1
Ẹnyarami, ẹfi ọnim vẹ tu wu nini, mazi vẹ ki ma vi ọyaraka, navẹki ọnụ ụvira, mma showụ irẹiza ana tẹ inọpati Oshomoshi yụ wụ nini.
2
Fụvọka ọzi nyi isa ọni me si ki ma yẹ inakaakana awu nini, ọọ zi vi Ijesu Ikristi ana kani zọchi-avashi.
3
Maa ya pe wụ nin vene ẹzẹna razi nyi ụkata, dim yini angwashi ọnri irẹgashi.
4
Ama utu irenụbe ọnim showụ aani, ọzi bẹrẹ osisi ụvira kụshi ọza inẹ. Amạ, ọ sẹngwụ zụ zirẹngwụ ifẹ ọnri ụkata aani,
5
Fụvọ di asi ọdọwụ awụ zufu dinẹ tụni ụvira aza, ama ini ụkata Oshomoshi.
6
Ọmẹyani, ya karẹyi ụvira inakaakana azẹna nyi ụvira da, ama aivi ini ụvira anẹshẹ, navẹki ụvira oshirẹsụ evereze ọnọni anaa karụpa.
7
Akikọnọ, ya karẹyi ụvira Oshomoshi ini irẹiza ọnatẹ, ụvira ọnatẹ ọni Oshomoshi teni tẹtẹ dọvidi ụmẹ ana mẹ yi ụga ayi.
8
Ọzi nyi ọdọvidi ayi ụmọnọni ana yẹ ụvira ọnọni, fụvọka avi ka ẹẹ yaan yẹ inẹfi ọnọ, ẹzi yaan kani Ananyiyi ana nyi uga zọchi-avashi.
9
Ama, venebiri a mẹ chẹrẹ tẹtẹ, "Ọzi nyi ụtọ ene si wụọ, navẹki ọtụtụrụma ene si kaa nangwụ isẹni Oshomoshi teni tẹtẹ yi ẹni ono sirẹyi aani."
10
Isẹnẹni ọni Oshomoshi si zụyi zirẹngwụ ifẹ ọnini. Fụvọka ifẹ venee sii afụ isa bo, shi isẹnẹ nyinẹ anavi ayi Oshomoshi.
11
Ọwa nyi ẹzẹna yẹ isẹnẹ ọza eero, ọ si fini ifẹ ọza ana yi inaani? Avọ mẹ zẹ vi vi, ọzi nyi ẹzẹna yẹ isẹnẹ nyinẹ inọpati Oshomoshi ọchishi Ifẹ Oshomoshi.
12
Ẹ ya zi di ifẹ ẹshẹ, ama ifẹ ana fidi Oshomoshi vẹ, di ya zụ yẹ isa ọọfẹ ọni Oshomoshi si yi yi.
13
Yaa karẹyi inọpati isẹnẹni inoze ọnọviki azẹ zi zụa si ụvira oza ka, ama ọni Ifẹ aa zụ aza. Ifẹ ọnini ọnọ sha irẹyi ifẹ afu-sha zirẹngwụ ụvira ọi ifẹ.
14
Ẹzẹna razi yini ifẹ ọizụa di isa ana vi ọyi Ifẹ Oshomoshi, fụvọka, ee vene ụra tụ neyi anini. Ọizụa yẹ isẹnẹ vi, fụvọka ziri ifẹ ana ya yẹ.
15
Ẹzẹna yini ifẹ ọnọ mẹ ishọji isa bo, ama ẹ zi yini afu ishọji azẹnẹsa.
16
"Ọwa nyi ẹzẹna yẹ ọtụtụrụma Ananyiyi," ọna va zụụ jii zụọ? "Ama, ẹyi aa nyi ọtụtụrụma Ikristi."