¹ De'sən zok gbaakənkarə sə i wengs zok laaka esəka rumsəkrə, a me̱e̱ka neta bo̱'rumkpattə. ² Ura pag naa me'tez pag naa mariyi pa ama pagən Billi. Ura me̱e̱gəsənas piipa nok neta sumsəntatti Rumsə. ³ Ura doo neta bo'rumkattas doosə mariyi nok sə ina me̱e̱ səna wengrisi, səna na gapsi wagəllə. ⁴ Ura pag naa meel ullaz yas wom zura gwandəlli, ama ura doo ina bo'rumkanaz wom iya i esə timr Billəiyi. ⁵ Ri'ak íí yas n íí minge ika pag naa me'te soma so'. Haa na ar ri'ma n íí minge ika doo ina bo'rumkpan. Ura doo ina borumkpan az ar an ura pag naa me'te soma so'oz (sei uza na gənkən nok sə ikiliisiya na wom zok). ⁶ Ri'ak uriyangi, mina ka pag naa me'te soma so' iirə ika meegis rigaya? Sei mina ka doosən rudumrə ko meegəskənarə koo dooka ina bo'rumkpandə koo kubruskəna paka Billəkrə paa. ⁷ Neta naa zəngs pat tele ni gul naa ɓangk inaka ii omiipa, neezi ka me̱e̱ gee ipu uuk, ko ipu du'uk ɓangkrə ya? ⁸ Ina ka piptə pora wessa pa neezi ka go'rə zoka ya'amrək ya? ⁹ Ri'eri bən naa ii. Inaka pag naa meel ulla, ura pazzi ka meegəsən ina i pag an ya? Ika pagrə maz ka me̱e̱gəs pa. ¹⁰ Zəma zə' me'te ipu soma so', dəllə roo me'teya ai yas a go'pal piipa. ¹¹ Mina ka gee meel ulla pa, n gau pu mara gingziz geeka pakkirə, ura pag az boo ka gau mara ginz miirə. ¹² Ri'erizi bən naa mooi ii. Zoka i iin oka tomteya Rumsə gbi'kiyai, yaan naa esəka noos ikiliisiyak. ¹³ Noka ri'ik ura pag naa meel ullaz naa weerə sə ina esu esəka gəngkəna pakrək. ¹⁴ Minaka weerə naa meel ulla, rumsa miisi weerə, ama sundumeya mii i bagsə maz una pa. ¹⁵ anni n bo'ok ri'ak ya? N weerək naa rumsa miis gəbən n weerək naa sundumeya miiyi. N zingk gella noosəka Billəl naa rumsa miis. Gə i zing gel naa sundumeya miiyi. ¹⁶ Naka ri'eri pa, monaka noos Bil na rums, iya ipu te'pai i dook ''Na gau ri''' mona ka pu iik useekorə na mee ina apu dookrən pa? ¹⁷ Koo noka a iisən Bil useeko, doowi a mooz bo una bagə ullə pa. ¹⁸ N iisə Bil useeko nok n pag naa me'te uri sə n arən yas. ¹⁹ Mariya i isə timr Billəirə n ii nka doo pangn gbanaarə nok kubruskəna uri naa ara n dookən pangn mul komna na meel ullarək. ²⁰ Uriyangi, kai gau na sundumeya yangirəi pa. Noka ri'ik ar ukurə a gau naa goosa yangiya leriyairəs, ama sundumeya iirə pe'en goosa doorumrə. ²¹ Pubiisənən, ''N pakən pan mariya ai naa meela go'pal. Naa meela mara ginirəi n pakən mariya ai, naa ri'ik bən i geeke pa, ''Daa Bil doo ri'. ²² Na ri'ik pat me'te i yii alamazi, mariya i esə timr airə pa, ama mariya i esə timr pairə. Dooka ina bo'rumkpan nok iya i esə timr airə nok iya i esə timr paipa. ²³ Noka ri'ik mariya i duu Bil ai ina tookən sə ina pag naa me'te soma so' iya ipu gokairə mariya i esə timr pairə, ika doo gee i yerəpu ya'te paya? ²⁴ Koo neeya nakapu dook ina bo'rəmkpan sə uza iya i esə timr Billə pairə ko mə'əs na totə pakki na pa'u səna kwee i biisku bin naa neta i doo eti yas. ²⁵ Neta sumsənta ullə timrlət gbərk, noka ri'ik kasək sə noos Bil. Sə doo bonge, zəma Bil pu moo iirə te'. ²⁶ Anni bən iirə ya uriyangi? Ina dakən ar muko uza punaa gella nooska Billəl, uza boo kubruskəna paka Billək, uza doo pak, uza boo paka na meel ulla, uza gənkəna pak. Bo'on koo anya sə i wom ikiliisiya. ²⁷ Uza na pak pan naa meel ulla, kana ar mari ettəkə ko taarəkə pa, ii bən gbo'sirə gbo, uza boo na gən pakki. ²⁸ Uza na pii səna gənkən pakki pa, koo neeya na gau diika di' ikiliisiyarə. Koo neeya naa doosə zura gwandəl na Bil. ²⁹ Uri ettəkə ko taarəkə ina doo bo'rumkpan iya i seetəi ina ke' to' ina i doosikində. ³⁰ Ina do̱o̱sə uza ura pu gamnarəz, sei ura seenza ma' pakaz na gau diika di. ³¹ Koo neeya iirə te'ka doo don ina bo'rumkpan muzo mu' no̱k sə uza naa kubrə səna kin po'ka. ³² Nok rumsa anabirəz kam zok anabirə dii. ³³ Nok Bil ,Billa səərəme rəlli pa, ama a gabta wessat təlli. Ni pin ikiliisiya iya i esə timr airə, ³⁴ Kita ki' ina gau diika di' ikiliisiyarə. No̱k i isi ara i pakənnak pa. Gobtəra ri'il, sei ina duu, ni dookai i dook. ³⁵ Ina ii meeka una, ina des yaariya ii gwa. Nok ina dəgsa zullən ni ara kita kiiz pakən ikiliisiyarək. ³⁶ Paka Billək ma' iirə ya? Ko iirəzi kotto sə rəktəya? ³⁷ Uza na sundə ni ur anabizi ko esəka rumsək uka, sei na meegəs, ina npu biiskəndə an keetə Billəzi. ³⁸ Uza na sundə neta at pa, ur bən i sundu ku pa. ³⁹ Riizi bən uriyangi, zəma zə'zi de'sən zok nok kinka esəka dooka ina bo'rumkpandək, gə kai ro'on uri paka naa me'te pa. ⁴⁰ Ina bo'rə net yas bilaa to̱o̱krə ina go'rəs wessa.