¹ Yeeso daa arki sə ri'gə buta Yahudaawairəttə, ga'sa womaa Urdunnakrə bansa mari i zaa ullo gəbən sə kubrusəni ni ke̱e̱sənnak, ² Farisiyaawai i zaa ullə səbo gwegu i de̱su "Go̱'go̱n maz na fas kiiza ulləzzak ya? ³ Sei íisə gbone "Muusa gə doosən anya?" ⁴ Ì doosu bonge "Muusa iisapu maz na biisə kiiz saatifiketa faksəka kiimrəz səna wa'u." ⁵ Yeeso doosi bonge "Nok wengka timteya ii sə Muusa biisən dookaa ezi ⁶ ama diga ma'ka go'rəka dəllə Bil go'rə yaara maz naa kitakiiz ⁷ nok ri'ik maz daak daa ulləz naa maiya ulləz sə mapsə kiiza ulləzzə, ⁸ iya ittekə eyi i gakp zok mukə ⁹ nok ri'ik ina Bil daksapun maz kanaa mar pa." ¹⁰ De ipu gwaagirə sei kubrubaiya ulloi i de̱su paka ekirə, ¹¹ doosi bonge koo ne̱e̱ya fas kiiza ulləz sə kam kiiz uzaz bo'rə zinazi naa ur. ¹² Koo kita kiiz na daa ya'za ulləz səna ɓəə ya'az uza bo'rə zinazi naa ur. ¹³ mari Ì kamtə yangiya ye'kiyai nok səna po'gi ama kubrusbaiya ulləi Ì bi'si, ¹⁴ De Yeeso og ri' baar sugu iirə sə doosi bonge, "Daan yangiya ye'kiyai ina zaa miirə kai ro'ni pa nok gwanta Billət a̱ iirettə ¹⁵ Zəmazi n doosən ne̱e̱ya kwee gwanta Billət ni yangiya ye'kiyai paz torək gwanta Billəttə pa." ¹⁶ Sei pe' yangiya eyi gwandə na'rə sə saasi nat sə sə'si. ¹⁷ De ma' ri'gətta ullət, sei maz uza noktə sə za gu' ullə mu' sə de̱su bonge, "Lamza wessaz n bo'rək an sə n kinə zəngsa ɓampas ya ya? ¹⁸ Yeeso doosu bonge "Nok an sə a̱ de̱re maza wessaz ya? Ne̱e̱ya wessaz pii pa sei Bil gwan muzə. ¹⁹ A me̱e̱ dookai bonge, 'kaa iu maz pa, kaa bo'rə zina pa, kaa ruuro pa, kaa bo'rə sedaakumma songbrəm uza rə paa pa, kaa zambə uza pa, noosəm daa mooz naa maiya mo̱o̱z'." ²⁰ Mazzi doo bonge, "Lamz ne̱tti yas n bo'russapu diga n pu wazzəz. ²¹ Yeeso gwenu naa no'a gbaaakarəi sə doosu una piti munə saa kine p. Yingəsəm ina pisan yas sə a za duuye, ²² ama de gee pakki sei zok wəssu sə ri'gə naa gomta baar nok ur gwana mazzi. ²³ Yeeso gwendi sə doosə kubrubaiya ulloi bonge "Go̱mgo̱n baar ara gwana maz torkən gwanta Billəttəkrə sei ²⁴ mesəm kam kubrubaiya ulləi paka ekirə ama gəbən Yeeso doosi bonge, yangi ina gombaaranni torkaa gwanta Billəttəkrə ²⁵ Na riizi gə Gelooba torkton dura zillarək naa ara gwana maz torkən gwanta Billəttək ²⁶ Sei məsəm kami i doo gwanirə te' bonge sə ne̱e̱ gbisək ya? ²⁷ Yeeso gweni sə doo bonge "Marirə gə! go̱mgo̱n baar, ama Billə mu' koo anya ina bo'rəmkanni. ²⁸ Biiturus pag naa ur doosu bonge e daatə koo anya sə e duuta. ²⁹ Yeeso doo bonge zəmazi n pu dooskəndə koo ne̱e̱ya ura daate gwaagaz, naa zəi,naa watkiwi, koo