¹ Yeeso ma' kubruskǝni naa re̱'sa pak. Doo bonge, "Maz uza baa inaabi sǝ ko'su sǝ ze̱' dura ɓo'ka innabizirǝl. Wom ar oou sǝ esǝ baabai uri baaka eki ina geu. Sei ree ginum ar ukarǝ. ² De zo̱o̱ra apkpa nen tettirǝi go̱'tǝ, tomtǝ se̱nza ullǝz baabaiyirǝ naa kwe̱e̱tǝ nen te̱tti. ³ I ɗu'u i ne̱nu gǝǝ na' kotto. ⁴ Gǝbǝn tomtǝ se̱nz uza, i bǝsu zullǝ sǝ i ne̱nu naa dǝgsa zur. ⁵ Gǝ gǝǝ tomtǝ uza, ezi i ipsu. I ɗu' uri gǝŋna, i iu uri gǝnŋa. ⁶ Pii na maz uza muzǝ gǝbǝn sǝ tomkpus, waza ullǝ íuwaz. Uzi ura tomsiu ɓamsǝnarǝz. Doo bonge, "Ləəgə i esku gbi'kəm." ⁷ Ama baabaiyi i dookǝn gwanirǝ te', "Ura pe'ek ɓintaz aa az, a ipsu sǝ ɓinta root na seesaa." ⁸ I kamu i ipsu sǝ i keesu ba' a ekirǝ sǝ i kosu. ⁹ Ri'ekigǝ ura naa baakaz bo̱'o̱k anya? Zak sǝ za wo̱'o̱s baabaiyi sǝ esǝ uri baaka rook. ¹⁰ I zangǝ ina rababai doon paya? 'Bìlla wombai i mu'us al uli gau kookǝzzǝ. ¹¹ An keetǝ Daa Billǝ, ama pu wessa aarǝ mu'." ¹² I íi kamkpa Yeeso ama i serum bansa mari, no̱k i me̱e̱me̱n pag re̱'sa pakki iirǝ paazi. I faks i daau. ¹³ Sei i tomtǝ Farisaawai na Hiriduyaawai uri ina ruusu təraa sarkən pakak. ¹⁴ De i zaa, i de̱su géé, "Lamz, e me̱e̱me̱n mo̱o̱ una kassa naa paka mazzǝk pa, gǝ a yii be'sǝm marirǝ te' pa. A kubrusǝn paka Billǝ zǝmak. To̱o̱to̱n ara e eskǝn sook Kaisarrǝya koo to̱o̱ paya? Ena tog ya koo enaa tog paya?" ¹⁵ Ama Yeeso me̱e̱gǝsapu dangkaama iim, doosi géé, "no̱k an sǝ i gwege ya? Ettǝne dinaari n gwentu." ¹⁶ I kamtǝ Yeeso dinaariya rooz. Doosi bonge, "Muug naa goosa ne̱e̱rǝssaa as ya?" I doo bonge, A kaisarrǝs." ¹⁷ Yeeso doosi bonge, "Esǝn Kaisar ina ullǝn, Bil boo a ullǝn." Mǝssǝm kami naa ur. ¹⁸ Sei Sadukiyaawai iya i doo bonge ruukaa robaamrək pii pai i zaa ullǝ. I de̱su bonge, ¹⁹ "Lamz, Muusa biisee bonge 'zǝǝza mazzǝz na wǝr sǝna dàà kiiz, amaa na ding waz pa so̱'oza ullǝz naa gǝǝs kiizi sǝna kinsǝ zǝǝza ullǝz waz. ²⁰ Uri i pii í gbansa,ura se̱e̱nzaz kam ki' wǝr i ding waz pa. ²¹ Sei ura gbo'uwaz gǝǝsu, wǝr dàà waz pa. Ura taazaz bǝn rii. ²² Íi gbansa yas, i ding yangi pa. Sa'kaa roozǝ kitakiizi gǝ wǝr. ²³ Ubla ruuka robaamrǝ ina ruutǝ, gakp kiiza ne̱e̱rǝzzi ya? No̱k ii gbansa yas i kamsupu kiim. ²⁴ Yeeso doosi bonge, "No̱k ànni sǝ i yaa, no̱k i me̱e̱ pangna rababai koo gbama Billǝm pa? ²⁵ Ina ruu robaamrǝ kamkpa kiiz