¹ Ejiayiena, ẹdẹ ki wẹ, eni ijio ohẹn bi eni ewanlẹn ne si eni ẹbholo da si uma gbi Ijesu ne rẹ gbiọlẹn. ² Eda gba le abọ muọ dagbare, muọn ji Ipaleti nọ re ebhokhian. ³ Bhi ẹgbe ni Ijudasi no khiọnlẹn ne le ki re daghe kha bhuoyẹn uu gbi Ijesu, ode kiẹgbọ bhi emiebe ni ọle lulu, ọda kie ri ikpi oze ogban ne ri enalẹn ji eni ijie ohẹn bi eni ewanlẹn. ⁴ Ọda yiele, ''Mẹn lu emiebe ni mẹn rẹ khin ọria nọ bha lẹn ọkpa lẹn eva.'' Ọkpanọn, eda yiọle ''Bọ ki khin ji ma? kha khian dọ zilo egbe ẹ" ⁵ Oni egbe ni, ọda fi eni ikpi oze fibhi otọ bhi uwa oga nọ si osẹnobulua, ọda kpanọ bhi eni dọ ri iri rẹ hoa. ⁶ Eni ijie ohẹn da ri rni ikpi oze, eda yiọle, "Obha khẹ ke na ri ọna bhi aza ranmude ighe arẹn khi ọna" ⁷ Eki ko zilo yanlẹn fo, eda ri ọni igho rẹ de otọ ne da ha ri ọriọbhe tọ. ⁸ Ranmude ọna, eki da he ọni otọ "Otọ Arẹn" re fi bhi ukpẹdẹ ẹlẹna. ⁹ Ona ki da musẹ ọta ni Ijeremaya na akhasẹ talẹ nọ yo oole, "Eda ri ọni oze ogban, ivẹ ni ibhokin izureli yianlẹn bhi uhọnmọn. ¹⁰ Eda di ọni otọ si ipọta bi Ebeyanmẹn yọ ni re rọ khian" ¹¹ Enighena, Ijesu da mudia bhi odalo nọ si ọsuẹnbholo, ọni ọsuẹnbholo da nọlẹn "Uwẹ khi ojie si eni juu?" Ijesu da yọle "Uwẹ tale.'' ¹² Ọkpanọn, bhi ẹghe ni eni ijie ohẹn bi eni ewanlẹn ki re ha bhale ohogho, ọbha waniele ọta. ¹³ Ipaleti da nọle, "Uwẹ bha hin emin rebhee ne yọle khi uwẹ hulu?" ¹⁴ Ijesu bha wanie, ukpọta ọkpa bha si ọ bhi unu re, ọ da mama han ọni orebhokhian ẹlolo. ¹⁵ Ọni ẹghe na, bhi ẹghe iluemin nọ si ele, inene nọ si orebhokhian nọ rẹ fan fia ni ele onighan ọkpa ni eni usuebholo zẹle. ¹⁶ Ọni ẹgheni, eda moi izagan ọkpa natiọle Ibarabasi. ¹⁷ Bhi ẹghe ne ki rẹ si koko re, Ipaleti da nọ ele "Khọọ bha ho ni mẹn fan fia bhia? Ibarabasi la Ijesu na tiọle kristi?" ¹⁸ Ọle lẹmin khe mu Ijesu jiọ, ranmude ebedan nọ sile. ¹⁹ Ejiọ da sẹ yẹ di otọ bhi aga iguẹzọ okhuọle da ji uhọmajie jiọ nọ yọle, "Khai kha mọi obọ bhi egbe nọ si ọni okpia nọ bha luọbe ni ọkhọmẹn bha dere, ranmude ebhohiẹ nọ si ọle ni mẹn miẹlẹn nasọn." ²⁰ Ọni ẹghe na,eni ijie ohẹn bi eni ewanlẹn da lẹlẹ eni usuẹbholo ne rẹ nọn ifanfia nọ si Ibarabasi, na khan Ijesu muoran. ²¹ Ọni orẹbhokhian da nọ ele, ji ọni bha ho ni mẹn fanfia bha bhi ẹwẹ le veva? "Eda yiọle "Ibarabasi" ²² Ipaleti da nọ ele, "Bi mẹn aki khi Ijesu ne tiọle kristi yiẹ? " Ele rebhe da wani ọlẹn yọle, "Khanlẹn muoran" ²³ Ọki