¹ Ipọọrụ, ọni Ijesu Ikristi shi ka, ọvi ọnitụ, veni Oshomoshi mẹẹ siọ ọnri Isọsitẹnisi ọnyarayi, ² tụshi ichọọchi Oshomoshi ọna yi Ikọrinti, netụ ẹnẹna sha tụ renyi ini Ijesu Ikristi, ẹnẹna shi kẹ vaa vi ọza ọnini. Zẹtụọ, iza chi chẹrẹ iwe ọnọni tụshi aza bo ana shi ini irẹsha Ananyiyi Ijesu Ikristi, irasha bo anaa vi Ananyiyi, do ̣zẹ vi Anayụwa. ³ Ọiza-ọọfẹ ọnri ẹngwọrọ fidi Oshomoshi anavi Adaa ọnri Ananyiyi Ijesu Ikristi, ọọ vasi vi ayawụ nini. ⁴ Ẹfibo ọni ma si kụ Oshomoshi avọ yụ wụ nini, fụvi ọiza-ọọfẹ Oshomoshi ọni Ijesu Ikristi si wụ nini. ⁵ Ọ mẹẹ wụ nini opisa inoze bo, ini ụmẹmẹ aa karẹyi ụvira bo ọnri ini ọyiyẹ, ⁶ Venebiri a mẹ divenụ irẹyi inọpati Ikristi, kọ vi irẹiza inakaakana awụ nini. ⁷ Fụvavọ, ụ mẹ dinẹ ee zi ọkụshi ọni Ijesu Ananyiyi vaa sii sẹngwụ zụ aani, ọzi nyi ụkata ifẹ ọnya ọni Oshomoshi sii yi ọza ọnụ raa zi nyi nin. ⁸ Ọva zẹ titu wụ nini ụkata netu ọikọta, doti wa vaa vi ẹzẹna ra za nyi ivi ini ọkụshi Ananyiyi Ijesu Ikristi. ⁹ Osho-moshi vi ọni irẹiza, ana shụ wụ vangwụ ini ọrigẹ Ozi aani, Ijesu Ikristi anavi Ananyiyi. ¹⁰ Ọmẹyani, ẹnyarami zirẹngwụ Ananyiyi Ijesu Ikristi, ka ẹwụ nin bo ọvụvọbẹ di asọ nyi ọgiga inakaakana wụ nini. Maa dipẹ yụ wụ nini, kụwa sinẹ vọnya ini omimi isa. ¹¹ Anreshi Ikinoe nini ẹẹ shafụ aani sha yi mi, ẹwụ ẹnyarami nin, ki ọ nyi aka renyi renyi inakaakana awụ nini. ¹² Irẹyi ọni ma ka ọnọvi: Ọza ọnyọnya awụ nini ọọ kaa ki, "Ẹma ya pe Ipọọrụ," di ẹnyi kaa ki, "Ẹma ya pe Aponọsi," di ẹnyi kaa ki, "Ẹma ya pe Ikefasi," di ẹnyi kaa ki "Ẹma ya pe Ikristi." ¹³ Awa ga Ikristi tụoze renyi renyi? Awa kani Ipọọrụ zọchi-avashi fụva awụ nini? Awa mi isami yụ wụ nini ini irẹsha Ipọọrụ? ¹⁴ Maa kụ Oshomoshi avọ, kima zi mẹ isami yi ọzọnyọnyi awu nini, ọ si fini Ikrispọsi ọnri Igayiọsi. ¹⁵ Ọnọni, ọvọvọ vi, doti asi ọ nyi ọza ana va ka ki, ami isami yụ wụ nini ngwụ ni irẹsha ami. ¹⁶ (Maa zẹ mi mẹ isami yi anreshi Isitẹfanasi. Ọ si fini ọnọ, mazi yẹ aaviki ma mẹ isami yi azẹnẹsa.) ¹⁷ Fụvọki, Ikristi vanaa tụ mi kima vaa ka irenụbe ọiza, aa zivi kima vaa mi isami, ọzi tụ mi kima vaa ki irenụbe ini ụvira ọza, ama, ukata ayi Ikristi one sụ ini ọchi-avashi, doti asi ọọ vaa vi osụsụ. ¹⁸ Fuvọki, irenụbe inọpati ọchi-avashi, oo venebiri ụra yi enene suu naa, ama, inakaakana aza ọni Oshomoshi aa dọọtụ, ụkata Oshomoshi ọnọvi. ¹⁹ Fụvọka, aa chẹrẹ tẹtẹ ka, "Ụvira ẹnẹna nyi ụvira, vọnim vee vụri. Oyiye ọnụvira nin vọnim vee dụụ sha." ²⁰ Yere ọza ana nyi ụvira kẹ? Yere ọza anavi okiwe kẹ? Yere aza ana nyi ẹshankata inọpati ẹshẹ ọnọni kẹ? Oshomoshi wa razi vara uvira anẹshẹ nin tụni ụra da? ²¹ Ụmọni ẹshẹ ini ụvira aani razi yẹ Osho-moshi, ushine ọnọvi yi Oshomoshi, ka aa zirẹngwụ irenụbe-ọiza aani ene veni ura yi anẹshẹ, doti aa zụ siọ dọ aza ana ra dọwụ tụ. ²² Fụvọki ani Ijuu ee fisụe isa oshishozeyi, di ani Igiriki fisụe ụvira. ²³ Ama, ya ka irenụbe Ikristi ana wụ, ọna ji ani Ijuu nini oze, do vene irẹyi ụra ineyi ani Igiriki nini. ²⁴ Ama yi ẹzẹni Oshomoshi shi da, shi ani Ijuu ọnri Igiriki nin, yaa karẹnụbe Ikristi veni ụkata ọnri ụvira Oshomoshi. ²⁵ Fụvọka ụra Oshomoshi o fụni ụvira aza, ọnri ukumi Oshomoshi ọ nyi ụkata fụni aza. ²⁶ Ẹnyarami zama amẹmẹ shụ wụ nini. Ọzi vi azẹ ẹrụrụ awụ nini, ọnọ nyi ụvira zirengwụ ọyiyẹ aza. Ọzi vi azẹ ẹrụrụ̣ awụ nin, ọnọ nyi ụkata. Ọzi vi azẹ ẹrụrụ awụ̣ nin ọna ma inoze ụ̣bani. ²⁷ Ama, Oshomo-shi ọọni isa ene veni ụra inẹshẹ, dọ siọ mụshi nyi ọnụvira, Oshomoshi ọọni isa ana razi nyi ụkata, dọ siọ mụshi nyi ẹnẹna nyi ụkata. ²⁸ Oshomoshi ọọni isene weyi, ọnri ọnaa seyi wụ inẹshẹ. Dọ vana zẹ ni ni isa ene re ka ọzi nyi isọvi ọnọ bẹrẹ, doti oroze si isa ene re kọ nyụ ụbani, vara isa ana razi nyi ọnọ bẹrẹ. ²⁹ Ọmẹ ọnọni doti asi ọ nyi ẹzẹna nyi isẹnẹ vaa mẹ kọ garogụ inọvidi aani. ³⁰ Fụvi isa ọni Oshomoshi mẹ, ọmẹyani wa yini Ijesu Ikristi, ọna vari ụvira yiyi fidi Oshomoshi. Dọ vari ọmimanasẹrẹ, ọnini, ọnri ọshishi varama. ³¹ Ọmẹ maan vi, venebiri iwe ọnini mẹ kaa, "Navọ di ẹnẹna garogu̇,̣ ẹẹ garogụ ini Ananyi̇yi."