¹ Akana ẹ́pẹn ẹnanẹ uùrunba, Idu tiye ero itakakọrọfọ ẹbẹn, e mi file ba ẹbọrẹbọrẹ yẹ ẹrẹn yi ikẹn aka ̀ ẹfa abẹ nẹnẹ ayẹ ẹbẹba è é ni ka ayẹ a yọ na. ² A ga nẹ ba ka, "Ẹkparẹ ayẹ yọ, àmá ikotoro abẹ kẹrẹ. Ónẹbẹ uùba ṣin ẹkparẹ iÌdu ka e file ikotoro wo yẹ ẹkparẹ. ³ Nẹ yọ nọ ọrikpokpo. Ungbẹẹ, i file nu yọ akọ ududu eègben wo ọdan uùwo eètin. ⁴ Ni ma fọ ikiba aàkpolo dọn, sa ejenro aàkpolo, sa ofilọṣẹn, ni me diya gan korọọrọ ọ́rikpokpo. ⁵ Ubokubo nẹnẹ nà a fọn na, tayi ga ka, 'Iwọbẹbẹrẹ a ma úbo ọnẹ!' ⁶ À á daka iwọbẹbẹrẹro wo ẹfẹnẹbẹ, wi iwọbẹbẹrẹ a ma gbeli ya, àmá e è me wamọ na, è éke pila ni u ṣa. ⁷ Ma wu ubo ọọrọrẹ ayẹ, u ki je u diya kẹ wa ẹkẹnẹkẹna bà a nẹ ọ na, ubaka a bọwọ ka okotoro a na ẹkẹna nẹnẹ e siye yu utun na. Ni i ne ne ububo. ⁸ Ikenkiken nẹnẹ nà a fọn, nẹnẹ bi diye we na nọ na, ni je ẹkẹnẹkẹna bè e wo nẹ ẹrẹn na ⁹ ni mi fọ ẹnanẹ bi iwu e è me siye nẹnẹ wo ẹfẹnẹbẹ na gan. Nẹ ga ne ba ka, 'Osibina ẹẹ̀ṣẹn mi turu ni nu ṣa.' ¹⁰ Ọgbakọgba nẹnẹ nà a fọn iken nẹnẹ bì i ma na nọ na, ni ve wo yo oṣin abẹ ni mi ga ka, ¹¹ 'Ka ewulon í ni iken nẹnẹ do sẹ tọ ọṣẹn na ti pun ya ka a ṣẹn nẹ ẹkarẹ! Àmá ni din ka: Osibina ẹẹ̀ṣẹn mi turu ni nu ṣa.' ¹² Ẹ ga nẹ nọ ka ẹ́karọṣẹṣẹn iìsubu áka bẹriwu ni Isodom fọrẹ iken ayẹ. ¹³ Fẹlẹ ọ, Ikorasin! Fẹlẹ ọ, Ẹbẹtẹsayida! À á daka itun ẹkẹka nẹnẹ bi siye í wi ibe ka í bi siye ẹ Ítire akà Isidọn, ébana bi roribebila ọrẹ fon, bẹ ma ẹ́ṣaka ẹẹ̀sa akà ewurun. ¹⁴ Àmá à áka bẹriwu ni Itire akà Isidọn ẹ́karẹ ọṣẹṣẹn fọrẹ na anọ. ¹⁵ Awọ, Ẹkẹpanahum, u roro ka bà áka fọwọ kpọ yo ososi họn? Hẹnhẹn, í bè éke holo u yi Ihedis. ¹⁶ Ẹfẹnẹfẹna è é pi wa atọn na pi ma atọn, ẹfẹnẹfẹna e diye yuru u yuru mu, ẹfẹnẹfẹna e diye yuru mu na yuru ẹfẹna nẹnẹ file mu na." ¹⁷ Abẹ itakakorofo pila akọ ẹbẹbẹn, bẹ ga ka, ''Idu, ka ẹfunwẹnfunwẹn Idudu abẹ bẹriwu nẹ to í wi iwuru.'' ¹⁸ Ijesu ga nẹ ba ka, "Mà a gba Eṣu akọ e siye wo ososi falẹ akọ ẹnyana na. ¹⁹ Ungbẹẹ, ẹ fọ uburu nẹ nọ ka niya kẹ kpọ ẹpẹnidudu akà ọnẹna akà yẹrẹ ebero iìwogbigben fẹnyan, kẹnakide éke diya họrọ nọ. ²⁰ Àmá ni ma kpẹrẹ ọnẹ aarẹ uùba bẹn, ka ẹfunwẹnfunwẹn abẹ beriwu nẹ nọ, àmá nẹ kẹ bẹn ubaka bẹ wọra ni iwuru wo ososi." ²¹ Ẹ́wakati ọrọọrọ ayẹ a bẹn Ẹ́funwẹnfunwẹn Ọnwọnwọn, e mi ga ka, "I yeyi u, Ẹdẹda, ososi iÌdu akà ẹrọ, ubaka ọ fọ ẹpẹn ẹnanẹ abẹ bẹbẹ nẹ ẹdanyẹnro akà odidinro u min a nyẹn ẹnanẹ bì i me te na, akọ egbenikeke na. Hẹn, Ẹdẹda, ubaka ẹgan e siye rọn wa anyẹn nẹ. ²² "Bi wo tẹ Ẹdẹda ẹfa fọ ẹpẹn fėnyan dọn mu uba, e me diye su ẹfẹna