¹ Na dimta nit ubla seenka ge'emrəkrə kitaki'a ei i pe' waaga dəək i gorəz sə ri'gən ar gagrə. ² I ree oks i giisapu billa su' gagəllə eli gbopsarə. ³ Ama de i tor roo i oks zoka Yeesorək roo pa. ⁴ I de' naa sundumerə innirə paa, sei i og mari ittəko naa yalən bunun sə sekə ni oosak de'narə gonirə pourə. ⁵ Sər kam kitaki a ei, i tangs zu'tiya ii dii, sə mariya ei i doosi gee, nok an sə i laa maza naa zənngsaz mariya i wərapuirə te'ka ya? ⁶ Pu ari pa, ruu pu, i sundə ina doosən bəlla i pun yamma Galililə paya? ⁷ Doosən gee, waa maz essək zok mariya naa hakkeiyairə na'rə sə i igkpu, sə ruusək zok ubla taatəkrə gəbən. ⁸ Sei iya ei i sundə naa ina Yeeso doosin. ⁹ De i gətə gagəllirə sei i doosə iya i seetə komna naa muzəz ei, naa iya ipu yammai yas ina bo'ruman. ¹⁰ Mariyamu naa Magdaliya naa Yuwana naa Mariyamu maiya Yakubu rəz, mari uri iya i pu yammai, ii i doosə tombai ina bo'ru,mman. ¹¹ Ama pakki goosi paka zukkak nok i kweepa, gabsi ni səəzak. ¹² Nokkarik Bitrus ruu paa sə no̱k rekarə gaggəlli rə, to̱ng dii sə tu̱u̱, oks yalləna i ɓundusunun gbəunarə, sei gəə gwa' pu sundumirə gee an bo'rum ya? ¹³ Kubrubaiya Yeeso rəi uri ittəko i ruu gon ublaa ekirə ipun reekrə della i der Imawuusallə, diga Ursaliima rekarə roo melli gbansa zi. ¹⁴ De ipu pakrə gonirə te'ka, neta bo'rum attə paa yas . ¹⁵ De ipu pakə sə i dedəskən gonirə te'ka, sei Yeeso gbosirə gonnirə te'ka sə i toggə yamma. ¹⁶ Ama no'a ii i le'u oogəska sə i meegusunu pa. ¹⁷ Yeeso doosi gee anni moi mariya ittəko ai i pakrə bilarə paa ipu rigəttə ya? ¹⁸ Uza muzə iirə te' i deru Kiliyobas, desu gee moo mara ginzi Ursalima sə amee ina bo'ruman paya? ¹⁹ Yeesu doosi bonge, ''An bo'rum ya?'' I iisu bonge, neta bo bo'rum naa Yeeso a Nazerettas tele. Ur anabi. Punaa gbi'kəm pakrə naa tomteya ulləirə, Billə mu' na marirə mu'ka tele. ²⁰ Naa ni firissiya gbi'kiyai naa dooniya eerəi rək, i esku sə i agu vaga raurə sə imnuk. ²¹ Ama e essəpu timr uzi kweek mariya Israilai, sə ri'ak kee pu ru' taarei, ni inni bo' rumunnak. ²² Am kitakiya ipu yammai i zaa ina məz zokkan gee, e ree gaggəllə naa nita at. ²³ De e oks zoka ullək pa, sei e og tombaiya Billəi ittəko, i doosee gee, Yeeso ruupu puna zəngs, sə e gətə e zaa doosə tombai. ²⁴ Mari uri eerə te' i ree ar gaggəllə, sə i oks ni kitakiya eyi i doonak ama gon gə i ogtu pa. ²⁵ Yeeso doosi bonge, kai mooi mariya i mə'əi, sundumiya iirə eska timlə ipu topa, i me̱e̱ ina anabaawai i pagan paya? ²⁶ Ina go'onni Kweebaaz ɓerk baar nok netat tele sə tor go'numa Billəm rə. ²⁷ Ma'karə diga Musa rə haa rekarə anabaawai tele Yeeso po'gəsini, pakrəma rabaabai i doo ullə paam biisinnən. ²⁸ De i reksək dellirə dəra, sei Yeeso ruu maa gbakuu sə ar iirə mu'. ²⁹ Ama i ooru na kəsə naa boo eri, nok tuks ku'sapu, sei i ri'gə yam naa Yeeso. ³⁰ Bo'rum ri'eri, de ree gau naa ii ar rekrə nok reka rek. Re gau dii naa ii sə ma' reka rent , sei pe' buroodi sə sə'su sə ka'gəsu sə essiu. ³¹ Sei no' i gbe'rəm, sə meegəs gee uzi Yeeso, sei yaasi arkirə. ³² Sei i dookən gwanirə te'ka bonge, ''Eska timra aal po'sapu, zoora pu pakəndellə haa doosaa pak rababaazə roo paya?'' ³³ Sei i ruu i gəə ursalima bəlla elirə sə ree oks kubrubaiya komna naa muzəz eyi ar muko, naa uri yam yas. ³⁴ I ree doosi gee, zəmazi Dangwanz ruu pu, gəbən gbosə Simon də mu'. ³⁵ Sei i ma' dooka ina bo'rum naa ii billarə paan, ni no'a ii gbe'rəmənak naa ni kwe'gəsini buroodi. ³⁶ De ipu dook pakrəmmi rə gbosirə, pu de'narə gonirə te'ka, sə doosi gee,"N zaa roo." ³⁷ Sei i pi'gə sə ser kami, roobaazi. ³⁸ Sei Yeeso doosi bonge, nok an sə i sərəm ya? Nok an sə sinum ruutə ində te'ka ya? ³⁹ Ogən natta miit naa dənta miit, minzi naa zura miil. Pogne nok roobaaz puna neng naa gala ni i ognek pa. ⁴⁰ De doosi pakki sei yiisi natta ullət naa dənta ullət yas. ⁴¹ De ipu geek tinturə naa yaksa zok wesswe sə gəbən inni məsi, sei Yeeso doosi bonge, uza puna ina rekarən ya? ⁴² Sei i esu dugga a boksapu zokkak. ⁴³ Sei kwee dugga rook sə təu gonirə te'ka. ⁴⁴ Se doosi bonge, ''Zoora a pii yam allə, N doosən don minge ina pu biisinnən dookaiya Muusa rəirən, naa ina anabaawai doon yi'sək zok tele.'' ⁴⁵ Sei gbe'rəsi timtiya íí sə i me̱e̱gəs ina rababaaz doon. ⁴⁶ Doosi pu biisinnən Kweebaaz ɓerək baar sə wər, ama ruutək naa zənz ublaa taatəkrə. ⁴⁷ Sə paka ra'səka hakkeirək paggək zok naa riira ullə ko araya dellə yas, i ma'ak diga Ursaliima. ⁴⁸ Moo íí i gakp seedaakuiya neta attəiyi yas. ⁴⁹ Ogən N pu tomkəndə ni Daa miiz doosnek, ama zo'on dəllə te'ka zanga sei mina tomtən pu Rums diga paari.'' ⁵⁰ Sei Yeeso ar iirə mu'ka sə i ri'gə yamma haa ma' reksəka Betanya, sei na'a ulləi sə sə'si. ⁵¹ De pu sə'səkirə sei i pe'su billə paari sə dayi. ⁵² Sei i noosu sə l gətə Ursaliima naa yaksa zok wessa we'. ⁵³ I dakkən ar muko gwaaga Billəkrə roo sə i noos Bil.