¹ Pauli, umupositole wakwe Kristu Yesu ukupitila mu kulonda kwakwe Leza, ukuyana ni layano lya wulanzi wuno wuli mwakwe Kristu Yesu, ² ukuya kwe Timoti, umwana umukundwe: Uwila, inkhumbu, nu mutende ukufuma kwe Leza e Tata swinya Kristu Yesu Imfumu yitu. ³ Nenji nkhusalifya Leza, wino nene nkhatewetela ukufuma ku watatakulu wane, na melenganio ayaswepe, ndimuno nene nkhakwizuchila wewe penye mu mapepo yane uwusiku nu musanya. ⁴ Ndimuno nkhwizuchila a minsozi yako, nkhukumbwa ukuli inkhulole wewe, ukuti nenji njizule ni chimwemwe. ⁵ Nene niyuziswa ivya suwilo yako lya kusimichila, lino lyalinji pakutalichila mwakwe mamakulu wako e Loyisi na mwe mama wako e Yunisi, swinya nenji nkhusimichila kuno lyikala na mwakwe wewenye. ⁶ Cho achili chifukwa nenji nkhukwizusya wewe ukuti ukatusye ichawupe chakwe Leza chino chili mwakwe wewe ukupitila mu kulambalikwa amakasa yane pakwe wewe. ⁷ Amuno Leza atatupa swewe umuzimu wa nthete, kweni uwa maka swinya ulukundo swinya ukutonthela. ⁸ Achaleka mutakawe ni nsoni mu kusimichila ivya Mfumu yitu, nanthi a nene, Pauli, uwa muvingololo wakwe. Mu malo mwakwe mu ponga mu machuzi muno ilandwe zima ukuyana na maka yakwe Leza. ⁹ A we Leza wino watupususya swswe swinya atwita sweswe nu kwitwa ukutele. Awomvile choo, asa kuyana ni milimo yitu, kweni ukuyana nu kutanthika kwakwe nu wila wakwe. Leza apile sweswe ivinthunye vyoo mwakwe Kristu Yesu lyo insi yoo yitani yiweko. ¹⁰ Ukuwa nomba ipususyo lya kwe Leza lyawumbulwa pa kuloleka kwakwe Kristu Yesu umutuli witu. A Kristu wino amazya imfwa nga waleta uwumi wuno wutalitela wumale ukuti wuswefwe ukupitila mwi landwe zima. ¹¹ Umulandu wa choo, nenji nasozilwe e kawizya, umu positole, swinya u musambilizya. ¹² Pa mulandu wakwe choo nanenye nkhuchula ivinthu vyoo. Ukuwa nenji nsi nanthi a nsoni, amuno namanya wino nenji nsuwizile. Nenji nkhusimichila kuno angakwanisya ukusunga chilya chino namulemeka weliwe ukufika wulya uwanda. ¹³ Sunjilila ichakulolela penepo icha chisambilizyo ichizima chino wewe wivwile kwe nene, ponga ni suwilo nu lukundo vino vili mwakwe Kristu Yesu. ¹⁴ Ichinthu ichizima chino Leza apile kwe wewe, uchisunjilile ukupitila mwakwe Muzimu Mutele, wino akakwikala mwakwe sweswe. ¹⁵ Wewe umanyile choo, kuno wonsi wano wikala mu Asiya wapiliwusile ukufuma kwe nene. Mwi wungwe lyoo muli Figelasi nu Hemogenesi. ¹⁶ Imfumu yipe inkhumbu ku ng'anda yakwe Onesifolasi, amuno asunjilizile nene swinya atalinji nanthi a nsoni nu wunyolo wane. ¹⁷ Mu malo mwakwe, pano alinji mu Roma, weni amvwambile nene sana, nga anzanile nene. ¹⁸ Imfumu yipe weliwe ukuti azane inkhumbu ukufuma kwe weliwe pa wanda wuno wukwiza. Mu nzila zyonsi anjavwilizizye nene mu Efeso, wewe umanyile ichetenye.