nẹnẹ din ẹfẹna nẹnẹ Ogben wa na efura ka, Ẹdẹda, e me diye su ẹfẹna nẹnẹ din ẹfẹna nẹnẹ Ẹdẹda wa na efura ka Ogben akà ẹnanẹ a barẹ Ogben ka à á nyẹn na." ²³ E bila gegere to egbenurunmẹka abẹ e mi ga nẹ ba ẹ́bẹbẹ ka, "Okurubilero a wa ẹnane nẹnẹ gba ẹkẹna nẹnẹ nẹ gba na. ²⁴ Ẹ ga nẹ nọ, ẹsẹro akà ibin abẹ nibka bẹ gba ẹpẹn abẹ nẹnẹ nẹ gba na àmá bi me di gba ba, ka bi diya wọ ẹpẹn abẹ nẹnẹ nẹ wọ na, àmá bi me di wọ ba." ²⁵ Ungbẹẹ, obubururo ọbẹn kpan fura ka e ni yo owo, a ga ẹ ka, "Otitero, ẹna i diye siye a i di gba ẹrọ nẹnẹ e me su ọta na na? ²⁶ Ijesu ga ne ya ka, "Ena bẹ wọra wo obuburu a? Gana u siye gan ya a?" ²⁷ E pila ye e mi ga ka, "Wè éke ni Idu wo Osibina áka wu uloko fenyan, áka wu uṣi fẹnyan, áka wo ogbigben fẹnyan, áka wo opin fẹnyan, akà wọ ọbawọ áka wi iwu na." ²⁸ Ijesu ga nẹ ya ka, "U gunowo akọ e siye bọ na. Ki siye ọne, wè éke diye wo ẹrọ." ²⁹ Àmá ayẹ, è é ni ka ayẹ ṣẹn ese nẹ yi iwu, a ga ni Ijesu ka, "Ẹra a wa mọ ọbawọ a? ³⁰ Ijesu guna yo owo e mi ga ka, Ẹdẹda ọbẹn wo Ijerusalẹm holo à á yọ Ẹjẹriko. A ṣa a falẹ wo eyiri abẹ uùba, bẹ bẹ ya, bi mi tebi ya akọ e siye ni ka e fo na. ³¹ Ka aṣigiri ọbẹn è é sun ọ́rikpokpo ọnẹbẹ, ọgbọna nẹnẹ a gba ẹ na, a yọ ọrikpokpo ọbẹn ṣun. ³² Kẹgankẹgan ka Elẹviro ọbẹn, ọgbọna nẹnẹ a ṣa ẹfẹnẹbẹ na, nẹnẹ e mi gba ẹ na, a yọ ọrikpokpo ọbẹn ṣun. ³³ Àmá Ẹsamariyaro ọbẹn, akọ e siye wo ejen na, ṣa ẹfẹna a gba ẹ na a ṣa a sọn ye eyi. ³⁴ E turu to ẹ e mi gberi yo oron abẹ nẹ ya, e guma amọ akà ẹwanyin wamọ. A fọ ẹ kpọ yọ ọnẹ, e mi fọ ẹ yọ ọga uùba ọbẹn, à á balẹ ya. ³⁵ Isubu ọọboro e tiye ẹdẹnari ẹbọrẹ, e min a nọ obuwe ayẹ, e mi ga ka, "Nẹ fọ anyẹn ta yi iwu, ẹkẹna nẹnẹ nè e lo bile amọ na, mè éke duna nọ ọgbọna nẹnẹ mè e pila ṣa na. ³⁶ Ẹra, ábẹ̀ ẹtẹta ẹnanẹ iìwu a wa ọbawọ nẹ ẹfẹna nẹnẹ falẹ wo eyiri abẹ uùba na? ³⁷ A ga ka, ''Ọnẹ nẹnẹ sọn ye eyi na." Ijesu ga nẹ ya ka, "Kẹ yọ u mi ki siye ẹgan." ³⁸ Akọ nẹnẹ bi siye ki à á yọ ọ́rikpokpo na, a fọn iken ọbẹn, iyaro ọbẹn nẹnẹ bè e ye Ẹmata na na ẹ ọga wo yu ubo. ³⁹ E su ọda ọbẹn nẹnẹ bè e ye Ẹmariya na, nẹnẹ ma wo Idu ẹẹ̀ṣẹn ẹfẹ à á wọ yẹ ẹga na. ⁴⁰ Àmá Ẹmata è é gbe akanyan ka e siye ijen nẹ ya. E ni Ijesu ṣa e mi ga ka, "Idu, ú ma gba ka mọ ọda tebi amẹ aarẹ ka i ki siye ijen ayẹ ẹ? Ọ́nẹbẹ uùba ga nẹ ya ka e go mu uba." ⁴¹ Àmá Idu guna yo owo e mi ga nẹ ya ka, "Ẹmata, Ẹmata, wà a lakata u diye e gbe akanyan nẹ ẹpẹn ọyọyọ, ⁴² Àmá ẹpẹn ọọrẹ e kponyina nẹ. Ẹmariya tiye ọkpa nẹnẹ rọnmuro fọrẹ, ọnẹ nẹnẹ, be è diya na fura yu uba na.