¹ Mutakaleke imyenzo yinu yichulike. Musuwile mwakwe Leza, musuwile swinya mwe nene. ² Mu ng'anda yakwe Tata muli vipitu vivule. Ndi chatalinji wonye, nge mbanenile, amuno naya ukuyania amasyo yinu. ³ Ndi napita nu kuyania amasyo yinu, ndiyiza swinya nu kupochelela mwemwe kwe nene, alyakuti kuno indi namwenye muliwa kweneko. ⁴ Mwamanya inzila iya kuno nkhuya.'' ⁵ Tomasi ati kwe Yesu, ''Mfumu, sweswe tutamanyile kuno ukuya, nga tungamanya wuli inzila?'' ⁶ Yesu atili kwe weliwe, ''Nene ne nzila, ichisinkha, nu wumi; pasi wenga wino akwiza kwe Tata suka ndi wapitila mwe nene. ⁷ Ndi mwamanyile nene, nge mumumanyile Baba wane nawenye. Ukufuma nomba ukuya kunkholelo mwamumanya swinya mwamulola.'' ⁸ Filipu atili kwe Yesu, ''Mfumu, utusonthele Tata, apo chiliwa chakufiswa kwe sweswe. ⁹ Yesu atili kwe weliwe, '''Nalinji nawwe imphindi yitali na nombanye utamanyile, Filipu? Wensi wino walola nene wamulola Tata. Wuliwuli ukuti, 'Tusonthele Tata'? ¹⁰ Wuzye mutakusuwila kuno nene ndi mwe Tata swinya Tata ali mwe nene? Amazwi yano nkhuwanena nthakuvwanga ukufuma mu maka yane, kweni Tata wino akakwikala mwe nene akuwomba umulimo wakwe. ¹¹ Suwilani mwakwe nene kuno ndi mwakwe Tata, swinya Tata ali mwekwe nene, pamwi suwilani umulandu wa milimo yoliyo. ¹² Awenche, awenche, nkhuwanena, weni wino akusuwila mwe nene aliwawomba imilimo yino nkhuchita, swinya weni aliwachita imilimo iyikulu ukulusya yoo amuno nene nkhuya kwe Tata. ¹³ Chilichonsi chino muli lenga mwi zina lyane, ndiwachita ilyakuti e Tata aliwachindamikwa mu Mwana. ¹⁴ Ndi mukulenga nene chilichonsi mwi zina lyane, ndiwachita chenecho. ¹⁵ Ndi mwatemwa nene, mulisunga amasundo yane, ¹⁶ swinya ndipepa Tata, nga ape mwemwe wunji Kavwilizya ilyakuti weni awe na mwemwe muyayaya -- ¹⁷ u Muzimu wa chisinkha. Insi yitanga yipochelele weliwe umulandu yitakumulola pamwi ukumumanya. Kweni mwemwe mumumanyile, amo akakwikala na mwmwe swinya aliwa mwakwe mwemwe. ¹⁸ Nthanga mbasye mwenga; nene ndinyoka kwe mwemwe. ¹⁹ Naponye akamphindi akafupi nga insi yitalindola, kweni mwemwe mulindola. Amuno ndi nu wumi, namwenye muliwa nu wumi. ²⁰ Pa wanda wowo mulimanya kuno ndi mwe Tata, swinya muli mwakwe nene, swinya kuno ndi mwakwe mwemwe. ²¹ Weni wino ali na masundo yane, swinya akuwasunga awino wanthemwa nene, swinya weni wino wanthemwa nene alikundwa nu Tata wane, swinya ndimutemwa nu kuyilanjizya nemwenecho kwe weliwe.'' ²² Yudasi (asa Isikariyoti) atili kwe Yesu, ''Mfumu, kwawa chani chino uliyilanjizya wenga kwe sweswe kweni pole kunsi?'' ²³ Yesu atolelela nu kuti kwe weliwe, ''Ndi wumwi wakunda nene, ali sunga izwi lyane. E Tata wane alitemwa weliwe, swinya tuliyiza kwe weliwe swinya tuliwika akaya ponga na weliwe. ²⁴ Weni wino atankhunda atanga sunge amazwi yane. Amazwi yano mukwivwa asa yakufuma kwe nene kweni yakufuma kwe Tata wino watuma nene. ²⁵ Mvwanzile ivinthu vyoo kwe mwemwe, pano ntchili ndi namwe. ²⁶ Ukuwa, e Kavwilizya -- u Muzimu Mutele wino e Tata alituma mwizina lyane -- weni alisambilizya mwemwe vyonsinye swinya weni aliwizusya vyonsi vino nawanena. ²⁷ Nawasyila umutende; nkhuwapa umutende wane. Nene nthakuwapa ndivino insi yikupa. Utakaleke imwenzo wako ukuti wutamike, swinya mutakawe ni nthete. ²⁸ Mwivwa kuno nati kwe mwemwe, 'Nkhupita, nga ndinyoka kwe mwemwe.' Ndi mwakunda nene, ngali mwasechela kanonzi nkhuya kwe Tata, amuno Tata wakula wandusya nene. ²⁹ Nomba mbanenile lyo vichili ukuchitika alyakuti, ndi vyachitika, mulisuwila. ³⁰ Nthandi mvwange ivivule na mwemwe, amuno kalanjizya wansi yoo akwiza. Weni atali nanthi amaka pakwe nene, ³¹ ukuwa alyakuti insi yize yimanye kuno nakunda Tata, nkhuchita ndi vino Tata wasunda nene. Zanji Tukatuke nu kuya ukufuma koo.''