koo rekaa kiimrǝk pii pa, ama ipu ni malaikaiya biilǝ paa yak. ²⁶ Ama ruukaa robaamrǝk rǝ paa gǝ i zangǝ paka Muusa bii rabaaza ullǝzzǝ pa ya, ni Bil pagǝn sǝ doo bonge 'Miizi Biila Ibraahim rǝl, naa Billa Ishaaku rǝl,naa Billa Yaakuburǝl?" ²⁷ Ur Billa wǝrkirǝlli pa, ama a iya naa zǝngsai rǝi. I yaapu bila." ²⁸ Muzǝ Lamiya Muusarǝ do̱o̱kairǝi zaa sǝ gee ipu pakrǝn, og Yeeso bagi wessa. De̱s Yeeso, "Do̱o̱kaa pazzi ar a yasai ya?" ²⁹ Yeeso iisu bonge, "A araz uzi, Geen Israilaawai, Daa Billa aal pu mulǝ. ³⁰ Íin Daa Billa mo̱o̱l naa timra mo̱o̱l, naa zǝngsa mo̱o̱s na sundumeya mo̱o̱i naa gbama mo̱o̱m yas.' ³¹ Ittǝza rooz uzi, 'íim do̱o̱wiya mo̱o̱z ni a íin zura mó̱ndǝllak.' do̱o̱kaa ar eyiz pii pa." ³² Lamza Muusarǝ do̱o̱kairǝ ezi doosu bonge, "Lamza wessaz! A doopi zǝma ge Bil pu muzǝ, gǝ uzaa goouwaz pii pa. ³³ Maz na íiu naa timr, naa me̱e̱ka, naa gbam yas sǝna íi do̱o̱wiya ullǝz ni zura gwandǝllak ar an eska hadaaya." ³⁴ De Yeeso og ni bagǝn pakki na ɓe'kuk doosu géé, "Apu aari na gwanta Billǝt pa." Diga ekirǝ koo uza sundǝ de̱ska Yeeso pa. ³⁵ Yeeso pu kubruskǝndǝ gwaaga Billǝkrǝ sǝ iisi doo bonge, "No̱k an sǝ Lamiya Muusarǝ do̱o̱kairǝi i doo bonge Kweebaaz waza Daudarǝzziya? ³⁶ Dauda naa zura gwandǝl, yi' naa Rumsa Billǝs doo bonge ' Daa Bil doosǝ daa a miiz, gam na' go̱'naa miikrǝ sei mina wo̱'sapu umkeereiya mo̱o̱i zannga'. ³⁷ Dauda na zura gwandǝl de̱ru 'Kweebaaz', bo̱'rǝ ga sǝ gau waza Daudarǝz ya? Bansa mariyi i ke̱' to' naa yaksa zok ullə. ³⁸ Yeeso ge̱e̱si kubruskǝnaa ullǝkrǝ doosi bonge, "Ge̱e̱nge̱n Lamiya Muusarǝ doõ̃kairǝi iya i íi ko̱o̱lǝka naa yalǝna gbi'nan naa dǝ'ǝska ar luumorǝ te'ek, ³⁹ naa gǝ Firissiya gb'kiyai i íi gamna tǝnteya gbi'kiyairǝ Rora Billǝllǝ naa ar naasǝi. ⁴⁰ Gǝ i zambo tuuki, i íi we̱e̱rǝka Bil naa ye'eska pak no̱k mari sǝna okbo. I kink wo̱'o̱skaa gbi'kak. ⁴¹ Sei Yeeso gau popsa ar esǝkrǝ Gwaaga Billǝkrǝ sǝ gwen mari ni ipu me̱'kǝn we̱ēsǝk. Gwana mari gǝnŋa i me̱' we̱e̱s gbi'sǝs. ⁴² Sei tuukǝz uzaa naa zaamaz zaa sǝ me̱' aninii ittǝkkǝ. ⁴³ Yeeso de̱r kubrubaiya ullǝi ar mukǝ sǝ doosi bonge, "Zǝmazi n pu dooskǝndǝ, tuukuzza az essǝpu ina ar a koone̱e̱n iya i me̱ we̱e̱s in me̱'narǝn airǝ. ⁴⁴ Íi yas i kaa a pisi gǝnngandǝ sǝ i esǝ, ama ur naa zaama ullǝm esǝ we̱e̱sa pisu gamna dəllən yas."