Nyi myyam bə nuŋ naŋ n myyam bə Kristi ni. Nini ndyeb nyin, nwad nyi jwuŋ n bǝ kwozaŋ kyaŋ. Ndyeb nyin dənian əka nyi mbyoŋ nkyaŋ tàdá ənio n cyyed nyin ni cecerǝg. Nini ncad nyî fɨg naŋ Kristi ə yed ǝpyo kozaŋ ətyog. Ətyog bwo ngwo yed ǝpyo ǝbyyug gu wu. Əgwaza u ngwo yed ǝpyo Kristi ka. Kwozaŋ ǝtyog əwo shyyo bɨ nay Əgwaza u kwo lyyad nkyaŋ utswon ji bɨ kub buŋ bə ǝpyo gu ka, ǝ jway ətyə ǝŵo yed əpyo guka ni. Əwon kwozaŋ ǝbyyug əwo əshyyo bɨ nay Əgwaza u ni, gwǒ won ǝpyo gu ka dǝ bɨ ləb, ǝ jway ətyə əwô yed ǝpyo gu kani. Ku di bə cecǝrag bǝnaŋ əbyyug əwo ǝkwad ǝpyo gu ka ni. Kǝnǝŋ ǝbyyug ǝ lag ləb ǝpyo gu ka, yog gwo kwad pyyo gu ku ə bwad cuncwwad. Kǝ mma ngyed gu kyaŋ nsum kwo ǝbyyug gwô kwad pyyo gu ku, ǝ bwwo ləb ku. Kud! Ətyog wu gwo yog hwi ǝpyo gu ka dag, nwad Əgwaza u ə jyi gu bumi əkwa gu ka əmbyyaŋ kyenkyay shi gu u. Əwod ǝbyyug wu bwo ə yed kyenkyay shi ətyog əwo. Nwad, ǝtyog wu ǝku nyyo gu nyyo bu lwam ǝbyyug kwo dag. Dǝ kunuŋ ǝkyo, ǝbyyug əwo əwa ku nyyo gu nyyo bɨ lwam ǝtyog kwo. Ə́ ku nyyo ǝtyog u dǝnian ǝbyyug kyo dag. Nwad, əwa ku nyyo əbyyug wu dǝnian ǝtyog əkyo. Kukwo mbyyo i yed tɨlɨd kwo ǝbyyug ǝ shyyo bɨ kyaŋ twarag tyog tuza ǝpyo gu ka, dənian +ǝtǝm tswa ba. Zan bǝ ǝnnyo, bumi Ətyə Uli ka, ǝbyyug wu ǝnɨ gyəw nyyo swad əpyo gu də bə ǝtyog u dag. Bə ənnyǒ bwo ǝtyog wu, ǝna yəw nyyo swad əpyo gu də bə ǝbyyug dag. Nwad naŋ ǝbyyug wu ǝ gurug ə nyyo bə ətyog wuni, ənnyǒ bwo ə ǝtyog wu ǝ ngyed byin ǝbyyug kwo. Nwad kǝkǝb nkyaŋ na nyyo bǝ Əgwaza əwo! Nyi fyyed ǝpyo nyin əlyyad na nyi di. Kunɨ nkwa bəd ǝbyyug ǝ nay Əgwaza u dǝ bɨ ŋway ləb ǝpyo ka â? Kə də əkwǝ dunio ka cyyed zɨd naŋ ku ngyed kyaŋ nsum kwo ətyog ǝ byyo junjun pyyo dâ? Kə də əkwǝ dunio ka bə əpyo ka cyyed zɨd nyo kǝnǝŋ ǝbyyug ǝ byyo junjun pyyo, i yed kyaŋ kyenkyay shi kwo bǝ ngu dâ? Dǝnian pyyo ǝkwo ǝ joŋ gu ni, i yed shin nkub əpyo gu əkyo. Bǝ kǝ əyin ǝna ya kǝnan tuza ǝlyyad ənay ni, zɨ bu hyyo ntəm tâdá njyaŋ dag, had bə nnwan Əgwaza na kəkəb +ulwo na. Əwod bumi nkyaŋ ǝnio nku kam nyin nyyo ku ni, nna dyeb nyin dag. Nwad, naŋ nyi nɨ utuŋ dunduŋ ni, ku nɨ ngyed shin nog əyyaŋ kwo dag, byyan kwo. Bu utsa ka, nfəg nyo kǝb jen ǝzo nyin nnwan Əgwaza na ntuŋ ni, nyi nɨ mbyyo ghay ǝyyaŋ nyin