¹ Əwad Yesu ǝsɨ bwoy nnwan ntəm guna nkhaŋ ə ntwarag ba nyo i myim kozan njən bâ nay Əgwaza u dəbɨ mbun tsswo. ² Ə sɨ nyo, Ə́ byyo ətyi fag əlyyad ǝyyaŋ bu ukaraŋ uyyaŋ. Ə tsswoŋ uwun Əgwaza dag dǝ gwo cyyaŋ əyin ə ŋgyi kyaŋ dag. ³ Bu ukaraŋ əkyə ǝbyyug əyyaŋ ǝsɨ nshyyo wo ǝtyog gu wu ǝka nsiyen ni. Ə sɨ coŋ ə kwad ətyi fag əlyyad wu nyo, Nuŋ mbyyaŋ nəndwan ŋgu, fyyed zɨd əlyyad na tsotswad â joŋ n cucug ŋgu. ⁴ Ə̀ sɨ coŋ ǝ bwo coŋ naŋ ǝtyi fag əlyyad u ǝ lag. Utug uyyaŋ ǝsɨ ba dam bə ntsswo nyo, Nuŋ n tsswoŋ uwun Əgwaza dag, də nuŋ n ntsswoŋ nswum əyin dag. ⁵ Əmgbom bǝ ə̂nyo n shyyo sswo səhwod bə əbyyug əwi dag. Yog n bay n fyyed gu əlyyad ənay kəlag gwo na ya nswon bɨ coŋ ku. ⁶ Kukwo Yesu Ətyə-uli ǝsɨ nyo, Də nyi maŋ fəg kyaŋ əkwo ətyi fag əlyyad saŋ tswutswad əwi ə hyyo ni! ⁷ Bǝ Əgwaza u bwo, əniəd əba gwo khay bâ yed əshin guba ni, ba ǝ nay gu tutug bə tənwam ni əna nyyo tswutswad bǝ mba dɑ̂? Əna kwag lwam bɨ fəg unag ba ka? ⁸ N tag nyi n əna nyyo ba kyaŋ ǝkwo myim ni, bu uŋfiyen. Jən əzə Ŋgwon Ətyibishyi ka u ba mbwwog u bay bə dunio ku ni, u ba shyyo əniəd əba ə nsag ntsswo bə nka ni a? ⁹ Ə sɨ mun ə nyyo kidê əji tuza ǝsɨba jyway əkum əniəd ka nwad ba nyyi ba yed tswutswad əniəd ni. Əsɨ nyo. ¹⁰ +Ətyog əfyyaŋ ə nshyyo, ətyə Farisi mbyyaŋ ətyi tuŋ kurum əbyin. Basɨ nad bə gbǝndaŋ tu dyeb Əgwaza ǝ tǝ nay gu. ¹¹ Ətyə Farisi u ǝsɨ tə khab ə yoŋ zan bə əniəd ba, ǝsɨ ŋwwo cɨn əpyyo gu bǝ Əgwaza u nyo, ‘Əgwaza, n gway a naŋ n ndwwon bǝ əkum əniəd ka ni. Ənied təwob nkyaŋ ǝnied, ǝnied san tswotswad dag, ba myyan ǝnyyug ǝyyaŋ ǝnied. N ŋgway naŋ n wa ŋgyed ətyə kətug nyyo naŋ ətyi say kurum əbyin əwwoy ni dag. ¹² N nay a ufa uhwwod nwam mfyyaŋ bə sati wu. Koyag ə n shyyo n nɨ ntyyan mbwwo əkpa swag n ŋwwag a zənaŋ əkpa ənyyuŋ.’ ¹³ Ətyi say kurum əbyin u gu bwo ǝsɨ la yoŋ gbaŋ bǝ ǝnied ba, ə tswwog əpyyo ka, ǝ kworog mbwag na bɨ fɨrɨŋ ku ə nay Əgwaza u nyo ənî, ‘Əgwaza u, fəg kunag n, ətyə kətug nyyo.’ ¹⁴ N tag nyin ətyo əwi gwo bwwog ə nad bu uli guka dǝ bǝ ǝbun du uyi Əgwaza ka, zan bǝ ətyo Farisi wu. Bǝ ǝnyo bwo ətyo əwo ə wwud ə yoŋ ni əba tɨm gu, ətyo əwo ə yyway əpyyo gu ni, gwo əba jon gu shi ku. ¹⁵ Utug uyyaŋ əniəd ǝsɨ mun ə ŋwwo coŋ bə Yesu acwwaŋ nnwan gwo byǝrəm na ə kworog na mmyaŋ. Nnwan ntəm guna u ndi ənyo ni usɨ ŋwwo khay ba ku. ¹⁶ Kukwo Yesu ǝsɨ yyi anwan na usɨ bay bə ngu, ǝsɨ nyo ənî bə nnwan ntəm guna, Nyi yog acwwaŋ nnwan ənay u bay bə nuŋ. Nyi yog lwwoŋ ba dag nwad tyog Əgwaza ku yed shin taŋkǝy əniəd əna di naŋ ba ni. ¹⁷ N tag nyin cucug, ətyo ǝwo də ə san tyog Əgwaza ku naŋ aŋgwon ni dag ə lad bɨ ŋwwo bə nku. ¹⁸ Əgwam Yahuda əyyaŋ ǝsɨ bay əba lyib Yesu nyo, ǝtan ətyi cyyed yag ə nna nyyo n nshyyo sɨcəd saŋ sɨsag ku? ¹⁹ Yesu ǝsɨ shim gu ndyo nyo, Dɨ yag ə a ŋgyi n ǝtan əyin wu? Ə̀tan ǝyin ə nshyyo dag zan bǝ Əgwaza u bə ənyin gu. ²⁰ A lyen nkyaŋ ǝna Əgwaza ǝ nyo i yed tɨlɨd ǝ́ nyyo ni: ‘Yog nyyo kətug bə əbyyug əyin kwo ətyog əyin dag; Yog hyad əyin dag; Yog tsaŋ; Yog bwoy əlyem ləb əyin dag. Joŋ əcyo a mbyyaŋ əyaŋ a shi.’ ²¹ Kukwo gu ətyo ǝwi ǝsɨ nyo, N tǝkaram ǝlyyad ǝnay dag nyyo naŋ n ŋgyed gusiyem byong ba bay utsswun. ²² Yesu ə nfəg əlyyad gu na ni, ǝsɨ nyo bə ŋgu, Bɨ kyaŋ nyyuŋ kwo bwad a. Lyab koyag ǝ a byyo, â kǝw kunag na kurum ku, â byyo zwa bu uli tuza ka, əwod a bay a hwi n. ²³ Gwo nfəg ənyo ni uyyi guka u sɨ shay, ǝsɨ fǝg nyinyaŋ dag, nwad ǝ byyo shyyo gborǝndaŋ. ²⁴ Yesu ə ndi tsswo guku byyan ni, kukwo gwo nyo, I byyo cəd ǝnye yag ǝ̂, ətyǝ nzwa ə ŋwo bɨ tyog Əgwaza ku. ²⁵ Əhyom kyaŋ ə ǝzwaŋ ntsswo ǝ ŋwwo bə nzwway uyob ǝ karag wurug dɨgag əkwo ətyǝ nzwa əna wo bumɨ tyog Əgwaza kuni. ²⁶ Əniəd əba ə tsswoŋ guni ǝsɨ lyib nyo, Kwod! Bə kǝ ǝ̂nyo. ənyan ə na shyyo ku san ku? Yesu ǝsɨ shim ba ndyo nyo, ²⁷ Kyaŋ ǝkwo kɨyed ətyibishyi u ni, i kɨyed Əgwaza u dag. ²⁸ Kukwo Bitrus ǝsɨ nyo, Bə nzɨd əba wod koyag ə zɨ byyo zɨ sɨ hwi ani bwo? ²⁹ Yesu ǝsɨ shim ba dyo nyo, Cucug əlyyad, konyan ə wod uli gu kwo əbyyug kwo +nənyyug ko ənio byyo gu kwo nnwan dənyan tyog Əgwaza ka, ³⁰ əna shyyo nkyaŋ əna sswag nsɨna gwo wod ni zan əzǝw bə dunio əkwi ni. Əwod bɨ shin tɨ bay ku, a ba tə shyyo sɨcəd saŋ sɨsag. ³¹ Əsɨ hwwad nnwan ntəm guna ə nad ndyo bə əfam ənyyuŋ ǝsɨ tag ba nyo, Di, zɨ nɨ ban nad Urushəlima. Ə́zə̂, səlləy nkyaŋ əna +əlyyad ǝŋwwad Əgwaza ba əku min ndyurug gbaŋgbaŋ tuza Ŋgwon Ətyibishyi ka ni, nɨ mbay cəcarag də nyinyuŋ ba. ³² Ə́ na təbad gu ə cyo mbwag əniəd əkag, bâ may gu, ə̀ twoy gu, ə̀ shum gu təmpyyo. ³³ Ba na wad gu bǝ əyǝw, ə hyad gu, utug nwam ntad ka, gwo dərəg. ³⁴ Basɨ ya nkay kə yag gwo lyyad a. Əsɨ wod ba bǝ ndyin tuza kyaŋ ǝkwo swaŋ ǝlyyad ji fa ni. Ba sɨ ya ndyen kyaŋ ǝkwo gwo lyyad ni a. ³⁵ Yesu ǝtə ntad kpǝŋkpiyen bu ukaraŋ Yeriko ka ni, naŋ ətyə tɨtwan ǝyyaŋ ə swan ufa ndwag ka ə shuraŋ. ³⁶ Gwo nfəg dɨdɨd əniəd u ə swarab ni, ǝsɨ lyib də yag ə bay. ³⁷ Ə sɨ tag gu nyo, Yesu, ətyə Nazəret ə swarab. ³⁸ Kukwo gwo sɨ ŋwwo gwoŋ yyi nyo, Yesu ŋgwon Dawuda fəg kunag n. ³⁹ Əniəd əba kwog uswon ka bǝ əkpa uni ǝsɨ ŋay bǝ ŋgu nyô gwo cyyo nywaŋ. Ə sî wa yam ǝsɨ gwoŋ yyi ji ə sswag ənyo nyo ənî, Yesu ŋgwon Dawuda fəg kunag n. ⁴⁰ Kukwo Yesu ǝsɨ bwwog ə yoŋ ǝsɨ kam ǝnied ba nyo ba bay bə ŋgu. Gwo nyyo ə bay kpokpog ni Yesu ǝsɨ lyib gu nyo. ⁴¹ Yag ə a cad n nyyo a dyo? Ə sɨ shim nyo, Ətyə uli, n cad n shyyo ncyyaŋ. ⁴² Yesu ǝsɨ nyo bə ŋgu, Də cyyaŋ. Sag tsswo aku bə nuŋ corog a. ⁴³ Bədɨyoŋ əkwo ǝ̀sɨka ŋwwo cyyaŋ +ulwo na, ǝ̀sɨ ndəb bə Yesu ə dyeb Əgwaza u. Əniəd ba səlləy ə ndi kyaŋ əkwo Yesu ə nyyo ni, ba sɨ mun ə ŋwwo dyeb Əgwaza u ku.