¹ Munthaliko mwalinji Izwi, Nizwi lyalinji nu Leza, swinya Izwi lyalinji we Leza. ² Wee walinji panthaliko nu Leza. ³ Ivinthu vyonsi vyalewuzilwe mwe weliwe, swinya ndi atalinji penepo nge pasi nanthi chimwi ichakupangwa chino chapanzilwe. ⁴ Mwakwe weliwe mwalinji uwumi, nga uwumi walinji awuswepe ku wanthu. ⁵ Uwuswepe wukawalila mu mfizi, nayo imfizi nanthi kuwuchimvya. ⁶ Kwilinji umunthu wino watumilwe ukufuma kwe Leza, wino izina walinji we Yohani. ⁷ Weni wizile ngati we kamboni uwa kusimichila ivya wuswepe, ilyakuti wonsi wangasuwila ukupitila mwe weliwe. ⁸ Yohani atalinji awuswepe, ukuwa wizile ilyakuti angasimichila ivya wuswepe. ⁹ Uwuswepe wa chisinkha, wuno wukapa uwuswepe ku wanthu wonsi, wizanga munsi. ¹⁰ Weni walinji munsi, ninsi yapanzilwe ukupitila mwe weliwe, ninsi yitamumanyile. ¹¹ Wizile kuwa luko lwakwe, ukuwa iwa luko lwakwe watamupochezile. ¹² Kweni ku wavule wano wapochezile weliwe, wano wasuwizile mwi zina lyakwe, wawapile amaka ukuti wize wawe awana wakwe Leza. ¹³ Waa watakwazilwe nu wazi, nanthi akulonda kwa muwili, nanthi akulonda kwa munthu, kweni kwe Leza. ¹⁴ Izwi liza lyawa muwili nu kwikala pakasi pe sweswe. Tuweni uwuchindame wakwe, uwuchindame ngati awa wenganye nsu wino wafumile kwe Tata, wizula inkhumbu ni chisinkha. ¹⁵ Yohani wasimichizile ivya weliwe nu kupunda nkhaninye, ukuti, ''Wee awino navwanzile, 'Weliwe wino akwiza pansizi yane wakula wandusya nene, amuno weni walinjipo kali pano ntchili ukawako.''' ¹⁶ Amuno ukufuma kuwukwane wakwe swensinye tupochezile inkhumbu pansizi pankhumbu. ¹⁷ Amuno isundo lyapiwe ukupitila mwe Musa. Inkhumbu ni chisinkha chizile ukupitila mwe Yesu Kristu. ¹⁸ Pasi nanthi wumwi wino watela wamulola Leza; Leza wenganye nsu, wino ali pambali pe Tata, wapanga leza amanyikwe. ¹⁹ Koo akusimichila kwe Yohani pano awa Yuda watumile wasimapepo nawa Levi kwe weliwe ukufuma mu Yerusalemu ukuti wamuwuzichisye, ''We weni wewe?'' ²⁰ Wazumilizizye --atakanile, ukuwa wazumilizizye -- ''Nene asa Kristu.'' ²¹ Nga awamuwuzichisya, ''Nga weweni fwandi? We Eliya?'' Atili, ''Awe.'' Awati, ''Wuzye we mutumwa?'' Atolelela, ''Awe'' ²² Ngapano awati kwe weliwe, ''Wuzwe weweni, ilyakuti tungatolelela wano watutumile? Wuzye ukuti chani wenji ivya wewe?'' ²³ Atili, ''Nenji ne lizwi, likupunda mu lumpalang'ang'a: 'Pangani inzila ya Mfumu yololoke, 'ndimuno Yesaya umutumwa atili.'' ²⁴ Nomba wamwi ukufuma kuwa Farisi watumilwe, ²⁵ swinya awamuwuzichisya nu kuti kwe weliwe, ''Nga chani chino ukabatizya ndi usi we Kristu nanthi Eliya nanthi amutumwa?'' ²⁶ Yohani atolelela woliwo, anena, ''Nkhubatizya na minzi. Kweni pakasi pe mwemwe pimilile wumwi mutamumanyile. ²⁷ Weliwe awili wino akwiza pansizi yane, utumikowa twa ndyatu zyakwe nthazipila ukuti ningasapula.'' ²⁸ Vyoo ivinthu vyachisilwe mu Betaniya ku mbali yinji iya Yorodani, kuno Yohani wabatizyanga. ²⁹ Pa wanda wakukolela Yohani waweni Yesu akwiza