¹ Achaleka wewe, mwana wane, uwe muwomye mu wila wuno wuli mwakwe Kristu Yesu. ² Ivinthu vino wivwile ukufuma kwe nene muwasuwilwe awavule, upe vyolivyo ku wanthu awasuwilwe wano walikwanisya ukusambilizya na wanjinye. ³ Uyimbe mu machuzi na nene ngati we wavita umuzima uwakwe Kristu Yesu. ⁴ Pasi nanthi wumwi uwa vita wino akateweta pano anyefilwe nivya kuchitika vya wumi woo, alyakuti asechelesye awa songo wakwe. ⁵ Swinya, ndi wumwi akuchimvyania ngati e kasamala, atanga apochelele imphumphu penga pano akuchimvya umwa kukonkha amasundo. ⁶ Achakulondeka ukuti u mulimi wino akalemansya apochelele umwakutalichila ivya kusinza vyakwe. ⁷ Welenganie ivya vino nkhuvwanga, amuno Imfumu yilipa wewe ukwivwichisya mu vilivyonsi. ⁸ Wizuke Yesu Kristu, ukufuma mu mbeyu yakwe Davide, wino azulupuziswe ukufuma ku wafwe. Choo acha kuyana na kwi landwe zima lyane, ⁹ muno lino nkhuchulila penepo ukufika nu kunyepwa nu wunyolo ngati ne chigawenga. Lelo izwi lyakwe Leza asa linyepwe. ¹⁰ Achaleka nkhujimbilizya mu vinthu vyonsi muno wawo wano awasolwe, alyakuti nawonye wangapochelela ipususyo lino lili mwakwe Kristu Yesu, ponga nu wuchindame wa pe na pe. ¹¹ Cho acha kusuwilwa pakuvwanga: ''Ndi twafa ponga na weliwe, tuliwa nu wulanzi ponga na weliwe. ¹² Ndi twajimba, naswenye tulilamulila na weliwe. Ndi tukukana weliwe, nawenye alitukana sweswe. ¹³ Ndi swe wa nthasuwilwa, weni akusuwilwa, amuno atanga ayikane wenga umwenecho. ¹⁴ Utwalilile ukwizusya woliwo ivya vinthu vyoo. Chenjezya woliwo paminso pakwe Leza ukususya imphokoto kuvya mazwi; chisi ni ntchito, swinya chikakonono wano wakwivwa. ¹⁵ Uyezesye ukuyilolesya wenga kwe Leza ndivino wino amuzumilizwa, u muwomvi wino asi ni chifukwa chakuwa ni nsoni, wino akusambilizya ichete izwi lya chisinkha. ¹⁶ Uleke ivya kuvwanga vyavye, vino vikakwinjizya ku wusitaleza. ¹⁷ Ukuvwanga kwawo kukusata ngati a ndwala ya muwazi. Mukasi mwawo muli Himeniyasi nu Filetusi, ¹⁸ wano wasovile ukufuma kwizwi lya chisinkha. Wakuti vyile ukuzyulupuka kwachitika kali, nga wakonona isuwilo lya wamwi. ¹⁹ Ukuwa kweni, ulufula uluwome lwa kwe Leza luli palyanye. Luli ni chilolesyo choo: ''Imfumu yawamanya wano awakwe weliwe'' swinya ''Aliwensi wino akupunda izina lyakwe Leza afwile afume kweneko ku wunthalungamana.'' ²⁰ Mu ng'anda ya chinondo musi iviya ivya golide nu siliva vyenga kweni swinya muli iviya vya miti ni vyivu. Vimwi avyi kuwombela imilimo iyichindikwe, vimwi iya musamu. ²¹ Ndi wumwi ayiswefya ku milimo ya musamu, a chiya cha muchinzi. Akuwikwa pa mbali, uwakuwombela imilimo e bwana, swinya umusenganie ku milimo iyizima. ²² Samala ku vya kukumbwa vya wutichi. Konkha uwulungamane, isuwilo, ulukundo, nu mutende na wawo wano wakakwitila pa Mfumu ukufuma mu mwenzo uwuswepe. ²³ Ukuwa ukane amawuzyo ya wupuwa swinya aya wunthamanya. Umanyile ukuti yakuleta ivyongo. ²⁴ Umuwomvi wakwe Mfumu afwile atakawe ni mphokoto. Mu malo mwakwe afwile awe ninkhumbu ku wonsi, akwanisye ukuti asambilizye, swinya awe mumyalale. ²⁵ Afwile mu kutonthela asambilizye wawo wano wakumususya weliwe. Leza pamwi angize ape woliwo ukutontholokwa kwa kumanyisisya ichinkha. ²⁶ Wangize wawe nanthi kupalamanswa swinya wafume pa chipingo cha muwipe, lyo walemwizwe na weliwe ku kulonda kwakwe.