¹ Walile Yesu wavwanga amazwi yaa, wafumile nawa sambilizi wakwe awaya kumbali yinji ya chifwansi che Kidironi, kuno kwalinji ichalo muno weliwe nawasambilizi wakwe winjizile. ² Nomba Judasi, wino waynga ukumulemeka, nawenye wamanyile amasyo, amuno Yesu wayanga kulyanye penye nawa sambilizi wakwe. ³ Apano Yudasi, mukutungulula iwumba lya wa vita nawa kalindilila ukufuma kuwa simapepo wakulu nawa Farisi, wayile kulyanye ni nyali, inkhozyo ni vyanzo. ⁴ Apano Yesu wino wamanyile ivinthu vyonsi vino vyawombwanga kwe weliwe, wayile kunkholelo nukuwa kolowozya, ''Wuzye weweni wino ukuvwamba?'' ⁵ Awa mutolelela, ''Yesu waku Nazareti.'' Yesu atili kwe woliwo, ''Anene.'' Yudasi, wino wamulemesile, nawenye wimilile nawa vita. ⁶ Achino pano watili kwe woliwo, ''Anene,'' awapita ichansizi nukupona pansi. ⁷ Apano wakolowozya swinya, ''Wuzye weweni wino mukuvwamba?'' Awati swinya, ''Yesu waku Nazareti.'' ⁸ Yesu atolelela, ''Mbanenile kuno anene. Achino ndi mukuvwamba nene, wasyani waa wapita.'' ⁹ Chalinji acha kufisya amazwi yano watili: ''Mwe wawo umphile, nthasumba nanthi wenga.'' ¹⁰ Apano Simoni Peturo, wino walinji nu lupanga, asomola nu kumuma umuzya wa simapepo mukulu nu kumusenga ikutwi lye ndilo. Lelo izina lya muzya walinji we Malikusi. ¹¹ Yesu ati kwe Peturo, ''Someka ulupanga mu chipata chakwe. Fwandi nthanga ing'we e komeji wino Tata wapile nene?'' ¹² Apo iwumba lya wavita ne musika, nawa kalindilila wawa Yuda, awalema Yesu nu kumunyepa. ¹³ Wamutunguluzile pakutalika kwe Anasi, amuno walinji we yisivyala we Kayafasi, wino walinji we simapepo mukulu umwaka wulyanye. ¹⁴ Nomba Kayafasi walinji weliwe wino wapile isochezyo ku wa Yuda kuno achizima umunthu wenga afwile awanthu. ¹⁵ Simoni Peturo wakonsile Yesu, nu musambilizi winji wawomvile wowonye. Lelo umusamb ilizi weyo amumanyikwe kwe simapepo mukulu, nga winjizile ne Yesu muluwungo lwe simapepo mukulu; ¹⁶ kweni Peturo wimilile pa mulyango kunzi. Achino umusambilizi winji, wino walinji amumanyikwe kwe simapepo mukulu, wafumile kunzi nukuvwanga kwe mukazyana wino walolelanga pa mulyango, nga aleta Peturo mukasi. ¹⁷ Apano umuwonvi uwa chanachi, e kayamwite, ati kwe Peturo, ''Wuzye asawe wenga uwa wasambilizi wa munthu wee?'' Ati, ''asanene.'' ¹⁸ Nomba awawomvi nawa kalindilila wimilile palyanye, wapemvile umulilo wa malasha, amuno kwatalile, nga awa yilunguzya. Peturo nawenye walinji nawo, wimilile palyanye akuyilunguzya. ¹⁹ Apano e simapepo mukulu akolowozya Yesu ivya wasambilizi wakwe ni chisambilizyo chakwe. ²⁰ Yesu amutolelela, ''Mvwanzile pa lwenze kunsi ya pansi. Nasambilizyanga penye mu ma sinanagogi na mu tempeli kuno awa Yuda wonsi wasunkhananga. Nthavwanzile nanthi chimwi munkhama. ²¹ Achani chino