¹ Isimọni Ipita, igbọn bi ohọn nọsi Ijesu kristi, rẹji enẹbholo nin mien ọni irẹkẹleọnhọ nọ ghanlan bọni iman rẹmiẹn, irẹkẹleọbhi ebediale nosi Osenobula nọsẹman bi Ijesu kristi. ² Eseọhẹ bi ọfure maman teẹn okhun bhi eke ilẹnemin so Osenobula bi ọsi Ijesu ni ọmiẹmanfan. ³ Bhi ahu nọkpọnọle nọsọle, eminrebhe si iẹnlẹn bi ayẹn iyẹnlẹnngbale aki reman fo big alẹnemin so Osenobula, notie man bhi ẹkẹ oriri bi ọmẹnfo nọsọle. ⁴ Bhi ẹkẹọlenan ọda vive nọghanlẹn bi ọnọkpọnọle man, bọni adamiẹn uwẹ ki ghale nhi oni iyẹnlen solẹ, bọnuwẹ kirẹ nẹmin ebe siọbhotọ. ⁵ Ramude ọna, zakhuakhua, nurẹ yẹn iyẹnlẹnogbale deba irẹkẹleọbhọ, rẹdeba ọmẹn re ilẹmin bale. ⁶ Rẹdeba ilẹnemin re imugbe ebẹẹ bale, redeba iziengbe re ayẹn iyẹnlẹnọgbale bale, ⁷ redeba iyẹnlẹnọgbale re ajẹjẹ ọsi obhio bale, rẹdeba ajẹjẹ ọsi obhio re ahuẹmọnegbe bale. ⁸ Enemin daha neẹ eda ribhi uwẹ bi eda wanre bhi uwẹ da sabọ kiẹn agan la ọnọbhamikpẹ bhi ilẹnemin nosi ebealẹman Ijesu kristi. ⁹ Okpakinọ ọnọimọn enemina idiabi ọruẹlo nọidaghe odurele, ramude ọyelea aki kpọle sibhi eminebe negberaa. ¹⁰ Rẹjọna, ibhiolo nikpia, lu ọnọmẹnẹ nurẹ ri utiemin na tieẹ bi uzemin na zẹẹ sẹ, uwe aluenemina, uwẹ ida fidon. ¹¹ Bhọna ada maman tuje uwẹdẹa niẹn nure nabhi oni eguale ẹdẹdẹmindẹ nọsi Ebealen man bi omiẹman Ijesu Kristi. ¹² Rẹjọna imẹn imuegbe ẹghe rebhe nirẹ ayẹẹ eneminan rebhe re, ọrẹkiẹn uwei len ele, bi ọrẹkiẹn uwẹi mutoto bhi ẹmọata nonẹẹ. ¹³ Imẹnta ọdidianimẹn reribho oni uwaoya na nimẹn rẹgua okhun bhi ayẹria emin re. ¹⁴ Imen ilẹnmin bhi ẹghe nọbharegbe oni egbenan (uwaoga) iyẹda haribhọ, ramude Ijesu Kristi ni ebaelẹn man kirọna mamẹn fo. ¹⁵ Imen di zakhuakhua bọna ada miẹn imẹn aki kpanọ ibha ki sabọ ayeneminan re. ¹⁶ Bhọna iman bha rẹkhian ọkha narẹwanle manman ẹghe niman reji ibha len ahu bi uvade nosi Ijesu Kristi ni ebealen man, okpakina iman ikiẹn oseli reji oriri nọsọle. ¹⁷ Oda miọghọ bi oriri bhi obọ Osenobula naba ọghe unukpuru retamanlen bhi ahuoriri, oda tale, "Onan ọmọn nimẹn huẹmọnlẹn, nọrẹmẹn ghonghon." ¹⁸ Iman tobọman ihọn onuruna nọ nabhi okhu vae eghe niman rẹdebale haribhi ukokhu oke nokhiale. ¹⁹ Iman daha mọn ọnakhase ẹmọnlẹn nọmon omusẹ, nọakien ebemẹn sade ibha rọkhọleọbhọ bukpu nọbhala bhi eke ebiuki. ọkuẹsẹ oni ukpẹde rele no ahianhian ọsewẹ ọkpa ada bhala uwe bhi no ọkhọle. ²⁰ Regbera enarebhe lẹn ghe akhase ivae bhi ẹkẹ ẹbọria lẹnlẹn. ²¹ Abha mia akhasẹ nọni iho ọria vae, okpakino eria italomin beji ahunọkhiale reha noele.