¹ Bara ye darang Pentekosh yuwa, shin ding galii ti pi dok. ² Kpantidi ele we in shaaru ti kudang kaa ele gbong pirit, nang in kemoro ta minai piree diini. ³ In perin ti shinui ta dak kaa pele deet ye bwaira, in deeju ti kuuno koonong. ⁴ In kemro shinui ding ka shoomno Yamma in yiu ya paaro ka dak peeni-peeni, kaa ye shoomi kunngan ti shinui. ⁵ Wende ka Yawuudawa me dii ti Urshalima, me an shi Yamma, me penna ti gokmina ding ti gun kudang. ⁶ Bara ye shinui yaara ele we te, jimo memmei in gal shaayi in ti ya maam longku koonong in ta yaaro po minani. ⁷ in ya maam kping ta shinui; in tewi ta shinui ya, "Kulli, ma niye mei ti tewi po me ti Galili maa? ⁸ Penei ka yaa kaman ti yaaro shinui, koonong ti yai ta fokmu kamai? ⁹ Paashiya, Midiya, kan Elemaawa, kan me dii ti Mesopotamiya, me ti Yawuudiya kan Kapadokiya, me ti Pontush kan Aashiya, ¹⁰ Pirigiya kan Pampiliya, me ti Mashar kan peddi kubuk Libiya we watto ka Shaireen, kan bino me wanna ti Rooma, Yawuudawa kan me foraa fokju in yooju me an wawo ¹¹ Yawuudawa, Kretiyawa kan Arabiya, kaman ti yaanna ti ta fokmu kama in ti ya paaro gbidino shuran ye Yamma yuwa." ¹² Shin ding we maam kan jamo-jamo in yiu shinui; in tewi ti shaayi, "We tenei wen dumai?" ¹³ Pene peddi wulin paaro ya, "Kengejui ka men." ¹⁴ Nang Biiturush in illina kan kpumu gee doki, in shokro eleni, in tewon ti shinui, "Shwiji me ti Judiya kan me ma dii ti Urshalima, ma peno we te; ma yaaro paarono kpang. ¹⁵ Ma niyemei kemoi ka menum kaa ye ma nyimmaim, tidangii daddarang. ¹⁶ Pene tenei wee ye teka ta Joyel an-pigro: ¹⁷ 'Ta yoro ti koddi wilan ta piri,' Yamma teka, 'Ne ta fiya shoomno ti ku niyo ding. Shiboma ta ya pigro, shibo kparinma ta we shik jirim wee ta waru, men koddiro ta yuyyo shuna. ¹⁸ Kulli ti ta shaklo te ne ta deru shoomno ti ku shookno men shwiji kan shereb, birang shinui ta ya pigro. ¹⁹ Ne ta shuk we maam ti ku dang kan we temo ti kubuk, dom, deet, kan ilit dungo. ²⁰ Darang ta shiworo dil, Tere in shiworo dom nang gbong darangno Fo-mina in waraa waru. ²¹ Ta yoro ding mo yiyaa shommono Fo-mina ta kauro shii.' ²² Men shwiji Ishereila, ma yaaro paaroi: Yeesho niyo Naajeret Shii shwiji ye Yamma minnama kan shuran yen gbidino ye yuyya ti shakima kan we maam ye Yamma yuwa ti ta kirani ti shakkima, kaa ye ma pena. ²³ Niyo ye Yamma minamai kan penanni; pena ma, ti ta kira me an shek, man tuk shii ka teron kuujama ti shii ti ku gbong biro. ²⁴ Pene Yamman shokro shii, in forin shii ti ta shilib muro, longku muroi ta dum yiu shiim. ²⁵ a ye Dauda yuwaan paaro ti kuuni ya, 'Ne ti we shikno Fo-mina kpaaliyo ding ti adoono, Kaa ye shii ti ku kira temmeno longku shinoi ta taranim. ²⁶ Longkuno te posheerino ta ya bere birang dakno in twaalla. Birang, lo-shikno in diino ta li shaari. ²⁷ ngku ke ta wesshono kerangno ti ta duwom, ke ta dum wessho shaanako dok in ommonim. ²⁸ Ke shuklano koko po we kerang; ke ta kemno ka twaalan shaari ka adoogo.' ²⁹ Mamolonno, ne ta teuma ka bangshik paarono sheemu kama ta Dauda, shii mura in nan shii, duwonii ti jelemu kama we war wende. ³⁰ Longkuno te, shii an pigro in peni ta shii ya Yamma pamma we ya shi ta li po peenni ti ku gubni. ³¹ Shii weya shik wee ye ta yoro ti toom nang in ya paaro illit no Kiriti, ya a wesshuru shii ti ta duwom, kan ya lo-shikni a wa ommim ³² Yeesho tene- Yamma shokraa Shii, ye kama dingii me jimraa wei. ³³ Longkuno te, ka ye shokraa shii ti ku kira temmeno Yamma kan in yiu kumen shaanan shoom ti kirano Fowi, shii deraa wee ma ti we shigii kan yaaranii. ³⁴ Longku Daudai ammo kudangum, pene in tewi ya, 'Fomina teka ti Fo-minano, "deego ti ku kira temmeno ³⁵ we war koddi ye no ta li an geiko in yooju po tabyo shooko." ³⁶ Longkuno te, mo gok mina Ishereila peno Yamma shigon shii Fo-mina kan Kiriti, Yeesho te ye ma shewai." ³⁷ Bara ye yaara we te ta shinui, wei in kpaan shinui ti posheerii, in tewi ti Biiturush kan digi men an yiu shubetnii ya, "Mamolon, min ta yaani wen?" ³⁸ Nang Biiturush in tewon ti shinui ya, "Ma for fokma in yuuma yulma, koonong ma, ti ta shommono Yeesho Kiriti we fuddo shasshalauma, birang ma ta yiu shoomin shaana. ³⁹ Longku kumeni wema kan we shiboma kan me tali ding, kama memme gbe kaa ye Fo-mina Yammamu kama ye yiyaa." ⁴⁰ Kan paaro yen gbe ye tebraa in beng shinui, ya, "Ma kauro kuuma ti ta piire ta piri te." ⁴¹ Nang in yiu paaroi ta shinui in yuun yulma ti shinui, darangno tere in tokko sheeriju we war niyo dubu tat. ⁴² In min kuuju ti po yiu shubet kan ya we gale, ti ta beblo we-ta-kele kan for dulo. ⁴³ Shewon yiu koonong, nang in yuyyo we maam kama we temo ti ta kira me an yiu shubet. ⁴⁴ Me kunnga ding dii ka shaayi sharno koonong in shiwon weeju ding, ⁴⁵ in pibilla ka sharju kan wee kan te in bwayinna ti shaayi, ti mo leka ding. ⁴⁶ Kpaaliyo ding in min kuuju ta ye we dok ti ta mina aboju. In ti shuyyo we shiina ti ta mina shaayi, in ti bwairo weshiina ka twaalan posheeri, ⁴⁷ in ti shokro Yamma in we kumen ti piree kan niyo ding, kpaaliyo ding Fo-minan ti tokko sheeri me ti kumi kan Shi.