ncyyo swod bɨ swod nsɨ ŋwag cucug bǝ ǝlyyad na. Tɨlɨd kwo ǝ nshyyo ghay ǝpyo nyin swod bɨ swod, kukwo na cyyo ǝ nfɨg ǝsɨba ənied ba ŋwwad ba shi naŋ ba ngyed ceced ənied byo bumi nyi ka ni. Nwad ǝnnyo, jen əzo nyi nɨ mbay nduŋ ni, ya kyaŋ ya nduŋ bə Ətyo Uli kwo nyî nɨ ngya dag? Jen əzo nyi ni ngya ni, konyan ǝnɨ ngya kyaŋ ya gu, ǝkum ka ǝ ya shin baku. Əyyaŋ bə nyin ə swan zwon, naŋ ətyə nyyuŋ wu ə ya ə sswo had ə hyoŋ. Nyi byyo usa ǝnio nyi nɨ ngya nyî sswo ni dâ? Nyi jwway nnwan Əgwaza ənio dɨ may ənied əbyo saŋ ni â? Nyi may ǝnied ǝbyo yed kunag ni â? Yag ə bəd nyi cad n tag nyin? N dyeb nyin â? Səm, nna ngyəw ndyeb nyin bǝ sikwǐ ni dag. Nwad kyaŋ ǝkwo nku san mbwag Ətyo Uli ni, kukwo naŋ nŋwwad nyin. Bənaŋ tutug əkyə əgbaŋ əbyin wu əku dyeb Ətyo Uli Yesu ni, ǝsɨ kyag kwoŋkwoŋ saŋ furag u. Də məta əka gwo ntwǝrag ǝgway u ni, ǝsɨ kpərom kwoŋkwoŋ u ǝsɨ nyo, "Di lwam nuŋ ǝkwo kwi, kwo nŋwwad nyi ni, nyi nɨ dɨŋa nyyo ǝní nyî njyuŋ u." Bə ənnyǒ bwo, də məta ya kyaŋ ya dushuŋ ku, əsɨ kyag ucwoŋ kǝ ǝsɨ nyo "Ucwoŋ ǝkay ni, uyed lɨkəwəli ufay, kyo nŋwwag bumi ǝswog nna ni. Nyi nɨ nnyyo ǝnnyo kwozaŋ njen, nyî njyuŋ n." Kwo zaŋ jen əzo nyî ngya kwoŋkwoŋ saŋ furag ǝwi ni, nyi sɨ bu sswo bumi ucwoŋ ǝkay nɨ, nyi nɨ nshey ǝhwu Əcyo Uli kyo tɨnad jen bwwog gu ji. Kukwo mbyyo konyan ǝ ə̀ ya kuŋkwoŋ ǝwi ni, kwo ə sswo bu ucwoŋ Ətyə Uli ka bɨ byyo ǝkwa ǝbun bə ngu, ə yed ətyə əbun ə bu lwam mbyyaŋ ǝswog Ətyə Uli na. Yog kwonyan gwo ya ntsa zwob ǝpyo gu ǝsɨ̂ dɨ ya kwoŋkwoŋ ǝwi ni, mbyyaŋ sswo bumi ucwoŋ ǝkay ni. Kǝ əyin əsɨ ya bɨ sswo də bɨ fɨg lwam Yesu ku, ənə hwwad əpyo gu fyyed əlyyad tuza ya bɨ sswo əkwo gwo nyyo ni. Kukwo mbyyo ǝyyaŋ bə nyin ǝ nsaŋ ced bɨ lwwo kozan njen. Ku sɨ cyyo ǝyyaŋ nyin ǝkə nkwi. Əwod kǝ zɨ zwob ǝpyo zɨd, ǝna fyyed ǝlyyad tuza zɨd dag. Əwod kə Ətyə Uli əwo bə əpyo gu ə fyyed əlyyad tuza zɨd, ə nyyeb zɨd ə, kəlag əba mun ə fyyed əlyyad əhwu bə nzɨd dunduŋ bə ənied swanta ba. Kukwo mbyyo +nǝnyyug mba, jen əzo nyî ntuŋ dunduŋ dɨ ya kyaŋ ya ku ni, sə nyî tswoŋ ǝyyaŋ. Kǝ ǝyin ǝ tswoŋ zwoŋ bə nyin, yog gwo ya buli əsɨ̂ dɨ bay, kəlag utuŋ nyi ka na hwwad fyyed əlyyad tuza nyin. Tuza ǝkum nkyaŋ ǝnio ndyurug ni, nna ntag nyin lwag əkwo nyi nɨ kay ni kǝnǝŋ mbay.