nbtt-oks_1co_text

Ẹpan 4

¹ Akọnẹ oro se rorotu akọ ikotoro nẹ wi Ẹkraist bilo ofayẹnto nẹ bẹ gbà akọ ikuwa ni wọ Osibina. ² Ẹkẹna be ni ọfayẹnto aàbẹ bi su ikuwa. ³ Ada amẹ ẹpẹn okeke awọnẹ ka bẹ ohẹn mọ ẹkarẹ ochẹnchẹn ubuoò. Ime si chẹn nẹ ẹkarẹ nẹ mimu. ⁴ Ime si din ẹkẹnẹ bẹ karẹ sẹ mọọ na, ama imakaka beka ijese ẹfẹna aka chẹn mọ ẹkarẹ wọ Idu. ⁵ Akana ume mi ga ẹkarẹ ọchẹnchẹn akana yẹrẹ ẹpẹn fẹyan ṣa na yọ gba, Idu ṣa. Aka fuwẹ ṣo ọgbandala ẹkẹna a bẹbẹ esiri aka ayẹn ẹkẹna wọ uloko. Ororo aka na uyeyi furo Osibina. ⁶ Akana mẹ da à ẹfurọ ẹkẹnẹnanẹ to mu akọ Apolosi na nẹka, furu muba ne ke kpiya yio igben ẹga nẹga ka, "Ume ṣun ẹkẹna bẹ wọra" Ọnẹ waka korọkẹ ama kwọ aguma yẹrẹ oro ọbẹn. ⁷ Ẹragba ẹpẹn obo wọ ọbẹn? Ẹna usu nẹnẹ ba ma nọwọ? Wa nẹ ẹna wọrọ uwa ran mowo ewaka uma nẹ na? ⁸ Akana usu fẹnyan nẹ bana uni na! Ewa mọ ka ukẹ fa pọọ̀tọ ti di ma wọ kẹ fa. ⁹ Ami roro ka Osibina fuwọ tọ apọstulu yẹn aka omunuru, akọnẹ ese tuwọ akọ ananẹ bẹ ọhẹn no ufo ekarẹ. Timi ṣinẹ ọbalayẹn nẹrọ na angẹli, aka nerokoro. ¹⁰ Ti chin na abẹ nọ Ẹkraist uba, ama ani su ẹdayẹn Ẹkraist. Ati ren ama ani ṣile. Bẹ fuwọnọ okurunọtime su okurunọ. ¹¹ Se rọ ọgbọnẹ aàwọn akọebi ọkọrẹ, ẹsa oboro ti file emẹ wa mọ, bẹ bẹtọ, ti me su ubu umẹma. ¹² Te siye utun oṣiṣilẹ, tẹ fu ba esie. Bi golitu ti kurubile ọgbọnẹ bẹ kwọ to tu na, tẹ fuwu na. ¹³ Bẹ gẹ ẹlabọ tẹ ga oboro. Ti ṣin na ẹpẹnpan nọ ẹrọ bilọ isinsin ẹpẹn fẹyan. ¹⁴ Ima wọrẹ ẹpẹn nẹ nanẹ fuwọ ẹpan kwọọ̀ ama ti din fuwọ pọ ako me gbẹn nẹ ininẹga na. ¹⁵ Esi daka ni su asẹn ọrẹ ẹfọ nẹ fuwọ ayẹn to nu Ẹkraist, ne me su ẹdada ọyọyọ. Ami ṣina ẹdẹda Ẹkraist Ijisọs ẹpẹpan oboro. ¹⁶ Ẹpẹrẹ nọ ka nẹ balẹ mọ ki siye. ¹⁷ Ẹkẹ awọrẹ ifile Itimoti ẹfẹna ini akọ mo ọgben ikwa ọọ̀ Idu, aka yẹn nọ mọọ orukpọkpọ Ẹkraist, akọ nẹnẹ ise teba ẹfẹnẹfẹnẹ bilọ Iṣọṣi. ¹⁸ Akana nọ ọyọyọ kwọ agumapọ, ni ye siye ka ima ṣa to nu. ¹⁹ Ama maka ṣa na ṣa Idu eni na. Ọgbọnẹbẹ me ke din ka amawọ ẹga gbagba nẹ ẹnanẹ efun, na pọ, ama maka gba bi uwogbigbẹn. ²⁰ Osibina uwogbigbẹn eme juwọn wẹ ga ọgẹ ga ama uwogbigben. ²¹ Ena ne na à Ẹṣa to nu akọ ọpari sọ ununi ako ẹfuwẹnfuwẹn ọbẹrẹ?