¹ Lakarda ye ne balla ka bi, ta Tiyopilush, tebraa we ye Yeesho yuwa kan wee ye shii Shuppaa, ² we war koddi ye shokran shii we war kudang, ka bi ye mina paaro ti ta shoom to me an yiu shubetni ye shii shakka. ³ Ka bi ta an shilibni, in shuk kuuni kan doi ti shinui kan we gbe ye po jimro shii. Po shaklo naapereu in shukin kuuni ti shinui, in yuun paaro kpadano Yamma. ⁴ Koddi ye ti kpomi kan shinui, in tewon ti shinui ya mo wejo wessho Urshalimai, pene ya mo shinui dang kunnghu no Yamma, kaa ye teka ta shii,"Ma yaaraa ti fokno ⁵ ya Yuwaana yuwa Yulmai ka too, pene ta yuuma Yulmai ka shoomno Yamma maa la shaklaa la wiu." ⁶ Bara ye galaa ta shinui in tel shii ya, "Fo-mina, tenei koddi ye ke ta merin ka gup ti Israilaa?" ⁷ Shii in tewon ti shinui ya, "Pen koddi tei weemam ye Fowi yuwa weni ka bangni. ⁸ Pene ma ta we bang ye Shoomin shaana shukno ti kuuma, ma ta yooma an jimrono ti Urshalima kan judiya ding kama Samaariya,we war fuwan kubuk ding." ⁹ Bara ye Yeesho teka we ye, ka ye shinui in ti gee kudang, in shokro shii ti kudang, nang shungu in latto shii ti doojui. ¹⁰ Pene ma ti geena ta shinui kping ka ye shokraa shii, kpantidi, niyo Palau sheriin ti jelejui jal kan lannan pe. ¹¹ In tewon ta shinui ya, "Ma men shwiji Galili, ma sherii ti po the man ti gee kudangii ti Ku wen? Yeesho tene ye shokraa ti jelemai we ammo kudang, ta meeru kaa ye ma weyan ti Ku ammonia kudangii." ¹² Nang in meeruju Urshalima ye shanan ti Ku sheela Olives, ye nimmi kan Urshalima, mere darang nessho dok. ¹³ Bara ye foonna ta shinui, in ammoju ta Mina kudang, pirinnee ye deenjun. Me ka shinui ma Piita, Yuwaana, Jamush, Andarawush, Filibush, Toma, Batalamawush, Matta, Jamush laano Alpawush, Shimon ye ti ye ma zeelot, kan Yawuuda laano Jamush. ¹⁴ Shin ding in li kuuju ta for dulo, kama shereb ding, kan Maryamu nonno Yeesho, kan ma molonnii. ¹⁵ Ti ta koddi tere Biiturush in illo shikni ti shakki mamolonni, pele niyo 120, in tewi ya, ¹⁶ "Mamolonno, yuwaro yen kulli yaan kemro we ye balili, ye shoomin shaana teka ti ta fokno Dauda ka paarono Yawuuda, mo yikka toom me an yiu Yeesho. ¹⁷ Shii milamii dok ti shakkimu kama shii yikka angi ti ku shuran te." ¹⁸ (wende la moo te pilaa ku dam ka wee ye weya longku shekni, ti po terei in shukno ka kwi, nang in shemo ka toddoni, asshinii ding in peruju peewe. ¹⁹ Me dii ti Urshalima ding in yaaro gun we te, nang in ye kudam teere ti ta fokju ka "Akeldama," ye yaa, "Ku dam dom.") ²⁰ "Kaa ye ballii ti ta Takadda Jabura, mo ku damni yooro gangrung mina, mo niyo dok wessho diyon ti taii'; 'Mo mundok birang shar po shooni ti ta shurani.' ²¹ Yikka ti gbare-do, nang niyo dok ti shakki me an yiu biimu kama koddi ye Fo-mina Yeesho ti ya shalo ti shakkimu kama, ²² wee yinna ti koddi yulmano Yuwaana we war darang ye shokraan shii ti jelemu kama, in yooni mo an jimro kan kama ti ku illitnii." ²³ Nang in li niyo palau ti toom, Yushubu ye ti ye ka Barsabbas, in ti ye birang ka Yustush, kan Mattiyas. ²⁴ In for dulo ta shinui ya, "Ke, Fo-mina, ke pene posheeri niyon-ding ding, shuklomu ti shakki me palau me ye ke shaka ²⁵ in shar po sho ti ta shuran ye Yawuuda wessha in meeni piree kan po diyoni." ²⁶ In ving kaari ti kuujui, nang kaari inshukno ti kuuno Mattiyas, in liin shii ti shakki me an yiu shubet me kpumu gee doki