mukumbuzichizya? kolowozyani wawo wano wanjivwile pe chino navwanzile. Lolani, awanthu waa wamanyile chino navwanzile.'' ²² Pano Yesu wavwanzile choo, wenga uwa wakalindilila wimilile palyanye ang'anza Yesu nu kuti, ''Avino ungatolelela e simapepo mukulu?'' ²³ Yesu amutolelela, ''Ndi mvwanzile uwuwipe, simichila ivya wuwipe, kweni ndi a chisinkha, ukunumila chani?'' Apano ²⁴ Anasi wamutumile weliwe umunyepwe kwe Kayafasi e simapepo mukulu. ²⁵ Nomba Simoni Peturo wimilile nu kuyilunguzya. Apano awanthu watili kwe weliwe, Asa we wenga wa wasambilizi wakwe?'' Weni wakanile nu kuti, ''Asanene.'' ²⁶ Wenga uwa wawomvi wa simapepo mukulu, wino walinji amukamu wa munthu wino ukutwi lyakwe Peturo wachenyenthuzile, ati, ''Wuzye nthakuweni mu chalo muli ne weliwe? ²⁷ Apano Peturo wakana swinya; nga paponapapo e mukolwe alamula. ²⁸ Apano awatungulula Yesu ukufuma kwe Kayafasi nukuya u masano. Kwalinji akatondotondo umwapwii, nga watinjizile ku masano akuli kuti watize wayifisye kweni wawe awa kulya ichakulya icha kupitililwa. ²⁹ Achino Pilato wafumile kunzi kwe woliwo nu kuti, ''Wuzye amulanduchi wuno mukwiza nawo nu munthu wee? ³⁰ Awatolelela awati kwe weliwe, ''Ndi u munthu wee atalinji a muwipe, nge tutamupile weliwe kwe wewe.'' ³¹ Achaleka Pilato ati kwe woliwo, ''Musendani mwenga, nukumupanzya ukulingana ni sundo lyinu.'' Awa Yuda awati kwe weliwe, ''Asa lisundo ukuti tukome umunthu wumwi.'' ³² Wavwanzile chonye ukuti amazwi ye Yesu yafiswe yano wavwanzile pakulanjizya umwata wamfwa yino akwizu kufwa. ³³ Apano Pilato ayinjila kwi sano swinya nu kumwita Yesu nga ati kwe weliwe, ''Wuzye we Mfumu yawa Yuda?'' ³⁴ Yesu atolelela, ''Wuzye mukuvwanga mwe mwemwe mwenga, pamwi wamwi wavwanzile kwe wewe ivya kwe nene?'' ³⁵ Pilato atolelela, ''Asane mu Yuda, vwile? Awanthu wako nawa simapepo wakulu wampile wewe kwe nene. Uwomvile chani?'' ³⁶ Yesu atolelela, ''Uwufumu wane asa wansi yoo iya pansi. Ndi Uwufumu wane wutele wuwe awansi yoo iya pansi, ngali awawomvi wane walwa ukuti nthakapwe ku wa Yuda. Kweni lelo Uwufumu wane wusi wa koo. ³⁷ Apano Pilato ati kwe weliwe, ''Wuzye we Mfumu fwandi?'' Yesu atolelela, ''Wavwanga ukuti ne Mfumu. Nakwasilwe kwe chonye choo, na kwe chonye niza munsi ya pansi, ilyakuti nsimichile ku chisinkha. Wensi wino awa ku chisinkha akateyelezya amazwi yane.'' ³⁸ Pilato ati kwe weliwe, '' Wuzye ichisinkha achani?'' Watili wavwanga choo, wafumile kunzi swinya ukuya ku wa Yuda nga ati kwe woliwo, ''Nthakuzana umulandu mu munthu wee. ³⁹ Kweni muli nu mwata wuno nkhasapula umunthu wenga kwe mwemwe pa chakulya cha kupitililwa. Wuzye mukulonda imbasapulile Imfumu ya wa Yuda?'' ⁴⁰ Apano awapongomoka awati, '' Umunthu wee pole, kweni e Barabasi.'' Nomba Barabasi walinji we kapoka.