kwe weliwe nu kuti, ''Lolani, umwana ng'onzi wakwe Leza wino akusenda uluwembu lwansi! ³⁰ Wee awili wino natili, ''weni wino akwiza pansizi yane wakula wandusya, amuno walinji penepo pano nene nthane.' ³¹ Nene nthamumanyile, kweni chalinji wonye ilyakuti angawumbulika kwe Izirayeli kuno nizile ukubatizya na minzi.'' ³² Yohani wasimichizya, wavwanga, ''Naweni u Muzimu wukwika ndivino inkhunda ukufuma mwiyulu, nukwiza yikala pakwe weliwe. ³³ Nene nthizile namumanya weliwe, ukuwa weni wino wanthumile ukubatizya muminzi watili kwe nene, ''Pakwe wino uliyiza ulole u Muzimu wukwika nu kusyala pe weliwe, awino alibatizya mu Muzimu Mwimichile.' ³⁴ Nene nalola nu kusimichila kuno wee a Mwana wakwe Leza.'' ³⁵ Swinya, uwanda wino wakonkha, pano Yohani wimilile nawa sambilizi wakwe wawili, ³⁶ awalola Yesu akupita mupipi, Yohani watili, ''Lolani, ing'onzi yakwe Leza!'' ³⁷ Awa sambilizi wakwe wawili awivya vino weni akuvyanga awamukonkha Yesu. ³⁸ Ngapano Yesu apiluka nu kulola woliwo wakumukonkha nga ati kwe woliwo, ''Wuzye mukulonda chani?'' Awatolelela. ''Rabi'' (chino chikupilula ''Musambilizya''), ''Wuzye ukakwikala kwinye?'' ³⁹ Ati kwe woliwo, ''Zanji swinya mulole.'' Ngapano wiza nu kulola kuno wikalanga; wisile nawe uwanda wulyanye, amuno lyalinji papipi ni ola lyi kumi. ⁴⁰ Wumi uwakwe wawili wino wivwile Yohani akuvwanga nu kukonkha Yesu walinji we Andireya, umunyina wakwe Peturo. ⁴¹ Weni pakutalichila wazanile umunyina Simoni nu kuti kwe weliwe, ''Twamuzana Mesiya'' (chino chikupilula: Kristu). ⁴² Weni wamuleta weliwe kwe Yesu, nga Yesu wamulolechesya nu kuti, ''Wewe we Simoni umwana wakwe Yohani. Wewe wandi wakwitwa Kefasi'' (chino chikupilula Peturo). ⁴³ Uwanda wuno wakonkha, pano Yesu walondanga ukukatuka ukuya ku Galileya, weni wazanile Filipu nu kuti kwe weliwe, ''Konkha nene.'' ⁴⁴ Nomba Filipu walini waku Betisayida, umusumba wakwe Andireya nu Peturo. ⁴⁵ Filipu wazanile Nataniyele nu kuti kwe weliwe, ''Weni wino Musa wawalisile mwi sundo, nawa watumwa, twamuzana: Yesu umwana wakwe Yosefe, ukufuma ku Nazareti.'' ⁴⁶ Nataniyele watili kwe weliwe, ''Wuzye kungafuma chimwi ichizima ku Nazareti?'' Filipu atili kwe weliwe, ''Zanga swinya ulole.'' ⁴⁷ Yesu wamuweni Nataniyele akwiza kwe weliwe nga ati ivya kwe weliwe, '''Lolani, umu Izirayeli wa chisinkha, mwakwe wino musi uwufi!'' ⁴⁸ Nataniyele atili kwe weliwe, ''Wuzye wamanya wuli?'' Yesu atolelela nu kuti kwe weliwe, ''Pano Filipu atane akupunde, pano walinji pansi pa muti wamukuyu, nkuweni.'' ⁴⁹ Nataniyele atolelela, ''Rabi, wewe we mwana wakwe Leza! Wewe we Mfumu ya Izirayeli!'' ⁵⁰ Yesu atolelela nu kuti kwe weliwe, ''Umulandu nene nati kwe wewe, 'Nkhuweni pansi pa muti wa mukuyu,' apo ukusuwila? Ulilola ivinthu ivikulu ukulusya choo.'' ⁵¹ Apano weni ati, Achisinkha, achisinkha, nkhuwanena, mulilola mwiyilu mwiyuka, swinya awangeli wakwe Leza wakukwela nu kwika pakwe Mwana wa Munthu.''