da yele, "Bezẹle, ba ti emiebe nọ lulu?" Ọkpanọn eda toto si tua yọle "Khanlẹn muoran" ²⁴ Ipaleti ki re, khi ebha ha ri ehọ bhi ota nọle ha tama ele deba emuhẹn ha gbi isusu,ọda sa amẹn rẹkpo obọa bhi iyalo nọn si ele, yiọle "Obọ mẹn khianmẹn bhi uki egbe si arẹn nọ si ọnokpia na obọ bha ọki yẹ." ²⁵ Eni enẹbho rebhe da yiọle "ji ọna arẹn ha ri bhi uki uhọmọ man bi imọn ne sẹ man" ²⁶ Ọki da fin Ibarabasi fia ne ele, ọkpanọn, ọki ri ukpasan re gbi Ijesu to, ọda muọn ne ele ne dọ khalẹnmuọran. ²⁷ Ẹgheni, eni eyiokulo nọ si ọni orẹbholokhian da mu Ijesu ha khi igiogbe si eni erẹbhokhian, eda tie eni ulogho erebhe si eni eyiokulo. ²⁸ Eki banọa fo, eda mu ukpin ojie ruẹlẹn ọn. ²⁹ Eda dọ ukpẹ ru igbiẹn, eda mu ọni ukpe ru ọ ẹle bhi uhọmọ bo ojie. Eda ri ukpo kpo ọli obọ bi er. Eda de di guẹ kha rọ zẹ ojẹ, kha yiọle, "Zaiki, ojie si eni juu" ³⁰ Eda tunu asẹn iyalẹn, miọlẹn ọni ukpokpo, kha bene ole bhi uku uhọmọn. ³¹ Eki rọ zẹ ojiẹ fo, eda balẹn ọni ukpọn si ojie ne yọlele, eda ne ukpọn si ọle yiọ muọle akhin ejia da khanmuoran. ³² Bhi ẹghe ne ki rẹ dagbare re eda mi okpia so, ọi sirini ne enilẹn yi Isamọni, eda ri ahu muọlẹn re khan egbe, bi ejiọ ada mu ikrosi nọ si Ijesu. ³³ Eda dọ si eje atiọle Igọgota, ebi arota da kha yi "Eji uhọmọ olimi ye" ³⁴ Eda mu ukpu eyọn nalẹn nọ muọ, eyọn na ri ebe riala gua. Ọkpanọn, ọki ri unu sọ bhọ, ọbha yẹ muọ. ³⁵ Eki khalẹnmuoran fo, eda fi onolo rẹ ghala ukpu nọ si ọle. ³⁶ Eda di otọ kha khẹ ọle. ³⁷ Bhi uku uhọmọn nọn sọle, eda gbi ama nọ yiọle "Ijesu khọ na, ojie si eni juu" ³⁸ Eyẹ khan izigan eva muọran de bale, okpokpa bhi obọ be era, ọnọ zeva obọ agobọ. ³⁹ Ene gberea da khọle,leghe uhọmọn an. ⁴⁰ Yiọle "Uwẹ nọ khian guọghi uwaoga nọ si osẹnobulua, bhi ikpẹdẹ ea, u ki kike bọnlẹn hi mi egbẹ sade ọmọn nọ so osẹnobulua, tuẹnre bhi uki krọsi!." ⁴¹ Erio eni ijie ohẹn, ye ri ha rọ zogie deba egbẹnbe bi eni ewanlẹn, eda yiọle. ⁴² "Ohimi eria ebhe bhe, ọkpanọn, ọbha sabọ himi egbeọ. ọle ojie nọ si Izurẹn. Ọle ruẹnre bbhi uki krọsi man ki ha mọi urẹbho da ele. ⁴³ Ọ mudu yan osẹnobulua, ji osẹnobulua miọlẹn fan, ranmude ọle tobọle yiọle, "Ọmọn nọ si osẹnobulua mẹn khi." ⁴⁴ Erio eni izigan na ko khan ele bi Ijesu muoran ye ri kha ri unu ji ọle. ⁴⁵ Da bhi uri agogo nọ zẹ ehan, ojiobi da dgue otọ agbọn rebhe re dọ si uri agogo nọ zie silin. ⁴⁶ Ẹghe agogo nọ zie