mai, koo daa, yangi, koo but, nok mii naa paka tingkak, ³⁰ sə kink baka zu' gbanarə zamanuwa azzǝ: gwaak naa zəi naa watkiwi naa mai naa yangi naa but naa bərka baar ru'a ipu zakrə airə kinkkin zengsa ɓampas, ³¹ ama gənŋa iya se̱e̱niyai i gəək sa'ka, a sa'kai ì gəək se̱e̱niyi. ³² Ipu ri'gittə rekarə Urusaliima Yeeso pu iirə mu'ka məsəm kam kubrubaiya uləi. Iya i duuti sa'kai ser kami sei Yeeso e̱s iya komna naa ittəkei eyi sə ma' dooski ne'ta bo'rəmka naa urat, ³³ sei doo bonge apu ri'gəttə Urusliima i essək Waa Maz firissiya gbi'kiyairə naa biibairə na'rə. Ì ze̱e̱suku bisa wərkrəs sə esku iya i me̱e̱ Bil pairə na'rə. ³⁴ Ì ɓandəsku sə i tu'rusu tuttə sə i ɗa'au sə gə̱ i ipkpu ama ru' taree ina ar ruuk ³⁵ Yaakubu naa Yohana yangiya Zabadi rəi Ì zaa ullə sə i doo bonge, "E ii enge aka bo'see ina e ooran yas, ³⁶ doosi bonge mina bo'sən anya? ³⁷ Ì iisu bonge aka iisee eka gau uza na' rəgnaa mo̱o̱krə, uza na' ukeya mo̱o̱irə gbi'kima moom rə. ³⁸ Ama Yeeso iisə bonge "Ì me̱e̱ ina i orukan pa, i le'eklen bo'ka naa kəra mirə n bo'kənakya? koo i le'eklen ɓəska baar naa irəm batismaa miirə i bo'səkeuwazz ya? ³⁹ Ì doosu bonge e le'eklen .Yeeso doosi bonge koppa n bo'kuz ii bən i bo'kunbon gə batismaa miirə i bo̱'sewwaz ii bən i bo'sukənnu, ⁴⁰ ama gamnaa miirə na' go'na rəz koo na' ukarəz a̱ miini sə n esək pa ama sei iya i go̱'rə nok íi. ⁴¹ De kubrubaiya komna i seei i gee ri' ba̱a̱r sugi Yaakubu naa Yohanarə paa, ⁴² Yeeso de̱ri gwande popsarə sə doosi i me̱e̱me̱n gwaniya iya i me̱̱e̱ Bil pai ii gə do̱o̱niya iirə gbi'kiyi i yiisi gbam, ⁴³ ama gakp ri' iire te' pa, koo ne̱e̱ya ii gakkpa gbi'zəz iire te'kaz gakp se̱nza iiz, ⁴⁴ gə ura ii gakpa sé̱é̱nzəz iire te'kaz, gakp se̱nza Iiz yas. ⁴⁵ Nok Waa Maz nok sə Ì se̱nkunuk pa, ama ur se̱nkən urik, esək zeəgsa ulləs ina kweeka mariren genŋa. ⁴⁶ Ì zaa zeriko, de i daatə zeriko naa kubrubaiya ulləi naa bansa mariiyi , uza pii i de̱ru Batimaawus waza Timaawussəz gau ɓapsa bilarə, ⁴⁷ de gee bonge Yeeso maza Nazarattazzi pu arkrə sei te' gwera sə doo bonge, Yeseo waza Daudarəz, ogəm yirkuwa miiu. ⁴⁸ Uri genŋa Ì bi'sə ruzzi Ì doosu bonge na rəəs, ama bage təka gwera bonge waza Dauda rəz ogum yirkuwa miiu. ⁴⁹ Yeeso de' sə doosi bonge ina de̱tu. Sei i de̱tu sə i doosu bonge ruutum, zok na yaga pu de̱rkarə ⁵⁰ sei kos yaluwa ullə gbi'wau, təəgəm sə zaa Yeesorə. ⁵¹ Yeeso de̱su bonge a ii mina bo'sa anya? Ruzzi doosu bonge lamz n ii oka ar. ⁵² Yeeso doosu bonge eska timra mo̱o̱l go̱'sapu ni umkpa norak, sei kinə oka ar sə duu Yeeso sə i ri'gə.