¹ Ẹyi ọnọ vọrọ ki aza ọ si irẹyi, ozida Ikristi ana si irẹyi irẹiza Oshomoshi ana tẹ, chire ụvọ ka ẹ si eyi pee. ² Isa ene si fini ụvọ ẹnẹna si isa chire ụvọ, ọnọ vi ka, ẹ vi ẹzẹna va zụụ dọrenụ. ³ Ama ini ayami, isa che ọnọvi ka ẹwụ nin navẹki, ikotụ aza ọ mẹ ishọji yi mi. Fụvọka ẹmi nyẹmbẹ ọzi mi ishọji yi ẹngwu ami. ⁴ Ma zi yẹ irẹyi ọnyọnyi ọna si shi mi irẹka, ama, ọnọni ọzi siọ zụ kima rivi. Ananyiyi ọnaa mẹ ishọji ami. ⁵ Fụvavọ, a sụ mẹ ishọji inọpati isa ọnyọnyi di ẹfi aani o vetu, di Ananyiyi ọ tangwa va vẹ. Ọ vaa si isa bo ana tẹ tụni oozi vi ini eyigede, dọ va si aaro ọtụtụrụma bo zụ. Ẹfi avọ, di ọza ọnyọnya va dọ ụga fini ụvọ Oshomoshi. ⁶ Ọmẹyani, ẹwụ nin ẹnyarami, maa si irẹyi ọnọni mẹ ụkọrọ inẹngwụ ami ọnri Aponọsi fụvi dụ wa zụ yẹ afụ irẹyi ọnọni fini ụvọ̣ ayi nini. "A sụụ jinẹ isẹna chẹrẹ tẹtẹ," ọọ maan vi doti asi ọ nyi aza awụ nin anaa si ọzẹnyi meyi, dọ seyi wu ọzẹnẹsa. ⁷ Yere aza enee re isẹna vi irenyi ini awu nini ọnri ayi azẹnẹsa kẹ? Sẹnẹvẹ isa ọnụ nyi ana razi vi ọọfẹ? Aaviki ọọfẹ ọnụ ree dọ, sẹnẹvẹ du wa garogụ kẹ venebiri ka aivi ọọfẹ ọnụ ree dọ? ⁸ Wee re vene ka waa nyi isụ wee si nin da! Waa mẹ vene ka opisa ọnụ vi nin! Waa mẹ ki oshinọyi ọnụ vi nin, shụ wai daka re ọgụvọ ayi. Ọ maa viki oshinọyi ọnụ vi nin irẹiza, ụmavọ di ẹyi yaan zụ pe wụ nin ri oshinọyi. ⁹ Fụvọki mee ro ka Oshomoshi ọọ si ẹyi ọnitụ kwẹtẹ yi anẹshẹ ini ọikọọta vene aza ana mẹ ishọji isụ ọwọza yi. Aza bo vana kụ feyi shi yi, shi angẹni nin, shi anẹshẹ. ¹⁰ Ọnụra ọni ii vi fụvi Ikristi, di ẹwụ nini vi ọnụvira ini Ikristi. Yazi nyi ụkata, ama di ẹwụ nini nyi ụkata. Aa dụbani yụ wụ nini, ama da seyi wụ yi. ¹¹ Vetụ ụmaani, vọni ụngwẹ ọnri onyi aa kụ yi, ye zi re ita kụẹngwụ, ee tu yi vangwushi, di razi nyi ireshi ra. ¹² Yaa si ẹchẹngwụ mụkọrọ kokoro. Ẹ ma ji yi isiya, di ya tozụrenụ ẹdabẹrẹ yụ wa. Aa si ụya ri yi fụvọ ọdọwụ ayi, di nyi ọsẹngwụ-dọ. ¹³ Ẹẹ ka ọshimi ayi, di yaa ka ọiza anini. Vetụ ụmaani, di vi iritụtụ anẹshẹ, ọnri ishẹrẹ enefụ bo tụwa eyi. ¹⁴ Maa zi chẹrẹ isẹnẹni di ma siọ mụshi nyi wụ, ama, di ma siọ vọrọ wụ nin vaji oze venebiri ezi ọnim ngwụayani. ¹⁵ Fụvọki, shọọ daka vi ka waa nyi aza akashi oze ẹwụ, ana zụ wụ nin ka, oze ọzi ini Ikristi, wa zi nyi Adaa ọrụrụ nini. Fụvọka ma vara Adaa ini Ijesu Ikristi yụ wụ nin, zirẹngwu irenụbe ọiza. ¹⁶ Maa dipẹ yụ wụ nini kụ waa fama mi nini. ¹⁷ Fụvavọ ọni si tụ Itimoti, ọnim ngwụayani, dọ zẹ vi ozi irẹiza ini Ananyiyi shụ wụ nin. Ọ vaa tama awụ nin ayi mmẹ mẹ aa zụsẹ, inoze Ikristi bo, venebiri imẹmẹ aa zụ aza irasha bo, ọnri ini ichọọchi bo. ¹⁸ Ọmẹyani, azẹnyi inakaakana awụ nin vana kụa kụẹngwụ nin tụẹba, dẹ mẹ venebiri kima kụa vi ida awụ nin. ¹⁹ Ama, mva jantụ vẹ, aavika Ananyiyi oo si. Ụmọnọ, mve re isi azẹna kụ ẹngwụ tụẹba aavọ, isi ọnụkata nini vị, aivi irẹyi ẹnẹ ka kẹnẹ mva wụ. ²⁰ Fụvọka, ijọva ayi Oshomo-shi ọzi vi ini irẹyi ọkika renya, ama ini ụkata. ²¹ Sẹnụ wee sị? Ụ wa kima si inori ve tụ wụ nin, navẹki ma vẹ ini osisi ọnri ini ifẹ ẹngwụọrọ.