silin, Ijesu da ri akpuru nọ kalale rie so yiọle "Ẹli,Ẹli, Lama Sabchthani?" e ba ri onọ ta da ha yi ''Osẹnobulua nọn si mẹn, osẹnobulua nọn si mẹn, bu wẹ ki da fi imẹn ehọ a yẹ?" ⁴⁷ Bhi ẹghe ni eso bhi ẹwẹle ne mudia bhi eni ki rẹ họn na, e da yiọle "Ọ so tie Ẹlajia" ⁴⁸ Ọsi ẹjiẹje, kpokpa bhi ẹkẹle da nẹ mu ukpi nyẹn, di ọle bhi ayọn nọ khekhea ọda ri ukpokpo re mu ni Ijesu muọn. ⁴⁹ Enekẹle da yiọle "Zọle obọ, oha ji man fẹ ghe si Ẹlajia dẹ dọ himi ọlẹn" ⁵⁰ Ijesu da gbokie mama rie so bhi ukpuru nọ kakale, ọda yuu. ⁵¹ Ọni ẹgheni, ukpọn nọ ribhi ẹkẹ uwaoga nọ si osẹnobulua da sọ yi eva da bhi akoghu rẹ si otọ da mu ruegbe bi enido da dene raa. ⁵² Idin da tujea, eni khiale ne yunolo da riọkpanọn. ⁵³ Eda si bhi ẹkẹ idin re, ẹghe ni Ijesu ki da riọkpanọn fo, eda na bhi ọni ukpẹbho nọ khiale, ri egbe ma ẹbholo ne bunbun. ⁵⁴ Bhi ẹghe ni ọnọ kalo si eni eyiokulo ne kha khe Ijesu ki rẹ daghe khi otọ siẹnlẹn bi emin kike ne sunu, ofẹn da ha mu ele, eda yiọle "Ẹmuanta, ọmọn nọ si osẹnobulua ọkhọna" ⁵⁵ Ikhuo ne bubu, ne ni Igalili rẹkhan Ijesu, ne gbi ẹlo ghọle da ni idangbe gha ghele. ⁵⁶ Bhi ẹwẹle da ha yi Imeli madali, Imeli, inẹn Ijemisi bi Ijosẹfu, bi inẹn imikpẹa ne si Izẹbẹdi. ⁵⁷ Emuan ki rẹ re, okpẹa nọn fele nọn si Arimatia vae, na tiọle Ijosẹfu, ukpokpa bhi edibo nọn si ijesu. ⁵⁸ Ọda bulu Ipaleti re, yọ nọ mu ekhui nọ si Ijesu nalẹn. Ẹgheni, Ipaleti da kpi ase ni re mu ekhu si ọle nalẹn. ⁵⁹ Ijosẹfu da mui egbe nọ sọle, ri ukpọn olimi gbanọlẹn. ⁶⁰ Ọda mui ọlẹn bhi idin nọ sọle na hian si bhi udo re. Ọki nọ tọ fa, ọda mui udo nọ maman kpọnọ rẹ gue ọni ẹkhu nọ si ọni idin, ọda kpanọ si bhi eni re. ⁶¹ Imeli Imadali bi Imeli nọ kẹle da do otọa kuẹlo ghe ọni idin. ⁶² Ẹdẹ nọ kẹle, nọ ha yi ẹdẹ nọn rẹkhan ẹdẹ imuegbe, eni ijie ohẹn bi eni Ifarisi da si kokore bu Ipaleti. ⁶³ Eda yiọle ''Owanlẹn, man yere khi ẹghe ni ọni ohiora re kha ribhọ, ọi yiọle 'Ikpẹdi ea ha gba, ọle dẹ gbokie riọre' ⁶⁴ Ranmude ọna, mama tama ele, ni khe ọni idi nọ sẹn bhe ni ikpẹdẹ ea ni, na hai dọ miẹn khi eni edibo ni sọle vae dọ do mu ekuọle si bhi eni re bi ẹ tama ẹbho, ''Họ riọ kpanọn bhi idin ọni eku na de kpanọn ni ọsọ hẹnhẹn.'' ⁶⁵ Ipaleti da tama ele ''Bha ne ekhẹ ughe ne yiẹ bha, bha yele khẹ ni be ji oyiebha. ⁶⁶ Eda dọ mama khẹ ọni idin, mu udedi do re khiọle eni ẹkhu gbea, e da ni egbenughe bhi eni, ne kha khẹ eni.