¹ Naa dəmta nit do̱o̱niya marirǝi na Do̱'ga Firissi, naa lamiya Muusarǝ dookairǝi naa majaliisaa Yahudaawairəi i dog Yeeso sə i asu mu' o kamu Bilaatussə mu'. ² Bilaatus de̱su bonge, "Mo̱o̱zi gwanza Yahudaawai rǝz ya?" Iisu bonge, "A doosapu." ³ Firissiya gbi'kiyai i dogdǝn Yeeso pangn. ⁴ Gǝbǝn Bilaatus de̱su, "A bag naa una pa ya?" Geem pangna ipu dogdǝkǝnarǝ am. ⁵ Ama Yeeso bag es pa, inni mǝs Bilaatus. ⁶ Bǝlla naasǝllǝ Bilaatus ke̱e̱sapu fassiki pursunaaza i te̱e̱guzzǝ. ⁷ Mariya i ruus gwaar sə i iu zur sə i gbe'i pursunarəirǝ te' uza pii i de̱ru Barabbas. ⁸ Bansa Mari i zaa Bilaatussǝ sǝ i doosu na bo̱'səbo ina ke̱e̱s bo̱'səkuborən. ⁹ Bilaatus de̱si bonge, "I íi mina fattǝn gwanza Yahudaawai rǝz ya?" ¹⁰ No̱k me̱e̱me̱n Firissiya gbi'kiyai i kamtə Yeeso ullə no̱k keerǝssi. ¹¹ Ama Firissiya gbi'kiyai i sugrǝ mari ina doo bonge bo ii ina fattǝbo Barabbazzi. ¹² Bilaatus gǝ doosi bonge. "Mina bo̱'rǝ an naa gwanza Yahudaawairǝz ya?" ¹³ I wo̱o̱ sut bonge. "Ɓaanu!" ¹⁴ Bilaatus de̱si bonge, "Laks anya?" Ama i bagə wo̱o̱ka sut paari, "Ɓaanu." ¹⁵ De Bilaatus i gbopsiki timr, sei fassi Barabbas. Ɗa' Yeeso sǝ esiu ina ɓaau. ¹⁶ Soojai i ri'gunu gwanirǝ ar bissə sə i to̱o̱kən ii yas. ¹⁷ I tə'sə Yeeso ruktan, sə i siu me̱e̱tuwolla kǝptəz sǝ i ku'su. ¹⁸ Sei i təksu na' sə i doo bonge, "E də'sa Gwanza Yahudaawairəz!" ¹⁹ I vowu zullə naa gbala sə i tu'rusu tuttə. I gu' dii sə i də'su. ²⁰ De i ɓamsapu ɓandəsku, i tussu ruktanzzi sə i assu yaləna gwandən, sə i keenu rekarə ar ɓaanarə. ²¹ I pi' Simana sairinnaz Daa a Alekszanda na Rufussəz keetə waa dəl ularə na gum vaga rauwa Yeeso rǝu. ²² Soojaiyi i kam Yeeso ara i de̱r Golgootakrǝ (waato ara i de̱r kè̱e̱wa zullek). ²³ I esu maama inaabirǝ i fǝǝgǝs naa miirram, ama mu'us bo'ka. ²⁴ I ɓaau sǝ i mas yalǝna ullǝn na billa wo̱ka wo̱gǝzzǝk sǝbo og ina koo ne̱e̱ya kinkan. ²⁵ I ɓaan Yeeso ak we̱e̱s piti muzǝ pazi. ²⁶ Ullə zullə paa i ɓaa biita bə'səmrət bonge, "Gwanza Yahudaawairǝz." ²⁷ I ɓaa rui ittǝkǝ na Yeeso, muzǝz na' go̱'narǝ, a muzǝz boo na' ukarǝ. ²⁸ Nok yi'iska ina rababai doon bonge "I ge̱'ku iya i duupairə te'." ²⁹ Iya ipu arkrǝi i rikǝ zur sǝ i doo bonge, "Somo, mo̱o̱wa aka ua'as Gwaaga Billǝk sǝ aka wom ru' taareez, ³⁰ gbisəm zura mo̱o̱l sǝ a tiitǝ vaga rauwirǝ!" ³¹ Rii gǝ Firissiyaawaiya gbi'kiyai naa Lamiya Muusarǝ dookairǝi i bandǝs bonge, "Gbis uri, ama le' gbiska zura gwandǝl pa. ³² Kweebaaz, gwanza Israilaawai rǝz na tiitǝ vaga rauwirǝ me̱, sǝ a og sǝ a esǝ timr." Iya i ɓaai yammai bǝn i iirǝsu leekrǝ. ³³ Diga we̱e̱s komna naa ittǝsǝ, tǝgra gbǝ'ǝs ar haa rakarǝ we̱e̱s taasǝ. ³⁴ Yeeso tǝg gwera paari bonge, "Eloi, Eloi, laama sabaktaani?" uni, "Daa Billa miil, Daa Billa miil, no̱k an sǝ a wiye ya?" ³⁵ Uri iya de' pourǝi i geeu sǝ i doo bonge, "Ke̱'en to' pu de̱rk Iliyarǝ." ³⁶ Uza no̱g sǝ' igtǝ sooso maama yaanǝmrǝ sǝ we̱' gbalarǝ sǝ yiisu na bo'. Mazzi doo bonge, "A zo' Iliya na za tiisku gǝ." ³⁷ Sei Yeeso tǝg gwera paari sǝ wǝr. ³⁸ Laabuleya gwaaga Billǝkrǝz se̱s ittǝzǝ diga paari haa diiri. ³⁹ Soojaa de' sǝ yer muug Yeesorǝz og ni wǝrǝnak doo bonge, "Zǝmazi maza az Waza Billǝzzi." ⁴⁰ Kitaki uri i pii i de' ar ye'na sǝ i gwen. Iirǝ te' iiyi, Maryaamu Magdaaliya, Maryaamu maiya Yaakubu rǝz naa Soloomi. ⁴¹ I pin Galiili ak i duu sǝ i gbaau. Kitaki uri gǝnŋa gǝ i za oksu Urshaliima. ⁴² De nimz go̱'tǝ, no̱k ublaa go̱'ka zokrǝ no̱k ublaa ǝngǝskaa yahudaawairǝkki. ⁴³ Yusufu maza Arimaatiyaz zaa roo, ur maza i no̱o̱suzzi, pu muzǝ do̱o̱niya marirǝ pu bǝlla gwanta Biilǝt zakǝnakrǝ. Kee kaakarǝ sǝ ree Bilaatussǝ sǝ ooro wo'sǝka Yeesorǝk. ⁴⁴ Wǝrkaa Yeesorǝ ya'ak mǝs Bilaatus, de̱r sooja uza sǝ de̱su Yeeso na wǝrpu Zǝmagǝ. ⁴⁵ De gee sooja ezirǝ ge zǝma wǝrapu, esǝ Yusufu wo'sǝka Yeeso rook. Yusufu yiu yaluwa linin dǝu. ⁴⁶ Tiis Wo'sǝka Yeesorǝk diga vaga raurǝ sǝ ɓundus naa yaluwa linindǝ ewi sǝ iitu gagǝra i ke̱ diga biilǝllǝ. Sei giis lakkpa bil su' gagǝllirǝ. ⁴⁷ Maryaamu magdaaliya naa Matyaamu maiya Yoosi rǝz i og ara i ìin Yeesok.