¹ De Yeeso pu keetǝkrǝ Gwaaga Billǝkrǝ, muzǝ kubrubaiya ullǝirə te' doosu bongé, "Lamz, gwenum womra naa bile mǝs at." ² Doosu bonge "A og pu womra gbi'ta at ya? I daak bil molǝ a i veksǝk pal ularǝ paa pa." ³ De i rektə ge'a te̱ta zaitundǝ gəəkǝn naa Gwaaga Billǝkrǝ, Yeeso gau dii sei Biiturus, Yaakubu naa Yohana naa Andaraawus i de̱su ɓo'rarǝ. ⁴ "Doosmee, bǝnnazi sǝ netti bo̱'rumka ya? Anni yiik bǝlla netti pu bo̱'rumkǝndǝn ya?" ⁵ Yeeso ma' dooski bonge, "Ge̱e̱nge̱n uza kanaa sǝǝrǝn pa. ⁶ Mari gǝnŋa i zak naa ri'ra miil sǝ i doo 'miizi Yesu' sǝ i yaas uri gǝnŋa. ⁷ Ina gee ya'am naa doorǝka su' a ya'amdǝk, kai gbee baar pa, netti doole bo̱'rǝmka, ama ɓamna zaa den pa. ⁸ No̱k dəl ula ruukǝn dəl ula, gwant ruukǝn gwant. But lamrǝmka at ɓeseɓe naa busum. Eni se̱̱e̱kaa ɓerka baalǝkki. ⁹ Gamn naa gbaksa tok. I kamkpǝn ar bissǝ sə i ɗu'un Ro'a Biilǝirǝ. I de'ek gomnai naa gwanirǝ mu' no̱k eska sedaakuma miim iirǝ. ¹⁰ Ama paka tingka Billǝk se̱e̱k dooka zok dǝrmerǝ yas zanŋa. ¹¹ Ina kamǝn sǝ ina esǝn ar bissǝ kai gbe̱e̱ baar pa. No̱k bǝllirǝ i ge̱e̱skǝn ina i dookan, iiyi i pak pa, ama Rumsa Billǝssi. ¹² Do̱o̱wi esǝk do̱o̱wi sǝ í iwu,rii daa naa waza ullǝz. Yangi i ruukǝn do̱'ga mariya íi no̱k i ikkpinik. ¹³ Koo ne̱e̱ya mu'uskǝn no̱k ri'ra miil. Ama ura we̱ngs zokaz kink gbiska. ¹⁴ Ina og səǝra ne̱t laks tomsa Billəs na ma'tǝ (Ura zangǝz na me̱e̱), iya ipu Yahuudiyai ina no̱g gettǝ, ¹⁵ ura pu roolo paaz kana tiitǝ gwa'roo, koo na pe' una roo pa, ¹⁶ gǝ ura pu wo̱'sǝz kana gǝtǝ pe'ek yalurǝ pa. ¹⁷ Ama ina yirkurǝnni naa iya ipu naa yangii naa iya ipu amǝska yangiya leriyairə! ¹⁸ We̱e̱rǝn Bil naa gau zo̱o̱ra niikrəllə pa. ¹⁹ No̱k ɓerka baara gbi'lal pii a me̱'ɗǝ zok pa diga zo̱o̱ra Bil womǝn dǝllakrǝ haa ri'ak, gǝ bo̱'rǝmka bǝn pa. ²⁰ Sinaa Bil na ya'rǝ ru'ii pa, maza keekaz pii pa, ama no̱k iya i te̱e̱gii, ya'rǝpu ge̱'ma ru'uyirǝm. ²¹ No̱k riik uza na doosa bonge, 'Gwenum, kweebaazi' koo 'Gwenum, aa az!' kaa esǝ timr pa. ²² anabaawaiya songbrǝi naa Kweebaiya songbrǝi i gbǝtǝk sǝ i bo̱'rǝ neta mǝssǝmdǝt sǝbo sǝǝrǝ ina i te̱e̱gii. ²³ Gbagǝn to' n doosǝnpu neeti ɓala. ²⁴ ama ɓǝrka baari na assapu ru'irǝ, tǝgra kamsǝk ubla, se'raasa okǝk pa, ²⁵ zosi i katǝk diga billǝ paa, gbi'kǝma pu billǝ paam lamrǝk. ²⁶ Erizi sǝ i og Waa Maz tiitǝkrǝ kolirǝ te' na gbam naa gbi'kəm. ²⁷ Roozi sǝ tomtǝk malaikaaiya ullǝi sǝ i toogǝs iya i te̱e̱gii diga ko̱'kiya narkə dəlləirə naa ara dǝl naa billa paal kǝsǝnakrǝ yas. ²⁸ Kubrun una te̱' rumbrǝ. Ina og na ma'tǝ dangsni, i me̱e̱me̱n inge wumsa rektǝpu. ²⁹ Rii gǝbǝn ina og neta n doosǝnat bo̱'rumkarǝ, me̱e̱n inge pu dera pou sugognarǝ. ³⁰ Zǝmazi n pu dooskǝndǝ, bààsa as ark pa sei neta at yas na bo̱'rum. ³¹ Ara paak naa diik assǝk an, ama paka miik ark pa. ³² Ubla na zo̱o̱rǝ paa boo ura me̱e̱z pii pa, koo malaikaiya billǝ paai, koo Waa maz sei gwan Daa kotto. ³³ Gbagǝn tok, gemn! no̱k i me̱e̱ zoora rool pa (Biita do̱o̱t doo géé: Gbagǝn tok! Zo'on sǝ i We̱e̱rǝ Bil no̱k...) ³⁴ Pii ni maza ree ginummazak, daa gwaaga ullǝk sǝ tos se̱niya ullǝi ina gbaa gwaagi, koone̱e̱ya naa to̱msa ullǝs. Doosǝ oobaza gwa'az kana rus pa. ³⁵ No̱k riik zo'on! No̱k i me̱e̱ bǝlla dangwanza naa gwaagaz gǝtkǝnak pa, koo naa nimz, koo naa teteeg, koo kǝ́ǝ́z na kwiitǝ, koo naa nit. ³⁶ Na gǝtǝ na gbakǝs, kaa ii sǝna oksa rumrǝ pa. ³⁷ Ina n doosǝn an n doosǝn koone̱e̱ya: Zo'on!"