma kupela. Achaleka, wino andemesile nene kwe wewe ali nu luwembu ulukulu.'' ¹² Pakutolelela koo, Pilato ayelezya ukuti amusapule, kweni awa Yuda awapunda, awati, ''Nga wasapula umunthu wee, usi we chiwuzya chakwe Kesari.'' Wensinye wino akuyiwika uwufumu wenga akulanda umwakususyania nu Kesari.'' ¹³ Pano Pilato wivwile amazwi yaa, amufumya Yesu panzi nu kwikala pa chilimba icha kupanzizya pa masyo yano yitwanga "Apapamanthile'' mu mvwango ya chi Aramayiki, ''Gabatha.'' ¹⁴ Nomba walinji a wanda uwakusengania ichipitililwa, pi ola lya mutanda. Pilato watili ku wa Yuda, ''Lolani, paa pali imfumu yinu!'' ¹⁵ Awapunda nkhani, ''Ukutali nawe, ukutali nawe; musayikani!'' Pilato atili kwe woliwo, ''Wuzye insayike imfumu yinu?'' E simapepo mukulu atolelela, ''Tusi ni mfumu yinji suka Kesari.'' ¹⁶ Ngapano Pilato wawapile Yesu ukuti wamusayike. ¹⁷ Ngapano wasenda Yesu, nu kufuma panzi, ayisendela uwuchingane umwenecho, ukuya ku masyo ayakwitwa ''Amasyo yi Fupa,'' chino mumvwango yachi Aramayiki yakwitwa ''Gologota'' ¹⁸ Awamusayika Yesu kulyanye, weliwe na wanthu wawiri, wenga kumbali ni mbali, ne Yesu pakasi. ¹⁹ Pilato nawenye wawalisile ichimanyikwilo swinya achiwika pa wuchingane. Palyanye pawalisilwe: YESU WAKU NAZARETI, IMFUMU YAWA YUDA. ²⁰ Awavule awa Yuda wawazyanga ichimanyilo umulandu wakuti amasyo yano wamupamanthizile Yesu yalinji papipi nu musumba. Ichimanyilo chawalisilwe muchi Aramayiki, Latini ni chi Griki. ²¹ Apano wasimapepo wakulu awa wa Yuda awati kwe Pilato, ''Utakawalike ''Imfumu ya wa Yuda'' kweni kano. 'Wee watinji, ''Ne Mfumu ya wa Yuda.'''' ²² Pilato atolelela, ''Vyo mbalisile avyo mbalisile.'' ²³ Pano awa vita wamupamanthila Yesu, wasenzile ivizwalo vyakwe, awankhana mu vipya vini, wenga chonga wenga chonga; Swinya ni chilundwa. Lelo ichilundwa chitalinji nu musumwa, wakovile ichipya chonga ukufuma kupela. ²⁴ Ngapano awati wenga ku muwuye, ''Tutize tuwulepule, kweni ukuwa tuwombe amayele ilyakuti tusole wuno wandi wuwe awakwe.'' Choo chawomvilwe ukuti amawaliko yafiswe yano yatili, ''Wankhine ivizwalo vyane nukuwomba amayele pa vizwalo vyane.'' Vyoo avino awa vita wawomvile. ²⁵ Nomba awimilile pambali pa wuchingane wakwe Yesu walinji enyina, inkhazi yakwe nyina, Mariya umuchi we Kulopasi, nu Mariya Magadaleni. ²⁶ Pano Yesu waweni nyina swinya nu musambilizi wino wamukunzile wimilile apafupi, atili kwe nyina, ''Mwanachi, lola umwana wako!'' ²⁷ Ngapano atili kwe musambilizi, ''Lola, u nyoko!'' Ukufuma pi ola lyolyonye u musambilizi wamusenda ukuya ku ng'anda yakwe. ²⁸ Pansize yakwe choo, wamanya ukuti vyonsi vyasila swinya ilyakuti amawaliko yali fiswa, Yesu atili, ''Ndi nulusala.'' ²⁹ Ichilanga ichizule ni pala ikanthuke wawisile palyanye, apano watumphika e pamba mwipala ikanthuke kwitete awanyamula awamuwika ku mulomo. ³⁰ Pano Yesu wang'wa ipala ikanthuke, atili, ''Chasila.'' Ayinamika umutwe nu kutaya umuzimu wakwe. ³¹ Ngapano awa Yuda, umulandu walinji awanda uwakusengania, swinya ilyakuti imiwili yitakasyale pawuchingane mu wanda wa Sabata (muno i Sabata lyalinji alikankhala), awalenga Pilato ukuwakonthola ivinama swinya nukuwafumya. ³² Ngapano awa vita wiza nu kukonthola ivinama vya munthu uwakutalichila nu wachitiwili wano wapamanthizilwe ponga ne Yesu. ³³ Pano wizile pe Yesu, waweni ukuti afwile kali, achaleka watakonthozile ivinama vyakwe. ³⁴ Chingatenga, wonga uwa vita alasa Yesu paluwazu ni sumo, nga paponapapo uwazi na minzi avifumamo. ³⁵ Wenga wino waweni choo wasimichizizye, swinya ukusimichizya kwakwe achisinkha. Amanyile ukuti chino wavwanzile achisinkha ilyakuti namwe musuwile. ³⁶ Ukuwa ivinthunye vyoo vyachitisile alyakuti amawaliko yafiswe, ''Nanthi limwi ifupa lyakwe lilikonthoka.'' ³⁷ Swinya, amawaliko yanji yakuti, ''Walimulola wino wamulasile.'' ³⁸ Pansizi pakwe vyoo, Yosefe waku Arimatiya, muno walinji a musambilizi wakwe Yesu (kweni munkhama muno watinanga awa Yuda), walenzile e Pilato ndi angawusenda umuwili wakwe Yesu. Pilato wamuzumilizizye. Nga Yosefe wizile asenda umuwili wakwe. ³⁹ Nikodemasi nawenye wizile, wulyanye wino pakutalichila wayile kwe Yesu uwusiku. Walesile ivisazinkhane ivya mure nu wubani, malita umwanda wonga. ⁴⁰ Apano awasenda umuwili we Yesu nu kuwunyepa umwenda uwutelepe nu tununtchile, amuno yalinji amiwele yawa Yuda ukuzika ivyala. ⁴¹ Nomba pa masyo pano wamupamanthizile palinji ichalo, swinya muchalonye chocho mwalinji inkhungwe imphya yino pasi umunthu nanthi wumwi wino wazisilwe. ⁴² Muno walinji u wanda wakuyipekania uwa wa Yuda swinya umulandu inkhungwe yalinji papipi, wamulalisile Yesu mwenemo.