¹ Ukuwa umanye choo: Mu manda ya kuwumalilo kuliwa imphindi zya machuzi. ² Amuno awanthu waliyitemwa awenecho, awakatemwa imphiya, awakuyitutumula, awakuyivwa, awamusamu, wanthivwila ku wakwasi, wanthasalifya, swinya awawipe. ³ Waliwa nanthi a lukundo, waliwapotwa ukutetelana, awawufi, nanthi akuyinyosya, awalombwa, wa nthatemwa ichizima. ⁴ Wa kalemeka wa wawuye, wanthasayila, awakuyikunda, wakatemwa ukwizya ukulusya ukutemwa Leza. ⁵ Waliwa ni milolechele ya wuleza, kweni walikana amaka yakwe. Tontholoka ukufuma ku wanthu waa. ⁶ Amuno wamwi awano wakakwinjila mu zya ng'anda wawipa awanachi awapuwa. Waa awanachi wano wizua na mawembuko swinya wakukolelewa ukuya ku vikumbwa ivilekane. ⁷ Awanachi waa wakusambilila penye, kweni nanthi kwiza ku chimanyisyo cha chisinkha. ⁸ Mu nzila yiliyonga muno Janesi nu Jamburesi wimilizile ukususya Mose, Awasambilizya wa wufi waa nawonye wakwimilila ukususya ichisinkha. Awanthu wano imyenzo yawo ayiwipe, swinya nu kuyana ni suwilo wazanwa ukuti awa wufi. ⁹ Lelo watalitwalilila ukuya ukutali. Amuno uwupuwa wawo wuliloleka ku wonsi, ndivino awa wanthu walya. ¹⁰ Ukuwa wewe, ukonsile ivisambilizyo vyane, imiwombele, ichakulonda, isuwilo, ukujimba, ulukundo, ukutonthela, ¹¹ amayimba, amachuzi, na vino vyachitisile kwe nene pa Anthiyochi, pa Ikoniyamu, na pa Lisitira. Nenji najimvile ku mayimba. Pa vyonsinye vyoo, Imfumu yanjavwizwe nene. ¹² Wonsi wawo wano wakulonda ukwikala mu wuleza mwakwe Kristu Yesu waliwayimvya. ¹³ Awanthu awawipe na wakayipatichizya walifuma ku kuyipa ukuya kuyipa nkhani, ukukolela kukusovya awanji na woliwo awenecho. ¹⁴ Ukuwa wewe, wikale mu vinthu vino wasambilizile swinya usuwizile na maka. Wewe wamanya akufuma kwinye kuno wasambilizile. ¹⁵ Wewe wamanya kuno ukufuma kuwutichi wewe umanyile amawaliko amatele. Vyoo vingakwanisya ukupanga wewe uwe na mano ya kupususyo ukupitila mwi suwilo mwakwe Kristu Yesu. ¹⁶ Amawaliko yonsi yapepwa nu Leza. Ayakulondeka ku chisambilizyo chi suwilo, ku kusimichizya, ku kuyololosya, swinya ku kusambilila mu wulungamane. ¹⁷ Choo chili wonye ukuti u munthu wakwe Leza awe amumanye, amupekanie ku milimo yonsi iyizima.