¹ Bulus, murghǝ shinngǝnni kǝ Cogn, kǝǝ gi ɗaŋ nǝ Ɓorghǝnni, Yesu a kongǝni Cogn murghǝ vumngǝnni wopm, tǝ yan ɗaŋ nǝ Ɓorghǝnni Yesu, ɗaŋ yan cin gaaghǝnngǝ raa wopm. ² A Timoti.. kunetn na jom jomi a giɓkǝ caaghǝn raa wopm. Gyal, tǝ mbutarghǝ raa tǝ vii wusni ghǝ Cogn tǝ Yesu yan ɗaŋ nǝƁorghǝni Daadǝn wopm. ³ Ɗaŋ gi ɗaŋ mǝ fuughǝ a fi a duuli a duuli, ɗaŋ mya wultu mǝ tlii Makidoniya, a naa dlǝǝri Afisa nǝ durghǝ tu a fuu zarsǝ gya gon tǝ giɗshi ngǝtn won mari tǝ gi ɗaŋ mǝ giɗshi ghai hŋ. ⁴ Malarǝn dǝǝl waan a te wumngǝni daadǝnngi tǝ kwaanngǝn nǝ kǝ buŋngǝni hŋ. Gin caa lǝǝr sǝrɗkǝn yer ɗi, a bamvi gi somǝmi ɗa nǝ ɓumtsǝghǝn ngǝtnngǝ Cognvon, ɗaŋ yigha te caaghǝn raa. ⁵ Deighǝ mborki yan nǝ suughǝn ɗaŋ yi jom jomi a raa tǝ ndzǝk ndzǝkki kǝ raa tǝ ɓwaaghǝn kǝ caaghǝn raa wopm. ⁶ Gya gon ta gaa datǝpi tǝ sushi a vii ɓyenndǝmi. ⁷ Caa suu tǝǝ naa nǝ Malǝmshi kǝ mborki, beɗ tǝ gi taa yisǝŋ ngǝtn won ɗaŋ ca kon hŋ, tǝǝ ngǝtn yo ɗaŋ tǝǝ dlǝǝrghai. ⁸ Beɗ tǝ gi maa yisǝŋǝi mborki nǝ ngǝtn won ndara, ǝŋ myaa fi laaghai a datǝpm yo ɗaŋ kyaa laaɓ. ⁹ Yan tu ma yisǝŋ tu mborki nǝ kǝ zaar zaari hŋ, beɗ tǝ gi nǝ kǝ muryo ɗaŋ caa tsal mborki, zarsǝ mǝn shisherghǝn raa laaɓkǝn Cogn hŋ tǝǝ mǝn kuskǝ ngǝtn, tǝ gya gyo ɗaŋ cinǝ nǝ kǝ Cogn hŋ, tǝ mǝn kemaskǝn lǝǝɓ tǝ vǝr mborki nǝ durghǝ mǝn tlaaghǝn gya daa wasǝŋ tǝ gya naa wasǝŋ tǝ mǝn tlaaghǝn zarsǝ. ¹⁰ Durghǝ tu mǝn mbǝllǝ, tǝ mǝn monci ɗaŋ caa mbuɗ tǝ mǝn monci, nǝ durghǝ gya gyo ɗaŋ caa cii mǝǝr zarsǝ tǝ ɗiiɓar shi washi nǝ laaghǝ mon tǝ gya gon ɗaŋ caa nyom zarsǝ tǝ tlǝǝr nǝ laaghǝ monsǝ, nǝ durghǝ mǝn mbyerni tǝ ɓuruk ngǝtn yo ɗaŋ caa nyaŋngas ngǝtnngǝ na jom jomi. ¹¹ Konngǝnngǝ luughǝn kǝ vik wusni ghǝ Cogn kǝ shiɗshiɗi kǝ gyo ɗaŋ tǝ vǝrǝm tu tǝ caa vwaa ti. ¹² Mǝ nyaar Yesu mǝn ɗaŋ nǝ Ɓorghǝnni Daadǝn wopm gyo ɗaŋ a tlyaam moɗ nǝ durghǝ tu a caa vwaati ɗaŋ a vǝrǝm laai gini. ¹³ Ɗaŋ a tayi ɓanndǝŋ mini murghǝ kemaskǝ lǝǝɓ tǝ matsǝghǝni, tǝ mǝn shisherghǝn raa. Beɗ tǝ gi tǝ mbutarǝm raa mǝn, duryo tu mǝ fishi tǝ yisǝŋngǝni hŋ tǝ caaghǝn raa hŋ. ¹⁴ Beɗ tǝ gyal Daadǝn wopm caa shiimǝnɗi tǝ caaghǝni raa, tǝ suughǝn ɗaŋ yigha te Yesu ɗaŋ nǝ Ɓorghǝnni. ¹⁵ vii wusni gin nǝ gyo ɗaŋ caa vwaa washi, ɗaŋ a kǝǝm ɗaŋ ɓuruk mǝ kaɓi tu nǝ kǝ Yesu ɗaŋ nǝ Ɓorghǝnni ɗaŋ a man ɗǝgn nǝ durghǝ tu tǝ vum mǝn kusǝŋsǝ ngǝtn a giɓi wasǝŋ ɗaŋ mǝ moɓ laaɓkǝn zha. ¹⁶ Nǝ durghǝ gi, mǝ tu mbutarghǝn raai, durghǝ tu te ɓasǝm mǝni kǝ keni, ɗaŋ tǝǝ giɗ dumngǝn vwaa ɗaŋ kǝ Yesu ɗaŋ nǝ Ɓorghǝnni. A fi gin nǝ duryo tu mǝ naa nǝ ngǝtn giɗkǝni a gya gyo ɗaŋ taa caa raai a raai kǝ ndok ndoki. ¹⁷ Ɗaŋngǝnni, guŋ kǝ usuli, gyo ɗaŋ caa mǝs hŋ, nǝ waɗkǝn Cogn ngǝtn wos kǝ vari tǝ luughǝn tǝ naa ɓastǝ zhyaɗ zhyaɗ. Tǝ naa cik. ¹⁸ Mya gaa ngǝtn konngǝn gin ɓaskǝ, ŋaatn, Timoti. Mya fuughǝ gin nǝ durghǝ ngǝtnngǝ konngǝn jaan ɗaŋ tǝ vǝrǝm ɗa kari a dulgaam waa, duryo tu a fi maandǝ ndarara. ¹⁹ Fi ngǝrshi gini duryo tu a naai nǝ murghǝ caaghǝn raa tǝ raa waa ndarara. Zarsǝ gya gon tǝ nyaŋngas wumngǝn gya gin tǝ caa caaghǝn raa wasǝŋ a laaɓ zha. ²⁰ Ɗaŋ kǝ gya Himinayus tǝ Iskandari, gya gyo ɗaŋ mǝ vǝrshi Shetan durghǝ tu tǝ tu forǝm tǝ kuuɓ kemaskǝn lǝǝ hŋ.