¹ Nomba palinji apansizi pa kusechelela ichakupitililwa. Yesu wamanyile kuno i ola lyafika ukuti aye kunzi kwa nsi nu kuya kwe Tata. Watezile wakunda awakwe wano walinji munsi, wawakunzile ukufika pakulechelezya. ² Nomba satana wawisile zuwa mu mwenzo wakwe Yudasi Isikariyoti umwana wakwe Simoni, ukuti akazye Yesu. ³ Weni wamanyile kuno Tata wapile vyonsi mu makasa yakwe nu kuti wafumile kwe Leza swinya wanyochelanga kwe Leza. ⁴ Wakatusile pa chakulya nu kuzula ichizwalo cha kunzi. Ngapano asenda umwenda nukuyinyepa mumutembeleko. ⁵ Apano ayitila aminzi mu mbeza atalika ukupwizya amatamba ya wa sambilizi swinya awapukuta nu mwenda wuno wanyefile mu mutembeleko. ⁶ Wizile kwe Simoni Peturo, nga Peturo atili kwe weliwe, ''Mfumu, wandi upwizye amatamba yane?'' ⁷ Yesu atolelela nu kuti kwe weliwe, ''Chino nkhuchita wewe utanga wivwichisye nomba, kweni uli yivwichisya choo pa nkholelo.'' ⁸ Peturo atili kwe weliwe, ''Utalitela upwizye amatamba yane.'' Yesu atolelela weliwe, ''Ndi nthakupwizya wewe, utali ponga na nene.'' ⁹ Simoni Peturo atili kwe weliwe, ''Mfumu, utakapwizye amatamba matupu, kweni na makasa yane nu mutwe wane.'' ¹⁰ Yesu atili kwe weliwe, ''Weni wino asmvile asi nichakulondeka nkhandi ukupwizya amatamba yakwe, kweni weni amuswepe; wewe uswefile, ukuwa asa wonsi.'' ¹¹ (Amuno Yesu wamanyile zuwa wino alimukazya; achino weni watili, ''Asa mwensi wano muswefile.'') ¹² Ala pano Yesu wapwizya amatamba yawo swinya asenzile imyenda yakwe nu kwikala pansi swinya, atili kwe woliwo, ''Wuzye mumanyile chino nawachitila nene? ¹³ Mwemwe mukunjita 'musambilizya' swinya 'Mfumu' vyo mukuvwanga vili chetenye, umulandu avinondi. ¹⁴ Ndi nene pano, ne Mfumu nu musambilizya, nawapwizya amatamba yinu, namwenye mufwile mupwizyane amatamba yinu. ¹⁵ Muno nene nawapa ichilolelo alyakuti namwenye muwachita ndivino nene nachita kwe mwemwe. ¹⁶ Awenche, awenche, nkhuwanena, umuzya atakula ukulusya yisikulu; nanthi we mutumwa ukulusya wino wamutuma. ¹⁷ Ndi mumanyile ivinthu vyoo, muli ninkhumbu ndi mukuviwomba. ¹⁸ Nthakuvwanga ivya mwensi; nene manyile wano nsozile -- kweni vili wonye ukuti amawaliko yafiswe: 'Weni wino akulya ichakulya chane winusya itamba ukususyania na nene.' ¹⁹ Nkhuwanena choo nomba pano chitani chichitike ilyakuti pano chachitika, mungasuwila kuno ANENE. ²⁰ Awenche, awenche, nkhuwanena, wensi wino wapochelela wino nthumile wapochelela nene, swinya wino akupochelela nene akupochelela wino watuma nene.'' ²¹ Pano Yesu wavwanga choo, wizile wachulika mu muzimu. Asimichizya nu kuti, ''Awenche, awenche, nkhuwanena kuno wenga mwakwe mwemwe alinkhazya.'' ²² Awasambilizi awa chewelana, awazunguka avyaweni vino akuvwanga. ²³ Wenga uwa wasambilizi wakwe, wino Yesu wakunzile, walazile pansi pachakulyela penepo eyamizile Yesu. ²⁴ Simoni Peturo asontha umusambilizi wee nu kuti, ''Muwuzichiche aweni wino akuvwanga.'' ²⁵ Achaleka eyamila swinya ku mbali yakwe Yesu nu kuti kwe weliwe, ''Mfumu, weweni?'' ²⁶ Ngapano Yesu atolelela, ''Wandi awe wino nandi timphike itozi nu kumupa.'' Ala ngapano atimphika itozi, wizile wapa Yudasi umwana wakwe Simoni Isikariyoti. ²⁷ Walile wamupa itozi, satana ayinjila mwe weliwe, achaleka Yesu atili kwe weliwe, ''Chino ukuwomba, womba zuwazuwa.'' ²⁸ Nomba patalinji nanthi wumwi pachakulya wino wamanyile umulandu wavwanzile choo kwe weliwe. ²⁹ Wamwi welenginie awati, muno Yudasi walinji nichola cha mphiya, Yesu atili kwe weliwe, ''Kala vyo tukulonda pa kusechelela,'' pamwi ilyakuti awape chimwi awalanda. ³⁰ Watili Yudasi wapochelela itozi, paponapapo afuma kunzi. Kwalinji awusiku. ³¹ Ala pano Yudasi wapita, Yesu atili, ''Nomba Umwana wa Munthu akuchindamikwa, swinya Leza akuchindamikwa mwe weliwe. ³² Leza alichindamikwa mwe weliwe, swinya alimuchindamika paponapapo. ³³ Wana watichi, nene indi na mwemwe imphindi nthichi. Muliwa vwamba nene, swinya ndimuno natili kuwa Yuda, 'Kuno nene nkhuya, mutanga mwize.' Nomba na nene nkhuwanena choo. ³⁴ Nene nkhupa mwemwe isundo ilipya, ilyakuti mukundane wumwi nu muwuye; ndivino nene nakunda mwemwe, avino namwenye muwakundana. ³⁵ Pe choo wonsi walimanya kuno mwe wasambilizi wane, ndi mwemwe mwakundana wenga nu muwuye.'' ³⁶ Simoni Peturo atili kwe weliwe, ''Mfumu, wuzye ukuya kwinye?'' Yesu atolelela, ''Kuno nene nkhuya, mutanga munkhonkhe nomba, kweni mulikonkha pansizi.'' ³⁷ Peturo atili kwe weliwe, ''Mfumu, ngachani chino nene nthanga nkhonkhele wewe nomba? Ndi wulambalika uwumi wane umulandu we mwemwe.'' ³⁸ Yesu atolelela, ''Wuzye mulilambalika uwumi winu umulandu wakwe nene? Awenche, awenche, nkhukunena, e mukolwe atani alile ulikana nene katatu.''